|
Beynəlxalq fənn olimpiadalarının qalibləri
Təhsil ictimaiyyətimizi hər il beynəlxalq fənn
olimpiadalarındakı qələbələri ilə sevindirən "Çağ"
Öyrətim İşlətmələri Şirkəti Azərbaycan - Türkiyə özəl
liseylərinin şagirdləri ötən ilin dekabrı və bu ilin
yanvarında növbəti uğurlara imza atmışlar. Belə ki,
liseylərin 4 şagirdi 2012-ci il 1-10 dekabr tarixlərində
İran İslam Respublikasının paytaxtı Tehran şəhərində
keçirilmiş Beynəlxalq təbiət elmləri olimpiadasında,
daha 4 nəfər şagird isə bu il yanvarın 13-dən 20-dək
Qazaxıstanın Almatı şəhərində təşkil olunmuş Beynəlxalq
Jautikov fizika-riyaziyyat və informatika olimpiadasında
qələbə qazanaraq bu təhsil ocaqlarının 20 illik
tarixində mötəbər bilik yarışlarında əldə olunmuş
medalların sayını artırmışlar. Həm təhsil aldıqları
liseylərin kollektivlərinə, həm də təhsil
ictimaiyyətimizə sevinc bəxş edən həmin şagirdlərin üçü
haqqında qəzetimizin ötən saylarının birində məlumat
vermişdik. Aşağıda isə daha dörd nəfər olimpiada
medalçısını təqdim edirik.
Üçüncü cəhd medalla nəticələndi
 Olimpiada
qalibləri olan şagirdlər haqqında yazı hazırlamaq üçün
bu günlərdə onların növbəti bilik yarışlarına
hazırlaşdıqları Bakı Özəl Türk Liseyinə yollandıq.
Bilirdik ki, müsahibimiz olacaq şagirdlər yuxarı
siniflərdə təhsil alırlar. Gəncliyin astanasında olan
yuxarı sinif şagirdləri isə adətən boy-buxunlu olur, öz
görkəmləri ilə orta siniflərdə oxuyan yeniyetmələrdən
fərqlənirlər.
Lakin BÖTL-də gözlədiyimizin əksi ilə qarşılaşdıq:
şagirdlərin demək olar ki, hamısı boyca kiçik, sısqa, el
arasında deyildiyi kimi, çəlimsiz idi. Bəzi
valideynlərin tez-tez yaxşı oxuyan övladları haqqında
dedikləri "çox oxumaq uşağımı sıxıb" sözləri fikrimizdən
keçdi. Lakin, əlbəttə, valideyn qayğısından,
narahatlığından doğan bu fikirlərin elmi əsasının
olmadığını da bilirdik.
İlk müsahibimiz Şirvan özəl türk liseyinin X sinif
şagirdi Mehdi Məhərrəmov oldu. Mehdi Rahib oğlu
Məhərrəmov 1997-ci ildə Hacıqabul rayonunda anadan olub.
Onda riyaziyyata həvəs və bu sahədəki qabiliyyəti özünü
lap kiçik yaşlarından büruzə verib. Valideynləri
riyaziyyatçı olmasalar da Mehdinin bu elmə marağını və
qabiliyyətini erkən yaşlarından duya biliblər və 4
yaşından ona riyaziyyatı öyrətməyə başlayıblar. Mehdi
2004-cü ildə Hacıqabul səhər 1 nömrəli tam orta məktəbin
I sinfinə qəbul olunub. 6 il burada oxuyub. VI sinfin
sonlarında isə müvəffəqiyyətlə imtahan verərək Şirvan
özəl türk liseyinə daxil olub. Onun riyaziyyat
sahəsindəki bilik və hazırlığı səviyyəsi liseyin
müəllimlərinin də diqqətindən yayınmayıb və Mehdi
onların tövsiyəsi ilə fizika-riyaziyyat olimpiadalarına
hazırlıq məqsədi ilə keçirilən seçim turunda iştirak
edib. Seçim imtahanlarından uğurla keçərək olimpiadaya
hazırlıq qrupunda oxumaq şansı qazanıb. Qrupun ən fəal
şagirdlərindən olan Mehdi 8-ci sinifdə təhsil alarkən
keçirilən sınaqlarda da uğur qazanıb və Bakı Özəl Türk
Liseyində fəaliyyət göstərən olimpiadaya hazırlıq
mərkəzinə cəlb olunub. O vaxtdan burada hazırlıq keçir.
Dediyinə görə, burada onlarla hazırlıqlı müəllimlər,
xüsusən də vaxtilə olimpiadalarda iştirak edərək qələbə
qazanmış və sonralar müəllimlik sənətinə yiyələnmiş
adamlar, eləcə də müxtəlif ali məktəblərdən, xüsusən də
Qafqaz Universitetindən dəvət olunmuş müəllimlər dərs
deyir, onlarla beynəlxalq olimpiada proqramları üzrə
hazırlıq aparırlar.
Mehdinin iştirak etdiyi ilk beynəlxalq olimpiada ötən
ilin yayında, daha dəqiq desək, 19-24 iyun tarixlərində
Yunanıstanda keçirilən Beynəlxalq Balkan Olimpiadası
olub. IX sinfi bitirib X sinfə keçən Mehdi bu
olimpiadada medalçılar sırasına düşə bilməyib.
O, ilk beynəlxalq bilik yarışmasındakı iştirakını belə
xatırlayır: "Olimpiada Yunanıstanın Vediya şəhərində
təşkil olunmuşdu. İlk dəfə idi ki, xaricə gedirdim.
Şəhər çox xoşuma gəldi. İlk gün açılış oldu. Sonrakı gün
bizə istirahət verdilər, şəhərlə tanış olduq. Üçüncü gün
olimpiada keçirildi. Səhəri yenə bizə istirahət verib
şəhərin görməli yerlərini gəzdirdilər. Olimpiadanın
bağlanışı və qaliblərin mükafatlandırılması günü məlum
oldu ki, yer tuta bilməmişəm. Pərt oldum. Lakin
müəllimlərim mənə ürək-dirək verdilər. Qarşıda hələ çox
olimpiadaların olacağını dedilər".
Mehdinin iştirak etdiyi ikinci mötəbər yarışma isə ötən
il iyul ayında Argentinada keçirilən Beynəlxalq
riyaziyyat olimpiadası olub. İyulun 8-16-sı arası baş
tutan bu bilik yarışında da Mehdi qaliblər sırasına düşə
bilməyib. Lakin bu olimpiadadan da onun yaddaşında xoş
xatirələr qalıb. Sirli, uzaq Argentina ilə bağlı
xatirələr...
Nəhayət, üçüncü cəhdi medalla nəticələnib. Bu, 2013-cü
ilin yanvar ayında Qazaxıstanın Almatı şəhərində
keçirilmiş Beynəlxalq Jautikov fizika-riyaziyyat və
informatika olimpiadasında olub. 16 ölkədən 53
komandanın iştirak etdiyi həmin bilik yarışmasında
Azərbaycan komandasının üzvləri 1 gümüş, 3 bürünc medal
və 2 həvəsləndirici sertifikat alıblar. Mehdi isə
riyaziyyat üzrə bürünc medala sahiblənib.
Ona ilk medal qazandıran bu olimpiada haqqında
təəssüratlarını Mehdi bizimlə daha həvəslə bölüşdü:
"Almatıya yanvarın 13-də gəldik. Axşam buradakı
fizika-riyaziyyat təmayüllü məktəbin yataqxanasında
qaldıq. Ertəsi gün açılış mərasimi oldu. Mərasim çox
təntənəli keçdi. Sonrakı gün proqrama uyğun olaraq
istirahət etdik və olimpiadaya hazırlaşdıq. Proqramın
3-4-cü günləri yarışlar təşkil olundu. Həm 3-cü, həm də
4-cü gündə keçirilən olimpiadanın hərəsi 3 sualdan
ibarət idi. 3 sualı cavablandırmağa 4 saat yarım vaxt
verildi. Bu, özü yarışmanın necə çətin olduğunu
göstərir. Birinci gün yaxşı oldu. Suallarımın hamısını
cavablandırdım. İkinci gün isə mənim üçün o qədər də
ürəkaçan olmadı. Nəticədə bürünc medal aldım. Gümüş
medala cəmi 1 balım çatmadı. Buna baxmayaraq medal
alanda çox sevindim".
Mehdi olimpiadaların ona çoxlu dostlar qazandırdığını da
deyir. Hazırda digər olimpiadaçı yoldaşları ilə birgə
Mehdi də növbəti beynəlxalq bilik yarışmalarına
hazırlaşır. Qarşıda onu ötən il uğur qazana bilmədiyi
Beynəlxalq Balkan Olimpiadası gözləyir. Həmin bilik
yarışması bu ilin aprel-may aylarında keçiriləcək. Mehdi
bürüncünü gümüşə və ya qızıla dəyişmək üçün bu yarışmaya
ciddi hazırlaşır.
Gənc istedadın arzuları, planları çoxdur. Bütün həyatını
riyaziyyata həsr etmək istəyir. Təhsilini davam
etdirmək, ABŞ-da ali təhsil almaq fikrindədir.
Söhbətimizin sonunda Mehdidən riyaziyyat sahəsində ən
böyük beynəlxalq mükafatın hansı olduğunu soruşdum. Dedi
ki, bu, Filds mükafatıdır. Gələcəkdə onu almaq da
Mehdinin arzularındandır. Çox təəssüf edir ki,
riyaziyyatçılara Nobel mükafatı verilmir. İnanırıq ki,
üçüncü cəhdində olsa da beynəlxalq olimpiadanın medalını
qazanan Mehdi nə vaxtsa Filds medalı da ala bilər.
 İki
beynəlxalq olimpiada - iki mükafat
Beynəlxalq olimpiadalar, bilik yarışları və müsabiqələr
də bir növ idman turnirləri kimidir. Nə qədər yaxşı
hazırlaşsan da bəzən təsadüflər, müəyyən situasiyalar
yarışmanın nəticələrinə təsir göstərə bilir. Bunu söhbət
etdiyimiz beynəlxalq fənn olimpiadalarının qalibləri də
təsdiqləyirlər. Deyirlər ki, bəzən bir bal, kiçik bir
diqqətsizlik, yanlışlıq adamı medaldan məhrum edir və ya
qızıl, gümüş əvəzinə bürünc medal almalı olursan.
Lənkəran özəl türk liseyinin X sinif şagirdi Nizami
Həşimlinin ilk dəfə çıxış etdiyi biologiya üzrə
keçirilən 23-cü Beynəlxalq Sinqapur Olimpiadasında da
başına belə hadisə gəlib.
Kiçik bir yanlışlıq ona qaliblər üçlüyünə düşməyə imkan
verməyib. Nəticədə, həvəsləndirici medal alıb. Həmin
olimpiada haqqında bir qədər ətraflı danışan Nazim
bildirdi ki, ötən ilin iyul ayında Sinqapur şəhərlərində
keçirilmiş Beynəlxalq biologiya olimpiadası onun ciddi
sınaq qarşısında qaldığı ilk mötəbər yarış olub.
Sinqapur dünyanın ən inkişaf etmiş ölkələrindəndir.
Sinqapur şəhərinin özü də çox gözəldir. Bu qənaəti məndə
olimpiadanın keçirildiyi günlər ərzində şəhərə təşkil
olunan gəzintilər yaratdı. Proqrama uyğun olaraq
olimpiada yarışı 2 gün ərzində keçirildi: birinci gün
nəzəri, ikinci gün praktik. Beynəlxalq olimpiadalarda
suallar orta məktəb proqramı səviyyəsindən yüksək, ali
məktəblərin I kurs proqramı səviyyəsində olur. Burada da
suallar çətin idi. Aralarında məntiqi suallar da var
idi. Nəzəri olimpiada 100 sualdan ibarət idi. Hər sual
üçün isə 6 cavab variantı nəzərdə tutulmuşdu.
Cavablandırmağa 6 saat vaxt verildi.
Nizami nəzəri imtahanları uğurla verib. Praktik
imtahanda isə o qədər də yüksək nəticə göstərməyib.
Praktik imtahan layihə şəklində olur. Qaliblər hər iki
imtahanın nəticələrinə əsasən ballar toplanmaqla
müəyyənləşdirilir.
Oxucuların diqqətinə çatdıraq ki, Azərbaycanın
istedadlı, yüksək intellektə malik şagirdlərindən olan
Nizami Etibar oğlu Həşimli 1997-ci il dekabrın 15-də
Lerik şəhərində anadan olub. 2003-cü ildə Lerik şəhər 3
nömrəli orta məktəbin I sinfinə gedib. VI sinifdə
Azərbaycan-Türkiyə özəl liseylərinə keçirilən seçim
imtahanlarında iştirak edərək Lənkəran özəl türk
liseyinə daxil olub və VII sinifdən başlayaraq burada
təhsil alır. Hazırda X sinif şagirdidir. Nizaminin
dediyinə görə, cənub bölgəsinin 4 rayonunun liseyə qəbul
imtahanlarında iştirak edən və qəbul olunan şagirdləri
arasında VII nəticə göstərib. VII sinifdən beynəlxalq
fənn olimpiadalarına hazırlığa cəlb olunub.
Ayda və ya iki ayda bir Bakı Özəl Türk Liseyinə gələrək
buradakı olimpiadaya hazırlıq mərkəzində hazırlıq keçir.
Sevdiyi və təbii ki, olimpiadalarda iştirak etdiyi fənn
biologiyadır. Liseydə yaxşı oxuyur. Vaxtaşırı beynəlxalq
olimpiadalara hazırlıq və iştirak üçün doğma liseyindən
ayrılmalı olsa da dərslərində problem yaranmır. Baş
liseylər idarəsi bunu nəzərə alıb. Əyalətlərdə fəaliyyət
göstərən özəl türk liseylərinin şagirdləri gündəlik
dərslərini beynəlxalq olimpiadalara hazırlıq dövründə
Bakı Özəl Türk Liseyində keçirlər.
"İki beynəlxalq olimpiadada iştirak etmisən, hansı daha
çox yadında qalıb" - sualımıza Nizami "Əlbəttə, bürünc
medal aldığım Tehran olimpiadası" cavabını verərək bu
bilik yarışması haqqında təəssüratlarını bizimlə həvəslə
bölüşdü.
"Hər il fərqli ölkədə keçirilən Beynəlxalq Təbiət
Elmləri Olimpiadası ötən il dekabrın 1-dən 10-dək İranın
paytaxtı Tehranda təşkil olunmuşdu. Bu olimpiada da
Sinqapur olimpiadası kimi 2 hissədən-nəzəri və praktik
imtahanlardan ibarət idi. Lakin kiçik bir fərq də vardı.
Belə ki, burada praktik hissədə verilən tapşırıqları hər
şagird tək özü deyil, komandanın tərkibində - üçlü
qruplar şəklində həll edirdik və oradan alınan bal
hamımıza bərabər paylanırdı. Mükafatlandırma olanda hər
kəsin nəzəri hissədəki balı ayrı hesablanır, amma
praktik hissədən yığdığı bal eyni olurdu. Belə olduğuna
görə də hər iştirakçı fərqli medal ala bilir. Mən iki
tapşırığın nəticəsinə görə bürünc medal aldım".
Nizami gələcəkdə həkim olmağı qarşısına məqsəd qoyub.
Biologiyaya məhəbbət də onda ailəsinin təsiri ilə
yaranıb. Nizaminin 6 bacısı və bir qardaşı var.
Bacılarından yalnız biri Nizamidən kiçikdir. Qalanları,
o cümlədən də qardaşı orta məktəbi çoxdan bitiriblər.
Qardaşı biologiya müəllimi, bacılarından biri isə tibb
bacısıdır. Nizamidə biologiyaya həvəsi onlar oyadıblar.
Bizimlə söhbətində istedadlı gənc liseylərindəki
şəraitdən, o cümlədən də Bakı Özəl Türk Liseyində onlara
göstərilən diqqət və qayğıdan razı qaldığını bildirdi,
qazandıqları uğurda müəllimlərinin böyük payı olduğunu
vurğuladı.
Yusif ƏLİYEV
 Beynəlxalq
təbiət elmləri olimpiadasının bürünc mükafatçısı
Tehran Olimpiadasının bürünc medalçılarından biri də
Ağdaş özəl türk liseyinin onuncu sinif şagirdi Cavid
Əhmədovdur. İlk dəfə beynəlxalq olimpiadada iştirak edən
bir şagird üçün bu yaxşı göstəricidir.
Cavid 3 turdan ibarət olan bilik yarışının birinci
turunda 30 testin 15-nə düzgün cavab verib. İkinci turda
olimpiada iştirakçıları hər sualın bir balla
qiymətləndirildiyi 30 ənənəvi suala cavab veriblər.
Cavid bu turda daha yaxşı nəticə göstərərək 25 bal
toplayıb.
Üçüncü turda qaydaya görə ayrı-ayrı ölkələri təmsil edən
məktəblilər komanda halında təcrübə aparıblar. Bu turda
Azərbaycan komandasının eksperimenti (elektroforez) 35
balla qiymətləndirilib. Beləliklə, Cavidin ilk dəfə
qatıldığı beynəlxalq bilik yarışı onun üçün böyük uğurla
başa çatıb.
Səfər təəssüratlarını bizimlə bölüşən Cavid deyir ki,
olimpiadanın keçirildiyi günlərdə xüsusi proqramla
bir-birindən maraqlı gəzintilər, oyunlar, idman
yarışları təşkil olunmuşdu. Hər keçən gün daha zəngin
təəssüratlarla yadda qalırdı. Olimpiada iştirakçıları
üçün vaxtlarını maraqlı keçirmələri məqsədilə hər cür
şərait yaradılmışdı. Biz daha çox Türkmənistan,
Qazaxıstan və Rusiyadan gəlmiş məktəblilərlə dostluq
edir, onlarla fikir mübadiləsi aparır, biliklərimizi
bölüşürdük.
Cavid Əhmədov 1997-ci il aprelin 21-də Bakıda anadan
olub. 2003-cü ildə İ.Hacıyev adına "Tərəqqi"
texniki-humanitar liseyinin birinci sinfinə gedən Cavid
təhsil aldığı illərdə həmişə dəqiq elmlərə, xüsusən
riyaziyyat və fizikaya böyük maraq göstərib. Elə bu
maraq da onu 2009-cu ildə özəl türk liseyinə gətirib.
Burada Cavidin ən çox xoşuna gələn cəhət təlimlə yanaşı,
tərbiyəyə də çox ciddi diqqət yetirilməsidir.
Bu liseydə təhsil almasından çox məmnun olduğunu
bildirən Cavid deyir ki, burada uşaqların dərsdənkənar
vaxtlarının səmərəli keçməsinə də xüsusi diqqət
yetirilir. Mənim ən çox xoşuma gələn isə yay
tətillərində təşkil olunan gəzintilərdir. Biz
vətənimizin səfalı, əsrarəngiz təbiəti olan gözəl
guşələri ilə tanış oluruq. Təbiət qoynunda saldığımız
yay düşərgələrində isə müxtəlif maraqlı tədbirlər
keçirir, açıq havada gəzintilərdən böyük zövq alırıq.
Bütün bunlardan başqa, şagirdlər tez-tez müxtəlif xarici
ölkələrə səfərlərə gedir, idman turnirlərində,
müsabiqələr və bilik yarışlarında iştirak edir, eləcə də
turist kimi bu ölkələrin təbiəti, insanları və yaşayış
səviyyəsi ilə tanış olurlar.
Kimya fənnini çox sevən Cavid hazırda Beynəlxalq
Mendeleyev Olimpiadasına hazırlaşır. O bu olimpiadada
qızıl və ya gümüş medal almağı qarşısına məqsəd qoyub.
Buna görə də öz üzərində ciddi çalışır, müəllimlərinin
tövsiyə və məsləhətlərinə dəqiq əməl edir, çoxlu əlavə
ədəbiyyat tapıb oxuyur.
Yeri gəlmişkən qeyd etmək lazımdır ki, Rusiya
Federasiyasının yığma olimpiada komandasını bu nüfuzlu
bilik yarışına ölkənin ən tanınmış, görkəmli alimləri
hazırlayırlar. Həmin alimlər M.V.Lomonosov adına Moskva
Dövlət Universitetinin Bakı filialına da gəlir və
olimpiadaya hazırlıq məqsədilə burada məşğələlər
aparırlar. Beynəlxalq Mendeleyev Olimpiadasına
hazırlaşan digər şagirdlər kimi Cavid də bu məşğələlərdə
fəal iştirak edir. O deyir ki, qocaman rus alimləri,
kimya elmi üzrə tanınmış mütəxəssislər azərbaycanlı
şagirdlərin bilik səviyyəsindən həmişə razı qalırlar,
bu uşaqların çox istedadlı, çalışqan və məsuliyyətli
olduqlarını bildirirlər. Bu isə bizim möhtəşəm bilik
yarışında böyük uğur qazanmağa ümidimizi daha da
artırır.
Cavid Əhmədov liseyi bitirdikdən sonra təhsilini Böyük
Britaniyanın London İmperial Kollecində davam etdirmək
istəyir. O, burada tibb sahəsi üzrə təhsil alaraq
bacarıqlı kardioloq kimi yetişmək arzusundadır. Son
dövrlər bir çoxları xarici ölkələrdə ali təhsil aldıqdan
sonra orada qalmağa can atırlar. Cavid isə onlardan
fərqli olaraq mütləq doğma yurduna, el-obasına qayıtmaq,
xalqının sağlamlığı keşiyində durmaq niyyətindədir. Ona
bu xeyirxah amalına çatmaqda uğurlar diləyirik.
 "İsveçrədə
keçiriləcək XXIV Beynəlxalq biologiya olimpiadasından da
medalla qayıdaram"
Elmar Məmmədli 1998-ci il Cəlilabadda anadan olub. Hələ
lap kiçik yaşlarından artıq hamı onu çox qabiliyyətli,
xüsusi istedada malik uşaq kimi tanıyıb. Buna görə də
birinci sinfə beş yaşında gedib. Cəlilabad rayonundakı 8
nömrəli tam orta məktəbdə oxuduğu illərdə həmişə
dərslərə yüksək səviyyədə hazırlığı, çalışqanlığı ilə
seçilib.
Gündəlik dərslərindən ancaq "əla" qiymət alıb. Lakin
istedadına, öyrədilən bilikləri çox asanlıqla
mənimsəməsinə görə heç vaxt arxayınlaşmayaraq təhsilə
ciddi yanaşıb, daha çox oxumağa can atıb. Maraqlıdır
ki, Elmar dərs proqramına uyğun keçilən hər bir mövzuya
aid mütləq əlavə nə isə öyrənməyi qarşısına məqsəd kimi
qoyub.
2009-cu ildə o, Lənkəran özəl türk liseyinə qəbul
imtahanlarında böyük uğur qazanıb və təhsilini həmin
ildən burada davam etdirməyə başlayıb. Elmar həmin
hadisəni belə xatırlayır:
- Mən heç vaxt oxuduğum məktəbi dəyişmək fikrinə
düşməmişdim. Çünki oxuduğum sinifdən, dostlarımdan,
ailəmdən, doğmalarımdan ayrılmağı heç ağlıma da
gətirməzdim. Sadəcə özümü sınamaq üçün həmin il
Lənkərandakı özəl türk liseyinə qəbul imtahanlarında
iştirak etdim. Nəticələri gözlədiyim müddət ərzində
liseylə yaxından tanış oldum - sinif otaqları,
laboratoriyalar, idman və akt zalları, şagirdlərin
dərsdən sonrakı asudə vaxtlarını maraqlı və səmərəli
keçirmələri üçün yaradılan gözəl şərait çox xoşuma
gəldi. Başa düşdüm ki, nə qədər çalışqan olsan da
elmlərin sirlərinə dərindən yiyələnmək, bilikləri
mənimsəmək üçün buradakı kimi geniş imkanlardan da
yararlanmalısan. Və bütün bunlardan sonra
valideynlərimin razılığı ilə Lənkəran özəl türk
liseyində oxumaq qərarına gəldim.
Elmar liseydə də biliyi, bacarığı, dərslərə hazırlığı və
çalışqanlığı ilə seçilib. O, bütün fənlərdən yüksək
qiymət alsa da təbiət elmlərinə, xüsusən biologiyaya
daha çox maraq göstərir.
Elmar gələcəkdə həkim olmaq istəyir. Qeyd etmək lazımdır
ki, bu, təsadüfi deyil. Onun valideynləri, eləcə də
qohumlarının əksəriyyəti bu peşənin sahibidir. Elmar
ağlı kəsəndən doğmalarının xəstələrə şəfa vermələrinin,
sevinc bəxş etmələrinin şahidi olub, insanların onlara
dediyi minnətdarlıqla dolu sözləri eşidib. Bəlkə də
məhz buna görə başqa peşəyə yiyələnmək fikrini heç
ağlına da gətirməyib. Elmar üçün bu dünyada insanlara
gərəkli, çətin olsa da ən şərəfli peşə həkimlikdir. O
bu məqsədinə çatmaq üçün xarici ölkələrin ən nüfuzlu ali
məktəblərinin birində tibb sahəsi üzrə təhsil almaq və
bacarıqlı cərrah kimi vətənə qayıdaraq xalqına xidmət
etmək fikrindədir.
Digər istedadlı şagirdlər kimi Elmar Məmmədli də 2010-cu
ildən olimpiadaya hazırlıq qrupuna seçilib. O bu qrupda
təbiət elmlərini xüsusi proqrama əsasən öyrənir və
dərindən mənimsəyə bilir. Adama elə gəlir ki, bu qrupa
cəlb edilən uşaqlar müəyyən istiqamətdə olimpiadalara
hazırlaşdıqlarından yalnız buna aid olan bir neçə fənnə
xüsusi diqqət yetirirlər. Əslində isə, olimpiadalara
hazırlıq onsuz da istedadlı olan bu şagirdlərin bütün
bilik və bacarıqlarını tam səfərbərliyə almalarına səbəb
olur, qabiliyyətlərini artırır. Buna görə də həmin
uşaqlar gündəlik dərslərə daha asanlıqla, həvəslə
hazırlaşırlar. Nəticələri də həmişə əvvəlkindən yüksək
olur.
Elmar Məmmədli ilk dəfə iştirak etdiyi beynəlxalq bilik
yarışında - 2012-ci ilin iyulunda Sinqapurda keçirilən
XXIII Beynəlxalq biologiya olimpiadasında
həvəsləndirici mükafata layiq görülüb. Elmar deyir ki,
bu səfər mənim üçün çox maraqlı keçdi. Sinqapur o qədər
də böyük deyil, şəhər-ölkədir. Heç bir təbii sərvəti
olmasa da həyat səviyyəsi yüksəkdir. İnsanlar təbiəti
daha çox qoruyurlar, ona görə də çirklənmə daha azdır.
Bu olimpiadada iştirak etməyimiz bizim üçün çox faydalı
oldu. Medal qazanmasaq da müəyyən təcrübə əldə etdik,
digərləri ilə müqayisədə bilik səviyyəmizi öyrəndik,
təbiət elmlərinə marağımız daha da artdı, müxtəlif
ölkələrdən gəlmiş uşaqlarla dostluğumuz yarandı.
Növbəti beynəlxalq olimpiada onun üçün daha uğurlu olub.
1-10 dekabr 2012- ci ildə İran İslam Respublikasının
Tehran şəhərində keçirilmiş Beynəlxalq təbiət elmləri
olimpiadasında Lənkəran özəl türk liseyinin X sinif
şagirdi Elmar Məmmədli bürünc medal qazanıb. 3 turda
keçirilən olimpiadanın I turunda o, 30 testin 23-nə,
II turda 30 açıq sualın 25-nə düzgün cavab yazıb. III
turda azərbaycanlı şagirdlər komanda şəklində
yarışaraq 40 mümkün baldan 35 bal toplayıblar.
Bu səfərlə bağlı təəssüratlarını bizimlə bölüşən Elmar
bildirdi ki, olimpiadanın proqramı gözəl tərtib
olunmuşdu. Tehran şəhərində gəzintilər bütün uşaqların
çox xoşuna gəldi. Təbiət muzeyinə ekskursiya isə bizim
böyük marağımıza səbəb oldu və orada gördüklərimiz
indiyədək gözlərimizin önündə canlanır. Orada olduğumuz
müddətdə diqqətimizi bir şey də cəlb etdi ki, yerli
əhali bizdə olduğu kimi xarici mala üstünlük vermir,
hamı öz ölkələrində istehsal olunmuş geyim və əşyalardan
istifadə edir.
İsveçrədə keçiriləcək 24-cü Beynəlxalq biologiya
olimpiadasından da medalla qayıdaram, - deyən Elmar
hazırda bu bilik yarışına ciddi hazırlaşır. Bu istedadlı
oğlan vətənə ən azı gümüş medalla qayıtmaq fikrindədir.
Ona növbəti bilik yarışında böyük uğur qazanmağı
arzulayırıq və gələcəkdə qarşıya qoyduğu bütün
məqsədlərə çatacağına inanırıq.
Hicran ƏKBƏROVA |
