|
Rusiyanın Azərbaycanlı Gənclər Birliyinin (RAGB) Lipetsk
vilayətindəki bölməsi qurumun sədri Leyla xanım
Əliyevanın təşəbbüsü ilə növbəti xeyriyyə tədbiri
keçirmişdir. RAGB-in nümayəndələri bu dəfə Lipetsk
şəhərindəki 2 nömrəli internat-məktəbə getmişlər.
AzərTAc xəbər verir ki, uşaqlara Heydər Əliyev Fondu
adından gözəl hədiyyələr paylanmışdır. RAGB-in üzvləri
məktəbin yetirmələri ilə birlikdə mahnı oxumuş, rəqs
etmişlər. Sonra uşaqlara oriqami üzrə maraqlı ustad
dərsi keçirilmişdir.
Xoşbəxtlik, məhəbbət, sağlamlıq və dostluq rəmzi olan
kağız durnanın hazırlanması üzrə ustad dərs böyük
müvəffəqiyyətlə keçmişdir. Uşaqlar xüsusi səylə
hazırladıqları durnaları dostluq əlaməti olaraq
bir-birinə bağışlamışlar.
Səmimi qəbul və gözəl əhvali-ruhiyyə heç kəsi biganə
qoymamışdır. Uşaqlara cansağlığı və təhsildə
müvəffəqiyyətlər arzulayan RAGB-in üzvləri ümidvar
olduqlarını bildirmişlər ki, bu il internat-məktəbin
yetirmələri üçün uğurlu olacaqdır. |
