|
Dövlətimizin təhsil və gənclər siyasətində azərbaycanlı
gənclərin xarici ölkələrdə təhsil almağa göndərilməsi
mühüm istiqamətlərdən birini təşkil edir. Bu məqsədlə
Azərbaycan Respublikası Prezidentinin müvafiq sərəncamı
ilə "2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı" təsdiq olunmuş
və artıq 6-cı ildir ki, icra edilməkdədir.
Dövlət Proqramı çərçivəsində xaricdə təhsil almaq hüququ
qazanan gənclərin sayı ildən-ilə artır. Əgər proqramın
icrasına başlandığı 2007-2008-ci dərs ilində bu hüququ
66 nəfər gənc qazanmışdırsa, 2008-2009-cu dərs ilində
belələrinin sayı 134, 2009-2010-cu dərs ilində 308,
2010-2011-ci dərs ilində 275, 2011-2012-ci dərs ilində
isə 433 nəfər olub. Cari dərs ilində isə Dövlət Proqramı
çərçivəsində xaricdə təhsil almağa gedənlərin sayı
əvvəlki illərə nisbətən xeyli artaraq 608 nəfər təşkil
edib. Ümumiyyətlə, Dövlət Proqramının qəbulundan keçən 6
il ərzində 1824 nəfər azərbaycanlı gənc dövlət vəsaiti
hesabına xaricdə təhsil almağa göndərilib. Onlar
dünyanın 27 ölkəsinin ən nüfuzlu ali məktəblərində
təhsil alıblar və ya almaqdadırlar.
Bu sahədə üstünlük Böyük Britaniyaya məxsusdur.
İndiyədək 419 azərbaycanlı gənc məhz bu ölkənin ali
məktəblərini seçmişdir. İkinci yeri Türkiyə (366 nəfər),
üçüncü yeri isə Almaniya (355 nəfər) tutur.
Y.ƏLİYEV |
