Oğuz rayonunda təhsilin maddi-texniki bazasının möhkəmləndirilməsi istiqamətində tədbirlər davam etdirilir.

Rayon təhsil şöbəsindən AzərTAc-a bildirmişlər ki, hazırda kəndlərdə dövlət vəsaiti hesabına 5 yeni məktəb binasının, habelə Oğuz şəhərində 115 yerlik yeni uşaq bağçasının tikintisi davam etdirilir. Filfili kənd tam orta məktəbi üçün inşa edilən 180 şagird yerlik yeni binanın tikintisi artıq başa çatmışdır. Bina yaxın günlərdə şagirdlərin istifadəsinə veriləcəkdir. Dəymədərə və Sincan kənd məktəbləri üçün inşa edilən 180 və 220 şagird yerlik yeni binaların tikintisində hazırda tamamlama işləri görülür. Bundan əlavə, 360 şagird yerlik Qumlaq və 180 yerlik Ərmənət kənd məktəblərinin tikintisinin isə 2013-cü ildə başa çatdırılması nəzərdə tutulur.

Ümumiyyətlə, son illərdə Heydər Əliyev Fondunun təşəbbüsü və dövlət vəsaiti hesabına rayonda şagird yerlərinin ümumi sayı 2300-ə çatan 10 yeni məktəb binası istifadəyə verilmiş, iki məktəb binası əsaslı təmir olunmuş, bir məktəb üçün 10 əlavə sinif otağı tikilmişdir. Həyata keçirilən tədbirlər nəticəsində rayonda tədrisi iki növbədə aparılan məktəblərin sayı xeyli azalmışdır.