|
 Bu
il Azərbaycan məktəbliləri "Bebras" (Qunduz) İnformatika
üzrə beynəlxalq onlayn müsabiqədə iştirak edəcəklər.
"Bebras" müsabiqəsi ideyası Litvada professor Valentina
Decien tərəfindən beynəlxalq təşəbbüs kimi irəli sürülüb
və ilk müsabiqə 2004-cü ildə Litvada keçirilib.
Hazırda "Bebras" müsabiqəsində 21 üzv ölkə (Avstriya,
Kanada, Estoniya, Fransa, Macarıstan, Yaponiya, Litva,
Polşa, Sloveniya, İsveçrə, Ukrayna, Bolqarıstan, Çex
Respublikası, Finlandiya, Almaniya, İtaliya, Latviya,
Niderland, Slovakiya, İsveç, Tayvan) iştirak edir.
İsrail, Rusiya, Kipr Respublikası, ABŞ, Böyük Britaniya,
İspaniya kimi dövlətlərdə də müsabiqənin keçirilməsi
nəzərdə tutulur. Azərbaycan adıçəkilən müsabiqəyə
2013-cü ildə qəbul olunub.
"Bebras" müsabiqəsinin fəaliyyəti Bebras üzrə Beynəlxalq
Komitə tərəfindən koordinasiya edilir. "Bebras"
müsabiqəsinin keçirilməsində əsas məqsəd informasiya və
kommunikasiya texnologiyaları sahəsinə marağın
artırılması, eləcə də informatika fənninin bütün
məktəblilər üçün əsas elm sahəsinə çevrilməsinə xidmət
etməkdən ibarətdir. Müsabiqə uşaqlarda ibtidai sinifdən
kompüter biliklərinə yiyələnməyə, İKT-nin tətbiqinə
köməklik göstərməyə, tədris prosesində uşaqlara müasir
texnologiyalardan intensiv və yaradıcı istifadə etməyə
yönəlib.
"Bebras" müsabiqəsinin əsas prinsipləri bütün dünyada
məşhur olan "Kangaroo" riyaziyyat yarışmasından
götürülüb. "Bebras"ın "Kangaroo"dan fərqi ondadır ki,
"Bebras" tam kompüterləşmiş və İnternet vasitəsilə
onlayn rejimdə keçirilən bir müsabiqədir.
 Müsabiqə
İnternetə çıxışı olan məktəblərin kompüter siniflərinin
bazasında və ya uşaqlarda İnternetə çıxışı olan şəxsi
kompüter olduğu halda keçirilir. Məktəb təşkilatçıları
ilə əlaqə sayt və ya elektron ünvan vasitəsilə aparılır.
Nəticələr hər yaş qrupu üzrə ayrıca aparılır. Müsabiqədə
ümumi təhsil və peşə təhsili müəssisələrinin şagirdləri
iştirak edə bilər. İştirakçılar 3-4, 5-6, 7-8 və 9-10-cu
siniflər üzrə bölünür.
Yarışdan sonra hər bir iştirakçı şəxsi qeydiyyat
vəsiqəsi ilə müsabiqənin saytına daxil olaraq
nəticələrlə tanış ola bilər. Qaliblər diplom və
hədiyyələrlə mükafatlandırılır. Daha çox iştirakçı cəlb
etmiş məktəblər, fəal məktəb təşkilatçıları fəxri fərman
və hədiyyələrlə təltif olunur. Müsabiqənin finalı noyabr
ayında baş tutacaq.
Lamiyə ƏLİYEVA |
