|
Bütün
dövrlərdə müəllimlik peşəsi müqəddəs və şərəfli bir peşə
hesab edilib. Bu peşənin sahibləri gənclərimizin gələcək
həyatının təməlini möhkəmləndirir, şagirdlərin elmə,
biliyə yiyələnməsi üçün əzmlə çalışırlar. Bu yaxınlarda
yolum Şirvan şəhərinə düşmüşdü. Şirvan şəhər 4 nömrəli
tam orta məktəbə Azərbaycan Respublikasının Prezidenti
cənab İlham Əliyevin sərəncamı ilə "Ən yaxşı ümumtəhsil
müəssisəsi" adı verilməsi haqqında məlumatım var idi.
Buna görə də həmin məktəbə yollandım. Məktəbin girişində
4 şagirdin böyük bir həvəslə şeir söyləmələrinin şahidi
oldum. Onlara yaxınlaşaraq öyrəndim ki, məktəbin fəal
şagirdlərindən olan Nəzrin Zeynalova, Xavər Məmmədyarlı,
Günay Məmmədova və Əli Xudiyev hər gün dərs başlamazdan
əvvəl birlikdə əzbərlədikləri şeirləri təkrarlayırlar.
Əlbəttə, şagirdlərin belə məsuliyyətli olması məni
ruhlandırdı. Məktəbin foyesinə daxil olanda buradakı
səliqə-sahman nəzərimi cəlb etdi. Geniş və işıqlı
otaqlar müasir avadanlıqlarla təchiz olunmuşdur.
Məktəbin direktoru Gülmirzə Həsənovla səmimi söhbətə
başladıq. O, həqiqətən, öz peşəsini ürəkdən sevən,
qiymətləndirən ziyalı bir şəxsdir. Gülmirzə Həsənov
Təhsil Nazirliyi tərəfindən sertifikat və fəxri fərmanla
təltif olunmuşdur. Şirvan Şəhər İcra Hakimiyyətinin
rəhbərliyi, Şirvan Şəhər Təhsil Şöbəsinin müdiri
mütəmadi olaraq məktəbə gəlir, tədris ocağının
fəaliyyəti ilə maraqlanır və Gülmirzə müəllimin işindən
razılıq edirlər.
Onu da qeyd edək ki, 4 nömrəli tam orta məktəbin kimya
müəllimi Şamama Yolçıyeva 2011-ci ildə "Ən yaxşı
müəllim" müsabiqəsinin qalibi olub. Son 2 ildə məktəbin
5 məzunu müxtəlif fənlər üzrə keçirilən olimpiadada
respublika turunda iştirak etmiş və qalib yerləri
tutmuşlar. 2011-ci ildə kimya fənni üzrə Zülfi Cabbarov,
biologiya fənni üzrə Yaqub Mehrəliyev, 2012-ci ildə
Azərbaycan tarixi fənni üzrə Aysel Baxşıyeva,
dil-ədəbiyyat fənni üzrə Gülnarə İsmayılova, kimya fənni
üzrə Ələddin Baxşiyev qalib yerləri tutmuşdular.
Həmçinin son iki ildə məzunlardan Ülkər Bağırova 263 bal
toplayaraq BDU-ya, Nuranə Məmmədova 666 balla Azərbaycan
Tibb Universitetinə, Bəhruz Şıxəliyev isə 514 balla
Azərbaycan Dillər Universitetinə daxil olmuşlar.
Səadət VƏFALI |
