|
 Fevralın
19-da Azərbaycan Dövlət Akademik Milli Dram Teatrında
Bakı Şəhəri üzrə Təhsil İdarəsinin təşkilatçılığı ilə
Azərbaycan tarixi fənn aylığının yekun konfransı
keçirildi. Konfransda BŞTİ-nin, AMEA-nın, ali
məktəblərin nümayəndələri, millət vəkilləri və digər
qonaqlar iştirak edirdilər.
Dövlət himni səsləndirildikdən sonra tədbiri giriş sözü
ilə Bakı Şəhəri üzrə Təhsil İdarəsinin müdiri,
respublikanın əməkdar müəllimi Nailə Rzaquliyeva
açaraq bildirdi ki, paytaxtın ümumtəhsil məktəblərində
indiyə kimi maraqlı silsilə tədbirlər keçirilmişdir.
"Tariximiz-dünənimiz, bugünümüz və gələcəyimizdir" adlı
Azərbaycan tarixi fənn aylığının yekununa dair konfrans
da belə tədbirlərdən biridir.
N.Rzaquliyeva qeyd etdi ki, Azərbaycan tarixinin şanlı
səhifələrini bir daha vərəqləmək, tarixin qaranlıq
səhifələrinə işıq salmaq, gənclərdə vətənpərvərlik,
dövlətə sədaqət ruhu formalaşdırmaq baxımından keçirilən
bu cür tədbirlər böyük əhəmiyyətə malikdir. Dörd
nominasiya üzrə keçirilən müsabiqədə 500 "açıq dərs"
dinlənilib, 1200-dən artıq müəllim və şagirdin yaradıcı
işi, referat və metodiki işi təhlil olunub və 300
metodiki guşəyə baxış keçirilib.
Müsabiqənin yekunundan söz açan N.Rzaquliyeva
çıxışının sonunda qalibləri təbrik etdi.
Tədbirdə müsabiqənin qalibi olan ayrı-ayrı məktəblərin
müəllimləri ilə yanaşı, həm də şagirdlərə I, II. III
dərəcəli diplom, nominasiyalar üzrə fəallığı ilə
seçilən iştirakçılara isə həvəsləndirici diplom və
hədiyyələr təqdim edildi.
Tədbirdə iştirak edən Milli Məclisin deputatı Ziyad
Səmədzadə, AMEA-nın vitse-prezidenti Nailə Vəlixanlı,
Təhsil Problemləri İnstitutunun direktoru, professor
Abdulla Mehrabov və başqaları fənn aylığına həsr
olunmuş bu tədbiri yüksək qiymətləndirərək bilik
yarışmasında qalib çıxanları təbrik etdilər.
Sonda istedadlı şagirdlərin ifasında musiqili ədəbi-
bədii kompozisiya nümayiş etdirildi.
Şakir CƏFƏROV |
