Regionlarda "İstedadlı uşaqlar" respublika  müsabiqəsinə  2009-cu ildən start verilib.  Mədəniyyət və Turizm  Nazirliyinin təşkilatçılığı ilə  həyata keçirilən  bu tədbirlər xüsusi istedada malik olan uşaqların, gənclərin yaradıcılıq  potensiallarının üzə çıxarılmasına xidmət edir. 2009-cu ildə müsabiqəyə Bərdədə, 2010-cu ildə Kürdəmirdə, 2011-ci ildə Şirvanda, bu il isə Yevlaxda yekun vurulub. Dekabrın 6-da  Yevlaxda  Bəşir Səfəroğlu adına  Yevlax Xalq Teatrında baş tutan tədbirdə nazirliyinin məsul işçiləri  Pərviz İsgəndərli və Oqtay Muxtarov, mədəniyyət müəssisələrinin rəhbərləri  və rayon ictimaiyyəti  iştirak  edib.  Mərasimə Azərbaycanın müxtəlif bölgələrindən bədii qiraət, rəqs, rəssamlıq, aşıq musiqisi, muğam və mahnı, instrumental ifaçılıq üzrə 17 yaşınadək uşaq və yeniyetmələr qatılıblar. Tədbir iştirakçıları  əvvəlcə teatrın foyesində  müsabiqənin təsviri sənət üzrə qaliblərinin əl işləri ilə tanış olublar. Sonra isə uşaq və yeniyetmələrin ifasında  bədii qiraət, aşıq musiqisi, muğam və mahnı, instrumental ifaçılıq üzrə maraqlı konsert proqramı təqdim olunub.    

Sonda qaliblərə Mədəniyyət və Turizm  naziliyinin diplom və hədiyyələri təqdim edilib.  

Sifai SƏFƏROVA