|
Təhsilin keyfiyyətinin yüksəldilməsində, fənn
müəllimlərini tədris prosesində yaradıcı fəaliyyətə
təşviq etməkdə, qabaqcıl təcrübənin nümayişi və
təbliğində fənn aylıqları mühüm rol oynayır. Bu imkanlar
nəzərə alınaraq son illər fənn aylıqlarının təşkilinə
diqqət artıb. Rayonumuzda da belə aylıqlar vaxtaşırı
keçirilir.
 Bu
baxımdan Şuşa Rayon Təhsil Şöbəsinin müvafiq əmri ilə
yanvarın 15-dən fevralın 15-dək rayonun məktəblərində
"Azərbaycan tarixi fənn aylığı" elan olunub. Aylıq
çərçivəsində rayonun bütün təhsil ocaqlarında olduğu
kimi, Şuşa şəhər 12 nömrəli tam orta məktəbdə də silsilə
metodik tədbirlər həyata keçirilib. Məktəbin tarix
müəllimi Elçin Dadaşov bu işlərdə xüsusilə fərqlənib.
O, məktəbdə fənn aylığı elan olunan gündən bir sıra
maraqlı tədbirlərin təşəbbüsçüsü olub. Onun rəhbərliyi
ilə məktəbin şagirdləri "Tariximizi unutmayaq" adlı fənn
bülleteni, "Tariximizin səhifələri" adlı divar qəzeti
çıxarmışlar. E.Dadaşov V-XI siniflərdə test yoxlamaları
keçirmiş, 2012-ci il dekabrın 25-də vətənpərvərlik
mövzusunda keçirilən "Vətən qəhrəmanları ilə tanınır"
adlı tədbirin davamı olaraq and yerimiz olan Şəhidlər
xiyabanına, general Həzi Aslanovun abidəsinə şagirdlərin
ziyarətini təşkil etmişdir.
"Müstəqil Azərbaycan", "Azərbaycanımızın tarixi keçmişi,
bu günü və gələcəyi", "Doğma Qarabağ" mövzularında
şagirdlərlə mühazirələr və söhbətlər aparmışdır.
Şagirdlərin Tarix muzeyinə, "Bayraq meydanı"na,
İçərişəhərə gəzintiləri onların dünyagörüşündə dərin iz
buraxmışdır.
Bu tədbirlərin davamı olaraq E.Dadaşov yanvarın 22-də
VII sinifdə "Sacilər dövləti" mövzusunda "açıq dərs"
keçdi. Şuşa Şəhər Təhsil Şöbəsinin məsul işçiləri
Ə.Əbdüləzimov, C.Məmiyev, R.Məmmədova, G.Məmmədova,
rayon məktəblərinin tarix müəllimlərindən Z.Məmmədova,
S.Əliyeva, N.Mahmudova, A.Abdullayeva, E.Ağamalıyev
dərsdə iştirak edirdilər.
Qabaqcıl müəllim bu fikirdədir ki, müasir tədris
proqramları şagirdləri müstəqil düşünməyə, sərbəst fikir
söyləməyə, problemlərdən çıxış yollarını axtarmağa, öz
ideyalarını arqumentlərlə sübut etməyə, başqasının
fikrinə dözümlü olmağa, yeni pedaqoji təfəkkürə
yiyələnməyə sövq edir.
Təhlil zamanı aydın oldu ki, müəllim dərsin gedişində
şagirdlərin imkan və potensiallarını nəzərə ala bildi.
Bu isə onları tədqiqatçılıq işləri aparmağa ruhlandırdı.
Nizam-intizam qaydaları gözlənildi. Qrupdakı şagirdlərin
birgə fəaliyyəti, əməkdaşlıq etmələri zamanı onlar
bir-birinə səmimi yanaşdılar, eyni zamanda sərbəst
olaraq fikirlərini bildirməyi bacardılar.
Dərsdə şagirdlərdən D.Cabbarlı, N.İbrahimov, A.Vəlizadə,
E.Cabbarlı, A.Əbdüləzimova, B.Qasımova daha çox fəallıq
göstərdilər.
Çıxış edən müəllimlər dərsdən razı qaldıqlarını
bildirdilər.
Nazilə ƏZİZOVA,
Şuşa şəhər 12 nömrəli orta məktəbin təlim-tərbiyə işləri
üzrə direktor müavini,
Azərbaycan Respublikasının qabaqcıl təhsil işçisi |
