Noyabrın 16-17-də Bakıda bədii gimnastika üzrə 19-cu Azərbaycan birinciliyi keçirilib.

Bakı Olimpiya İdman Kompleksində təşkil olunmuş yarışlarda 1997, 1999, 2001, 2002, 2003-cü və 2004-cü illər təvəllüdlü 93 nəfər gimnast iştirak edib.

Bu yarışlarda "Neftçi", Bakı Gimnastika Məktəbi, Respublika Kompleks İdman Məktəbi, "Spartak", Daxili İşlər Nazirliyinin İdman Cəmiyyəti, "Sərhədçi", "Bakı" peşəkar idman klublarının və Nizami rayonunun Uşaq-Gənclər Yaradıcılıq Mərkəzinin gimnastları ilə yanaşı, Xırdalan, Gəncə, Qusar və Sumqayıt idmançıları da mübarizə aparıblar.

Azərbaycan birinciliyi uğrunda mübarizə aparan 1997-1999-cu illər təvəllüdlü gimnastlar arasında qızıl medal Ləman Dadaşovaya, gümüş və bürünc medallar isə Yekaterina Prokopenkoya və Bahar Əsgərovaya təqdim edilib.

Yarışda 2000-2001-ci illər təvəllüdlü gimnastlar arasında Ruqiyyə Səttarova birinci, Nataliya Quluyeva ikinci, İlahə Məmmədova isə üçüncü olub.

2002-ci il təvəllüdlü gimnastlar arasında Vəfa Həsənzadə ən yaxşı nəticə göstərərək birinci olub. Dara Sorokina və Ləman Hacıyeva ikinci və üçüncü yerlərdə qərarlaşıb.

Birincilikdə 2003-cü il təvəllüdlü gimnastlar arasında isə birinci yeri Aydan Ağayeva, ikinci yeri Ləman Hüseynova, üçüncü yeri Darya Farşbafşəhriyari tutub.

Turnirdə 2004-cü il təvəllüdlü idmançılar arasında isə ilk üç yerə müvafiq olaraq Lalə Kramarenko, Nərmin Səmədova və Arzu Cəlilova layiq görülüblər.

Rəşad ZİYADOV