Ölkəmizdə müəllimlərin İKT biliklərinin artırılması
sahəsində mühüm işlər görülməkdədir. Bu vəzifələri
layiqincə yerinə yetirmək üçün hər bir müəllim öz
üzərində çalışmalı, dərs prosesində yaradıcı olmalıdır.
O, ilk növbədə təlimin yeni texnologiyalarını bilməli,
yeni proqram və dərsliklərin, fənn kurikulumlarının
xüsusiyyətlərindən xəbərdar olmalıdır. Yeni təlim
metodlarından istifadə zamanı müəllim şagirdin müstəqil
düşünmə qabiliyyətinin inkişafına şərait yaratmalıdır.
Dərsdə isə motivasiyanın yaranmasına xüsusilə çox
diqqət yetirməlidir ki, dərs şagirdlər üçün maraqlı
keçsin. Belə olanda uşaqlar onlara verilən tapşırıqları
həvəslə yerinə yetirirlər.
Rollu oyunlar zamanı şagirdlərim bir-birləri ilə
ünsiyyət yaradır, onlar qarşı tərəfləri daha yaxşı başa
düşür, çalışırlar ki, müstəqil mühakimə aparıb öz
mülahizələrini söyləməklə bərabər bilmədiklərini də
soruşub, öyrənsinlər, birincilik qazansınlar. Şübhəsiz,
bu oyunlar, ilk növbədə, balacaların şifahi nitqlərini
inkişaf etdirir. Mən tədris prosesində əqli hücum,
müqayisə, diskussiya və sair üsullardan da yetərincə
istifadə edirəm. Dərsin ilk mərhələsində motivasiyaya
üstünlük verirəm. Qavrama qabiliyyətlərini nəzərə
alaraq dərs prosesində hər bir şagirdə fərdi
yanaşıram, onların psixologiyasına uyğun rollar
verirəm. Bəzən ana dili dərslərində ayrı-ayrılıqda hər
uşağa nağıl verirəm. Onlar özlərini nağıl
personajlarına oxşatmaqla, mətndəki obrazları yaşatmağa
çalışırlar. Növbəti dərs zamanı "Ana dilini nə üçün
öyrənirik" mövzusu ətrafında sual-cavab aparıram.
Uşaqlar ana, vətən, torpaq haqqında şeirlər, nağıllar,
tapmacalar söyləyirlər. Hərfləri öyrədərkən belə bir
tədqiqat aparıram, misal üçün, "P" səsinin və
hərfinin hansı xüsusiyyətləri var? Və yaxud fonetik
təhlil zamanı slaydlarla verilmiş sözlərə əsasən suallar
verirəm; sait səs nəyə deyilir? Samit səslərin neçə növü
var? Heca nəyə deyilir? Hecaların oxunuşu, sözlərin
oxunuşu və sair.
Qruplarla iş zamanı şagirdləri 6 qrupa bölüb şəkillərə
əsasən meyvələrin adını tapmaq, şirəli və quru meyvələri
ayırd etmək və hər hansı bir meyvə haqqında bildiyi
şeiri söyləməyi tapşırıram.
Dərs başa çatdıqdan sonra meyar cədvəlinə uyğun olaraq
qiymətləndirmə aparıram.
Məlahət DİLBAZOV,
Bakıdakı 83 nömrəli məktəb-liseyin ibtidai sinif
müəllimi |