|
Təhsil Nazirliyinin Təhsil Sisteminin
İnformasiyalaşdırılması İdarəsindən aldığımız məlumatda
bildirilir ki, təhsil sisteminin pedaqoji heyəti tədris
prosesində informasiya-kommunikasiya texnologiyalarından
(İKT) effektiv istifadə edilməsi üçün mövcud 2 kurikulum
- Rİ-SOL "Müəllimlərin peşəkarlıq səviyyəsinin
təkmilləşdirilməsi" və İntel "Gələcək üçün təhsil" təlim
vəsaitləri əsasında treninqlərdən keçir.
Bununla müəllimlər şəxsiyyətyönümlü, interaktiv və
inteqrativ təlim metodları haqqında biliklər qazanır və
texnologiyaları sinifdə gedən tədris prosesinə necə
tətbiq etməyi öyrənirlər. Rİ-SOL "Müəllimlərin
peşəkarlıq səviyyəsinin təkmilləşdirilməsi" təlim
vəsaitlərinin istiqamətləri bunlardır: Fikir yürütmə -
şagirdlərin təliminin texnologiya ilə əlaqələndirilməsi,
Kompüter və idrak - Blum taksonomiyası, Birgə məlumat
bülleteninin yaradılması, fənlərarası dərsin
planlaşdırılması və s.
İntel "Gələcək üçün təhsil" proqramı ümumtəhsil və ali
pedaqoji müəssisələri müəllimlərinin tədris prosesində
İKT-dən səmərəli istifadə etmələri üçün treninq
vəsaitidir. Treninq proqramı çərçivəsində hər modulda
müəllimlər öz tədris layihələri üzərində işləyirlər.
"Gələcək üçün təhsil" təlim proqramının nəticəsində
müəllimlər tərəfindən bu sənədləri özündə əks etdirən
portfolio yaradılır: Şagird multimedia təqdimatı, nəşr
və veb-sayt; Qiymətləndirmə formaları və meyarları;
Müəllimlər üçün metodik materiallar; Layihə reallaşdırma
planı və s.
Adıçəkilən təlim vəsaitləri üzrə 82 min 370 müəllimə
təlimlər keçirilmişdir.
Bakı, Mingəçevir şəhərləri, Lənkəran, Balakən, Zaqatala,
Masallı, Lerik, Astara, Oğuz, Tovuz, Ağsu, Daşkəsən,
Gədəbəy, İmişli, Zərdab, Füzuli, Kürdəmir, Qəbələ,
Yevlax, Tərtər, Bərdə, Beyləqan, Ağcabədi, Göygöl,
Ağstafa, Ağdaş, Qazax, Şəki, Xaçmaz, Quba, Qusar,
Biləsuvar, Ucar, Cəlilabad, Goranboy, Göyçay, Şəmkir,
Samux rayonları üzrə 100 müvafiq təlim mərkəzi
yaradılmışdır.
Qeyd edilən təlim vəsaitləri əsasında ali və orta
ixtisas təhsili müəssisələrində 1000 nəfərədək pedaqoji
heyət üçün təlim kursları reallaşdırılmışdır.
Şakir CƏFƏROV |
