|
Fevralın 20-də Bakıdakı 152 nömrəli tam orta məktəbdə
"Öyrədənləri öyrədən" statusu almış təlimçilərin
fəaliyyətlərinə nəzarət və aparılan işlərin nəticələrinə
dair tədbir keçirildi.
 Tədbirdə
Təhsil Nazirliyinin Kənd rayonları üzrə ümumi təhsil
şöbəsinin müdiri Aydın Əhmədov, Bakı Şəhəri üzrə Təhsil
İdarəsinin sektor müdiri Firudun Həmzəyev, paytaxtın
Nizami, Nərimanov, Nəsimi rayonlarının məktəb
direktorları, təlimçilər, müəllim, metodist və
məsləhətçilər iştirak edirdilər. Qeyd edək ki, təhsil
naziri Misir Mərdanovun "Öyrədici təlim kurslarının
təşkili barədə" müvafiq əmrinə əsasən "Kurikulum
islahatının davam etdirilməsi və kurikulumun tətbiqinə
dəstək" məqsədilə 2010-cu ildən təlimlər keçirilmiş və
Bakı şəhəri üzrə təşkil edilən 10 günlük öyrədici təlim
kursunda məktəb rəhbərləri, müəllim, metodist və
məsləhətçilərdən ibarət 230 nəfər təlimçi hazırlanmış və
onlara Təhsil Nazirliyi tərəfindən müvafiq sertifikatlar
verilmişdir. Tədbirin məqsədi məhz həmin təlimçilərin
yerlərdə apardığı işləri və bununla bağlı yaranan
problemlərin aradan qaldırılması yollarını müzakirə
etmək idi.
Tədbiri giriş sözü ilə açan Təhsil Nazirliyinin Kənd
rayonları üzrə ümumi təhsil şöbəsinin müdiri Aydın
Əhmədov qeyd etdi ki, 2010-cu ildən bu işin sistemli
şəkildə aparılmasına başlanılmış, yerlərdə istinad
mərkəzləri və dayaq məntəqələri yaradılmışdır. Yeni
təhsil proqramlarının, kurikulumların tətbiqi
vəziyyətini yoxlamaq məqsədilə respublikanın 8 rayonunda
təqribən 50 məktəbdə ibtidai siniflərdə monitorinqlər
aparıldığını və bir çox müsbət nəticələr əldə olunduğunu
bildirən A.Əhmədov bütün bunlara baxmayaraq müəyyən
problemlərin də olduğunu nəzərə çatdırdı. Tədbirin
keçirilməsində məqsədin məhz mövcud problemlərin aradan
qaldırılması, təlimçilərin fəaliyyətlərinin daha da
səmərəli şəkildə gücləndirilməsi olduğunu nəzərə
çatdırdı. Şöbə müdiri paytaxtın müxtəlif rayonları üzrə
BŞTİ tərəfindən təyin olunmuş metodist və
məsləhətçilərin planlı şəkildə ilboyu bu işdə fəallıq
göstərmələrinin, müxtəlif məktəblərdə ustad və nümunə
dərslərinin təşkil olunmasının, məktəb rəhbərlərinin
məsələ ilə bağlı nəzəri və pedaqoji aspektdən
biliklərinin daha yüksək olmasının vacibliyini bildirdi.
Tədbirdə çıxış edən BŞTİ-nin sektor müdiri Firudun
Həmzəyev, BŞTİ Metodik Mərkəzin direktor müavini Sitarə
Məmmədova və başqaları görülən işlərdən danışdılar.
Mövzu ətrafında geniş müzakirələr aparıldı. Bir sıra
təkliflər irəli sürüldü.
Niyazi RƏHİMOV |
