|
Qəbələ Rayon Təhsil Şöbəsindən aldığımız məlumatda
bildirilir ki, rayonda məktəblər üçün yeni binaların
inşası və ya onların əsaslı təmiri, maddi-texniki
bazasının gücləndirilməsi istiqamətində mühüm işlər
görülür. Təhsil Nazirliyinin sifarişi ilə hazırda
rayonun Kiçik Pirəlli kənd məktəbi üçün 180 şagird
yerlik yeni binanın inşası sürətlə davam etdirilir.
Artıq binanın hörgü işləri başa çatdırılmış, dam
örtüyü, qapı-pəncərələri quraşdırılmışdır. Binaların
fasad hissəsində və otaqlarında rənglənmə, döşəmələrdə
metlax işləri görülür. Məktəbin yeni dərs ilində
istifadəyə verilməsi nəzərdə tutulur. İki ay bundan
əvvəl Qəbələnin Nic qəsəbəsində 360, Tola kəndində 180,
Topbağ və Solqıca kəndlərində 80 şagird yerlik yeni
məktəb binaları, Vəndam qəsəbəsində isə əsaslı təmir
olunmuş 1 nömrəli məktəbin binası müəllim və şagirdlərin
istifadəsinə verilmişdir.
Ümumiyyətlə, son illər regionların sosial-iqtisadi
inkişafı Dövlət Proqramı çərçivəsində və Heydər Əliyev
Fondunun təşəbbüsü ilə rayonda 20 məktəb binası tikilmiş
və 4 məktəb binası isə əsaslı təmir olunmuşdur.
Şakir CƏFƏROV |
