|
Xəbər
verdiyimiz kimi, bu günlərdə təhsil naziri Misir
Mərdanov Azərbaycan Milli Valideyn-Müəllim
Assosiasiyasının (AMVMA) İdarə Heyətinin üzvləri ilə
görüşüb. Təhsil Nazirliyində keçirilən görüşdə AMVMA-nın
illik hesabatı dinlənilib, müvafiq istiqamətdə görülmüş
işlər və qarşıda duran məsələlərlə bağlı fikir
mübadiləsi aparılıb. Tədbirdə Təhsil Nazirliyinin şöbə
müdirləri, Bakı Şəhəri üzrə Təhsil İdarəsinin müdiri
Nailə Rzaquliyeva, Azərbaycan Milli Valideyn-Müəllim
Assosiasiyası İctimai Birliyinin icraçı direktoru Təranə
Şərifova, assosiasiyanın İdarə Heyətinin üzvləri iştirak
ediblər.
Görüşü təhsil naziri Misir Mərdanov açaraq Azərbaycan
Milli Valideyn-Müəllim Assosiasiyasının fəaliyyətindən
və bu təşkilatın valideyn-məktəb əlaqələrinin inkişafı
istiqamətində gördüyü işlərdən danışıb. VMA-nın zamanın
tələbi olduğunu vurğulayan nazir bildirib ki, bu qurumun
məqsədi uşağın təlim-tərbiyə prosesində maraqlı olan
bütün tərəfləri bir araya gətirərək onların səylərini
təhsilin keyfiyyətinin artırılmasına, təhsil sisteminin
təkmilləşdirilməsinə və məktəblərin inkişafına
yönəltməkdir.
AMVMA-nın son illər təhsilin inkişafı və valideyn-müəllim
münasibətlərinin səmərəli təşkili baxımından gördüyü
işlərə toxunan Misir Mərdanov əsas məqsədi valideynlərlə
müəllimlərin faydalı ünsiyyət mühitinin yaradılmasından
ibarət olan bu təşkilatın həyata keçirdiyi tədbirləri
müsbət qiymətləndirib. Nazir bildirib ki, Azərbaycanda
vətəndaş cəmiyyətinin qurulmasında, təhsilin
keyfiyyətinin artırılmasında, müəllim və məktəbin
nüfuzunun yüksəldilməsində tədris ocaqlarında fəaliyyət
göstərən Valideyn-Müəllim Assosiasiyalarının (VMA)
üzərinə mühüm vəzifələr düşür.
 Orta
məktəblərdə yaradılan VMA-ların uğurlu fəaliyyətindən
söz açan təhsil naziri bu sahədə nailiyyətlərin
qazanılmasında Azərbaycan Milli Valideyn-Müəllim
Assosiasiyasının icraçı direktoru Təranə Şərifovanın
əməyini yüksək qiymətləndirib. Son illər ərzində
Azərbaycanda təhsilin inkişafına dəstək olan təşkilatlar
içərisində AMVMA-nın xüsusi yer tutduğunu söyləyən Misir
Mərdanov təhsil ocaqları üzrə Valideyn-Müəllim
Assosiasiyalarının sayının getdikcə artmasını və onların
işinin günbəgün yaxşılaşmasını təqdirəlayiq hal kimi
dəyərləndirib.
Sonra Azərbaycan Milli-Valideyn Müəllim Assosiasiyası
İctimai Birliyinin icraçı direktoru Təranə Şərifova
rəhbərlik etdiyi təşkilatın fəaliyyəti barədə hesabat
məruzəsi ilə çıxış edib. Öncə keçirilən növbəti görüş və
AMVMA-nın fəaliyyətinə göstərilən dəstək üçün təhsil
naziri Misir Mərdanova təşəkkür edən T.Şərifova
valideynlər arasında maarifləndirmə işinin aparılmasının
zəruriliyinə toxunub. Deyib ki, valideynlərin məktəblə
əlaqəsinin zəif olması təlim-tərbiyə prosesinə mənfi
təsir göstərən əsas amillərdən biridir. O, son illər
AMVMA üzvlərinin sayının artdığını nəzərə çatdıraraq
rəhbəri olduğu qurumun həyata keçirdiyi layihələr və
təşkil etdiyi tədbirlər barədə məlumat verib.
T.Şərifova qeyd edib ki, ötən il ərzində Azərbaycan
Respublikası Ədliyyə Nazirliyi tərəfindən məktəblərdə
yaranan VMA-lar filial kimi qeydiyyatdan keçmişlər,
reqionlarda - Qazax, Şəmkir, Ağdaş Göyçay, Beyləqan,
İsmayıllı, Şamaxı, Ağdam, Mingəçevir və başqa rayon və
şəhərlərdə VMA-ların yeni təşəbbüs qrupları yaradılıb.
 Rəhbərlik
etdiyi təşkilatın tarixinə qısa ekskurs edən T.Şərifova
bildirib ki, Azərbaycan Valideyn-Müəllim Assosiasiyası
İctimai Birliyi Azərbaycan Respublikası Təhsil Nazirliyi
və YUNİSEF-in Azərbaycan üzrə nümayəndəliyinin təşəbbüsü
ilə proqram strukturu olaraq 2003-cü ildə yaradılmış,
ilk milli Konfransında təsis edilərək bir neçə pilot
məktəbində fəaliyyətə başlamışdır.
Valideynlərin məktəbə cəlb olunması, şagird-valideyn-müəllim
əməkdaşlığının təşkili nəticəsində təhsilin
keyfiyyətinin yüksəldilməsi və uşaqlar üçün yararlı
təhsil mühitinin formalaşdırılması missiyasını daşıyan,
ABŞ-ın müvafiq sahədə təcrübəsi modelinə əsaslanan VMA
ölkəmiz üçün əhəmiyyətli unikal platformadır.
Birliyin ali orqanı ümumi yığıncaq, cari rəhbər icra
orqanı icraçı direktor, müavinlər və digər şəxslərdən
ibarət olan İdarə Heyəti, nəzarət orqanı isə Nəzarət-Təftiş
Komissiyasıdır.
Qısa müddət ərzində birliyin fəaliyyət dairəsinin
genişləndiyini diqqətə çatdıran icraçı direktor
təşkilatın öncə pilot məktəblərdə, daha sonra şəhər və
rayonlarda ilk təşəbbüs qruplarını formalaşdırdığını,
valideyn və müəllimlərlə maarifləndirməni təşkil
etdiyini söyləyib. Bildirib ki, Təhsil Nazirliyinin və
YUNİSEF-in yaxından dəstəyi ilə fəaliyyət göstərən
ictimai birlik hər iki qurumun müvafiq istiqamətdəki
Fəaliyyət Planına uyğun olaraq öz işini təşkil etmiş,
fəaliyyətin səmərəliliyi və dövlət orqanı ilə əməkdaşlıq
üçün ictimai birliklə nazirlik arasında Əməkdaşlıq
Memorandumu imzalanmışdır.
 Qeyd
olunub ki, filiallar öz fəaliyyətlərini birliyin
Nizamnaməsi, filialın Ədliyyə Nazirliyi tərəfindən
təsdiq olunmuş vahid formalı Əsasnaməsi əsasında təşkil
edirlər.
Filialın yaradılması AMVMA İctimai Birliyinin İdarə
Heyəti tərəfindən qərara alındıqdan sonra sənədlər
müvafiq müraciətlə Dövlət Reyestrinə salınmaq üçün
Ədliyyə Nazirliyinə təqdim edilir və filialların Dövlət
Reyestrinə salınması haqqında müvafiq təsdiqedici
məktub birliyə daxil olduqdan və filial prezidentinin
təyin olunması haqqında icraçı direktorun əmrindən sonra
filial fəaliyyətə başlamaq üçün mərkəzin razılığı ilə
hüquqi prosedurlar həyata keçirir.
Azərbaycanda 2000-ə yaxın məktəbdə VMA və təşəbbüs
qruplarının yaradıldığını deyən T.Şərifova onların
valideynləri təlim-tərbiyəyə fəal cəlb etdiyini, onlar
üçün bir sıra istiqamətlər üzrə, həmçinin kurikulumla
əlaqədar maarifləndirmə işləri apardıqlarını, məktəbin
məzunları ilə sıx əlaqələr qurduqlarını nəzərə çatdırıb.
Bildirib ki, nəinki paytaxt və rayon mərkəzləri, eləcə
də kənd məktəblərində VMA-nın fəaliyyətinin müsbət
təzahürləri razılıqla qarşılanır, məktəb-valideyn
əlaqələrinin inkişafı istiqamətində valideynlərin
təşəbbüskarlığı müşahidə olunur.
Bununla yanaşı, icraçı direktor Bakının mərkəzi
məktəblərinin bir çoxunda hələ də VMA-ların
yaradılmamasını təəssüfedici hal hesab edib.
Qeyd edilib ki, birliyin Koordinasiya Şurasının
toplantılarında məktəblə ailə arasında müqavilə
işlənilib hazırlanıb. Bu müqavilənin təşəbbüskarları elə
valideynlər özləri olublar, çünki bu, hər iki tərəf üçün
faydalı sənəd ola bilər, hər iki tərəfin məsuliyyətini
artıra bilər. Sənəddə həm ailənin, həm də məktəbin
vəzifə və səlahiyyətləri əks olunub.
Azərbaycan Respublikası Təhsil Nazirliyi və YUNİSEF-in
"Məktəb uşağın dostudur" birgə layihəsini AMVMA İB-nin
bir neçə ildir ki, həyata keçirdiyinə diqqəti yönəldən
T.Şərifova 2012-ci ildə layihə çərçivəsində ümumtəhsil
məktəblərinin keyfiyyət standartları üzrə 300 məktəbin
monitorinq və qiymətləndirilməsinin aparıldığını və
görülən işin ekspertizasının nəticələrinin
hazırlandığını söyləyib. Bildirib ki, həmçinin layihə
çərçivəsində həmin 300 məktəbdə sağlamlığın vəziyyəti
öyrənilir, onlara sabun qabları və maye sabunlar
paylanılır, bu da məktəbdə keyfiyyətli təhsilə təsir
göstərən sağlam, uşaq və müəllimlər üçün yararlı mühitin
yaranması, onların hüquqlarının qorunması deməkdir.
T.Şərifova diqqətə çatdırıb ki, kurikulum islahatının
tətbiqi ilə əlaqədar Azərbaycan Milli Valideyn-Müəllim
Assosiasiyası İctimai Birliyinin İdarə Heyətinin üzvləri
son iki il müddətində respublikada müəllimlər üçün
keçirilən təlimlərin monitorinqini aparmışdır.
Təşkilatın keçirdiyi monitorinq nəticəsində müəyyən
edilib ki, 2012-ci ilin yayında aparılan təlimlər
standartlara uyğun, mütəşəkkil formada keçirilib və
bununla əlaqədar Azərbaycan Respublikası Təhsil
Nazirliyi və YUNİSEF-ə hesabat təqdim olunub.
Daha sonra icraçı direktor AMVMA-nın fəaliyyətinin
səmərəliliyinin artırılması üzrə mexanizmin hazırlanması
və orta məktəblərdə bu baxımdan həyata keçirilən
tədbirlərə diqqət çəkib. Təhsil islahatlarının
müəllimlərin və valideynlərin üzərinə qoyduğu ümdə
vəzifələrin düzgün təbliğində VMA-nın qarşısında duran
məsələlərin əhəmiyyətindən bəhs edən T.Şərifova nümunəvi
VMA-ların təcrübəsinin yayılmasının zəruriliyinə toxunub.
T.Şərifova çıxışının sonunda belə görüşlərin faydalı
olduğunu, valideynləri və ictimaiyyət nümayəndələrini
narahat edən məsələlərə, onların rəy və təkliflərinə
Təhsil Nazirliyi tərəfindən diqqətlə və operativ
yanaşıldığını vurğulayıb, VMA-ların fəaliyyətinə verdiyi
dəstəyə görə təhsil nazirinə minnətdarlığını ifadə edib.
T.Şərifova, həmçinin qarşılaşdıqları bəzi problem və
çətinliklərdən söz açıb, bir sıra təkliflərini nəzərə
çatdırıb.
Sonra söz İdarə Heyətinin üzvlərinə verilib. Bakı
şəhərindəki A.Novruzbəyli adına 46 nömrəli tam orta
məktəbin direktoru, əməkdar müəllim Sevinc Budaqova
rəhbərlik etdiyi təhsil ocağında VMA-nın 2004-cü ildən
yarandığını vurğulayıb, məktəbin idarə olunmasında,
bütün məsələlərin həllində VMA-nın rolu, hətta mühafizə
xidmətinin qurulmasında, natamam ailələrdən olan
uşaqlarla aparılan işdə VMA-nın dəstəyini qeyd edib,
müəllimlərin cəmiyyətdə nüfuzunun artırılması
məsələsində bu qurumların mühüm rolu olduğunu söyləyib.
Lənkəran şəhəri S.Kazımbəyov adına 6 nömrəli tam orta
məktəb-liseyin direktoru Akif Xalıqov ölkəmizdə təhsilə,
təhsil işçilərinə göstərilən qayğıdan danışıb, təhsilin
keyfiyyətinin yüksəldilməsi istiqamətində atılan
addımları yüksək dəyərləndirib. O, ölkə Prezidenti İlham
Əliyevin istedadlı uşaqlar barədə sərəncamına əsasən
məktəblərində VMA-nın yaxından iştirakı ilə keçirilmiş
şagirdlərin yaradıcı təfəkkürünün inkişafı üzrə
elmi-metodik konfransdan, 3 mərhələdən ibarət bilik
yarışlarından, fəal valideynlərin, məktəbətrafı icmanın
bu işlərdə rolundan söz açıb və valideynlər arasında
maarifləndirmə işinin daha da artırılması təklifini
irəli sürüb.
Bakı şəhəri 132-134 nömrəli təhsil kompleksinin
direktoru Sara Xanlarova çıxışında VMA-nın məktəbdə
mühüm rolunu, ailə-məktəb müqaviləsinin məktəbin idarə
olunmasında əhəmiyyətini, məktəbin işinin daha səmərəli
qurulması, valideynlərin VMA barəsində tam məlumatlı
olmaları, məktəb-ailə münasibətlərinin tam şəffaf
olmasının əsas məsələ olduğunu vurğulayıb, şagirdlərin
tədrisə marağının daha da artırılması üçün zəruri hesab
olunan bir sıra digər məsələlərə toxunub. S.Xanlarova
ictimaiyyətin mövcud istiqamətdə görülmüş işlərə dair
məlumatlandırılması üçün təbliğat işinin və valideyn-müəllim-məktəb
əməkdaşlığının gücləndirilməsi təklifini irəli sürüb.
Lənkəran şəhəri 8 nömrəli tam orta məktəbin direktoru
Aslan İbrahimov məktəbəqədər təhsillə əhatənin az olması,
məktəbə məcburi olaraq uşaqların evdən qəbulu, bunun da
onların sinifdə adaptasiyasını çətinləşdirdiyini qeyd
edib, kurikulumun tətbiqi ilə əlaqədar I sinfə qəbul
olunanların xüsusi hazırlığına, ilkin yaradıcılıq
təfəkkürünün inkişafına ehtiyac olduğunu vurğulayıb. Bu
işdə VMA-rın rolunun böyük olduğunu, müəllim-valideyn
münasibətlərinin əməkdaşlıq müstəvisi çərçivəsində
formalaşdığını qeyd edib. Fəal təlim prosesində
valideynlərin iştirakının danılmaz olduğunu söyləyən
A.İbrahimov məktəb bufetlərinin fəaliyyətinin səmərəli
təşkili haqda fikirlərini səsləndirib.
Birliyin milli məsləhətçisi Vəfa Məmmədova bu gün VMA-ların
fəaliyyətlərinin düzgün istiqamətdə getməsi, məktəbə,
VMA-lara, təhsili bilən cəmiyyət üzvlərinə daimi
ehtiyacın olması barədə danışıb. V.Məmmədova KİV-in
valideynlərin maarifləndirilməsində, onların kurikuluma
dair biliklərinin artırılmasında mühüm rolunu qeyd edib,
bu məqsədlə təhsil kanalının və Azərbaycan Milli
Valideyn-Müəllim Assosiasiyasının mətbuat orqanının
yaradılmasını təklif edib.
Təhsil Nazirliyinin Stratejı təhlil, planlaşdırma və
kadrların idarəolunması şöbəsinin müdiri, AMVMA İB-nın
İdarə Heyətinin üzvü Fərzəli Qədirov təhsil ocaqlarında
VMA-ların yaradılmasının əhəmiyyətindən danışıb,
onların məktəblərin idarə olunmasında rolunu xüsusi qeyd
edib. Məktəb idarəetməsində ictimai nəzarətin
gücləndirilməsinin təhsilin keyfiyyətinə müsbət təsirini
qeyd edən F.Qədirov VMA-lar vasitəsi ilə bir çox
məktəblərdə problemlərin aradan qaldırıldığını bildirib.
Lakin bütün bunlarla yanaşı, hələ də valideynlərin təlim-tərbiyə
prosesinin idarə olunmasına tam cəlb olunmamalarını
söyləyib və valideyn-məktəb münasibətlərinin düzgün
qurulması üçün bu istiqamətdə lazımi işlərin görülməsinə
diqqət yetirilməsini vurğulayıb. O, valideynin valideynə
daha çox təsir edə biləcəyini diqqətə çatdırıb.
Nazirliyin Kənd rayonları üzrə ümumi təhsil şöbəsinin
müdiri Aydın Əhmədov son illər VMA-lar yaranandan sonra
nazirliyə məktəblərlə bağlı daxil olan şikayətlərin
yarıbayarı azalmasını müsbət hal kimi qiymətləndirib.
Bütün məktəblərdə bu işin qurulmasının təhsil üçün
əhəmiyyətli olduğunu bildirib, bu qurumların təhsilin
keyfiyyətinin yüksəldilməsində, şagirdlərin
vətənpərvərlik ruhunda yetişməsində, valideynlərin
təhsil müəssisələrinin işinə daha yaxından cəlb
olunmasında böyük rol oynadığını söyləyib.
Təhsil Nazirliyinin İqtisadiyyat şöbəsinin müdiri Şahrza
Əliyev valideyn-məktəb əlaqələrinin daha səmərəli
təşkilinin, VMA-ların fəaliyyətində şəffaflığın
artırılmasının vacibliyini diqqətə çatdırıb.
Görüşdə söz alan 20 nömrəli məktəb-liseyin valideyni
Rafiq Ramazanov VMA-ların hüquqi bazasının möhkəmlənməsi
üçün filiallarının dövlət qeydiyyatından keçməsinin
VMA-ların fəaliyyətinə müsbət təkan verdiyini qeyd edib.
O, habelə mövcud VMA-ların müsbət təcrübəsinin
yayılması, onların yaranmasının kütləviliyə çevrilməsinə
ehtiyac olmadığı, fəal VMA-ların işini təkmilləşdirmək,
qücləndirmək lazım gəldiyini, bununla da bu modelin
məktəbə lazım olduğunu, hələ qoşulmayan məktəblərə
nümayiş etdirməyin zərurəti barədə danışıb.
Görüşün sonunda Azərbaycan Milli Valideyn-Müəllim
Assosiasiyasi İctimai Birliyinin İdarə Heyəti müvafiq
qərar qəbul edib. Qərarda AMVMA-nın mətbu orqanının nəşr
olunması, təhsil kanalının açılması ilə əlaqədar
müvafiq qurumlara müraciət edilməsi, ailə-məktəb
müqaviləsinin işlənilib hazırlanması və Azərbaycan
Respublikasının Təhsil Nazirliyinə təqdim olunması,
kurikulumun tətbiqi ilə əlaqədar valideynlər arasında
maarifləndirmə işlərinin aparılması, təhsil nazirinin
valideynlərlə növbəti görüşünün 2013-cü ilin yanvar
ayında keçirilməsi nəzərdə tutulub.
Yusif ƏLİYEV |
