2013-cü il yanvarın 29-da Xalq Təhsili Muzeyində
Azərbaycan Respublikası Təhsil Şurası, "Azərbaycan
məktəbi" jurnalının redaksiyası və Xalq Təhsili
Muzeyinin birgə təşkilatçılığı ilə tanınmış təhsil
xadimi, alim, naşir, tərcüməçi Zəhra Cabbar qızı
Əliyevanın anadan olmasının 85 illiyinə həsr edilmiş
yığıncaq keçirilib.
Tədbirdə Azərbaycan Respublikası Təhsil Nazirliyinin
əməkdaşları, tanınmış pedaqoq alimlər, publisistlər,
təhsil işçiləri, Z.Əliyevanın ailə üzvləri, KİV
nümayəndələri iştirak ediblər.
Tədbiri giriş sözü ilə açan respublika Təhsil Şurasının
sədri, pedaqoji elmlər doktoru, professor Ə.Ağayev 60
ildən artıq pedaqoji sahədə çalışmış mahir pedaqoq,
təhsilimizin inkişafında böyük xidmətləri olan
prinsipial insan, ləyaqətlilik, sadəlik, təvazökarlıq
mücəssəməsi Zəhra xanım Əliyevanın yüksək insani
keyfiyyətlərindən danışaraq onun keçdiyi həyat yolu və
fəaliyyəti barədə məlumat verib. "Azərbaycan məktəbi"
jurnalının baş redaktoru, filologiya üzrə fəlsəfə
doktoru N.Nəcəfov "Zəhra Əliyeva - təhsil xadimi, alim,
naşir, jurnalist" mövzusunda geniş məruzə ilə çıxış
edib.
Təhsil Nazirliyinin Tərbiyə və məktəbdənkənar
müəssisələrlə iş şöbəsinin müdiri A.İbrahimov, Xalq
Təhsili Muzeyinin direktoru L.Bayramova, respublikanın
əməkdar müəllimləri A.Muradov, A.Təhmasib, Azərbaycan
Müəllimlər İnstitutunun kafedra müdiri, pedaqoji elmlər
doktoru, professor M.Həsənov, ADPU-nun pedaqoji
fakültəsinin dekanı, pedaqoji elmlər doktoru, professor
F.Rüstəmov, Bakı şəhər 177 nömrəli tam orta məktəbin
direktoru H.Məmmədova və b. Zəhra Əliyeva ilə bağlı
xatirələrindən söz açdılar.
Sonda çıxış edən Z.Əliyevanın qızı Sevda Zamanova
tədbirin təşkilatçıları və iştirakçılarına ailə üzvləri
adından təşəkkürünü bildirib.
Tədbirin sonunda qonaqlar Z.Əliyevanın Xalq Təhsili
Muzeyində saxlanılan materialları, müəllifi olduğu
dərslik, tədris vəsaitləri əsasında təşkil olunmuş sərgi
ilə tanış olublar.
R.ZİYADOV |