Mən - Aslanzadə Nigar gənc müəlliməm. Bu il Təhsil Nazirliyinin müəllimlərin işə qəbulu məqsədilə keçirdiyi imtahanı uğurla verərək Bakı şəhər Sabunçu rayonu 188 nömrəli tam orta məktəbə kimya müəllimi qəbul olunmuşam.

Artıq 2012-ci ilin son günlərini yaşayırıq. 2012-ci il mənim üçün böyük ümidlərlə başlamışdı. Müəllimlərin işə qəbulunun imtahanla həyata keçirildiyini bildiyim və öz potensialıma bələd olduğum üçün il başlayanda ən böyük ümidim və hədəfim Bakı şəhərində işə qəbul olunmaq idi. Dövlətimizin öz vətəndaşlarının mənafeyinə yönəldilmiş məqsədyönlü, planlı siyasətin bir hissəsini təşkil edən müəllimlərin işə qəbulunun obyektiv şəkildə keçirilməsi sayəsində iyul ayında imtahan verərək öz hədəfimə çatdım. Mənimlə yanaşı bu il 188 nömrəli tam orta məktəbə daha 3 müəllim işə qəbul olunub.

Hazırda kimya, biologiya və həyat bilgisi fənnini tədris edirəm. İşlədiyim kollektivin, rəhbərliyin yeni-gənc müəllimlərə yanaşmasından, şagirdlərin təhsilə marağından çox razıyam. Bu cür iş şəraiti isə təbii olaraq peşəmə olan sevgimi, həvəsimi daha da artırır.

Qarşıdan yeni il gəlir. Yeni il yeni ümid, yeni hədəflər deməkdir. Qarşıdakı il üçün hədəfim Təhsil Kurikulumu üzrə təlim kurslarında təlimçi olmaqdır.

Biz təhsil işçiləri üçün təqvim ili bitməkdə olsa da, tədris ili davam edir. Özüm də daxil olmaqla bütün təhsil işçilərinə tədris ilinin uğurlu davamını və yeni müvəffəqiyyətlər dolu təqvim ili arzulayıram. 

Nigar ASLANZADƏ,
Bakıdakı 188 nömrəli  tam orta məktəbin müəllimi