Bütün
şüurlu həyatını, ömrünü balalarımızın, gənc nəslin
təlim-tərbiyəsinə həsr edən görkəmli şair,
ədəbiyyatşünas, filologiya elmləri doktoru, professor
Rafiq Yusifoğlu ali və orta məktəblər üçün yazılan
neçə-neçə dərsliyin, dərs vəsaitlərinin, tədris
proqramlarının, elmi monoqrafiyaların müəllifidir. Onun
şeirləri, hekayələri, nağılları uzun illərdir ki, orta
məktəb dərsliklərində, əlavə oxu kitablarında özünə
möhkəm yer tutmuşdur.
Rafiq Yusifoğlu mənən çox zəngin qələm sahibidir. Elə
buna görə də onun nəşr olunan hər yeni kitabı oxucular
tərəfindən maraqla qarşılanır. Şairin bu yaxınlarda
çapdan çıxmış "Könül səltənəti" (ADPU nəşriyyatı, 2012)
kitabında yeni nəslin estetik zövqünü oxşayan
bir-birindən mənalı şeirlər, Çin, Koreya, Rusiya,
Gürcüstan şairlərinin şeirlərindən yeni tərcümələr
toplanmışdır. Bu əsərləri oxuyanda ictimai-siyasi
hadisələrə biganə qalmayan, vətən təbiətini dərin
məhəbbətlə sevən, onun füsunkar lövhələrini
sənətkarlıqla əks etdirən şair ürəyinin çırpıntılarını
eşidirik. "Naxçıvan", "Beş yüz ilin ən uzun gecəsi",
"Lalə dənizi", "Abşeronun küləkləri", "Qoca dünya",
"Belə getsə", "Vulkan" və s. bu kimi şeirlərdə
R.Yusifoğlunun mövzuya yeni münasibəti öz əksini
tapmışdır. Dünyamızın taleyindən narahat şair insanları
təbiətin işinə qarışmamağa səsləyir:
Bir iş görməzdən əvvəl
Gərək insan düşünə.
Xatalıdır qarışmaq
Təbiətin işinə...
O bizə üsyan edir,
Coşur, haray qoparır.
Dağda torpaq sürüşür,
Aranı sel aparır...
Rafiq Yusifoğlunun şeirlərindəki təbiət lövhələri adamı
heyran edir. Oxucu elə bil ki, bu şeirlərin lirik
qəhrəmanına qoşulub Azərbaycan torpağını qarış-qarış
gəzir, onun gözəlliyindən zövq alır. Rafiq Yusifoğlu hər
otu, çiçəyi, dağı, daşı, hətta ən adi yarpağı belə bədii
obraz səviyyəsinə qaldıra bilir. "Gül bayramı" şeirini
şair çox mənalı və gözlənilməz bir sonluqla bitirir:
Bayramı olana
gül verirlər,
Bəs güllərə
nə bağışlayaq?
Kitabda Rafiq Yusifoğlunun Türkiyə səfəri əsasında
yazdığı təəssürat şeirlər "Türkiyə nəğmələri" başlığı
altında yer alıb. "Sevgimin əbədiyyət yuvası" adlı
bölmədə isə müəllifin son illərdə yazdığı sevgi şeirləri
toplanıb. Bu şeirlər insanları sevərək yaşamağa,
sədaqətli, vəfalı olmağa səsləyir.
Rafiq Yusifoğlunun öz mənəvi aləmi kimi onun "Könül
səltənəti" də çox zəngindir. İnanırıq ki, bu sehrli
dünyaya səyahət edən, şairin bir-birindən mənalı, az
sözlə dərin fikir ifadə edən şeirlərini oxuyanlar məmnun
qalacaqlar. Çünki Rafiq müəllimin şeirləri hər an, hər
saniyə insana insan olduğunu xatırladır.
Günel ALMAZ,
AMEA-nın Folklor İnstitutunun doktorantı |