|
"2008-2012-ci illərdə Azərbaycanda təhsil sisteminin
informasiyalaşdırılması üzrə Dövlət Proqramı"
çərçivəsində paytaxtın ümumi təhsil müəssisələrində bir
çox işlər görülmüş, uğurlu layihələr həyata
keçirilmişdir.
Bakıdakı 9 nömrəli tam orta məktəbin direktoru Zinyət
Əhmədova bildirdi ki, müəllimlərin İKT üzrə
hazırlığına xüsusi diqqət verməklə təhsilin
informasiyalaşdırılmasının yüksək effektivliyini təmin
etmişik. Bu prosesə sistemli yanaşma
vacibdir və buna görə də biz yalnız təlimlərlə
məhdudlaşmırıq. Müəllimlərimiz mərkəzləşdirilmiş
İnternet şəbəkədən, o cümlədən İKT vasitəsilə elektron
dərsliklərdən bacarıqla istifadə edirlər.
51 nömrəli tam orta məktəbin direktoru
Lətafət Səmədova qeyd etdi ki,
İKT daimi inkişafdadır və texniki vasitələr, proqram
həlləri həmişə yenilənməkdədir. Tədrisin
effektivliyinin artırılmasında və İKT sahəsində
biliklərinin daha da dərinləşməsində
müəllimlər böyük səylə çalışırlar.
104 nömrəli tam orta məktəbin direktoru Kərəm
Mehdiyev rəhbərlik etdiyi məktəbin İnternet
şəbəkəyə qoşulmasını vurğuladı. Dedi ki, müəllimlərin
informasiya texnologiyaları üzrə biliklərinin
artırılması tədris prosesinin daha effektiv
qurulması deməkdir. Bütün bunları
nəzərə alaraq müəllimlərin davamlı olaraq İKT üzrə
biliklərinin artırılması zəruridir. Ona görə də
müəllimlərimizin çoxu təlim kurslarından keçməklə
İKT biliklərinə dərindən yiyələniblər.
111 nömrəli tam orta məktəbin direktoru Jalə
Hacıyeva bildirdi ki, Dövlət Proqramı çərçivəsində
görülmüş işlər onu göstərir ki, məktəbdə İKT
avadanlıqlarının sayının artması və bu avadanlıqlardan
istifadə tədrisin keyfiyyətinə böyük təsir göstərib.
Hazırda şagirdlərimiz kompüterlərdən istifadə
edərək İnternetə daxil olub mövcud İnternet
resurslarından bacarıqla istifadə edirlər.
175 nömrəli tam orta məktəbin direktoru Qələndər
Qələndərov isə bildirdi ki, bu gün İKT-dən istifadə
etməklə müasir təhsil modelinin həyata keçirilməsi
məktəbimizin müəllim heyəti qarşısında yeni tələblər
qoyur. Fənn müəllimlərimiz konkret
öyrətdikləri fənnin struktur məzmununa və
məqsədinə uyğun şagirdlərin fərdi xüsusiyyətlərini
nəzərə almaqla İKT biliklərini həvəslə öyrədirlər.
Şakir CƏFƏROV |
