|
Naxçıvan Dövlət Universitetində Xocalı soyqırımının
21-ci ildönümünə həsr edilmiş müxtəlif səpgili silsilə
tədbirlər - fakültə konfransları, kitab və rəsm
sərgiləri, İnternet aksiyası ümumuniversitet konfransı
ilə yekunlaşdı. Konfransı giriş sözü ilə açan rektor,
akademik İsa Həbibbəyli Qarabağın ən qədim insan
məskənlərindən biri olan Xocalıda baş vermiş soyqırımı
Ermənistanın XX əsr boyu Azərbaycana qarşı yürütdüyü
soyqırımı və deportasiya siyasətinin məntiqi davamı, ən
müdhiş, tarixdə analoqu olmayan faciə olduğunu
vurğuladı. Xocalı soyqırımının Pakistan, Meksika,
Kolumbiya, Rumıniya, Çexiya, ABŞ-ın bir neçə ştatı
tərəfindən rəsmi şəkildə tanınması, bir çox dövlətlərin
parlamentlərində müzakirə mövzusu olması, Xocalı
qətliamının tanınması məqsədilə Ağ evin rəsmi veb
səhifəsində yerləşdirilmiş petisiyaya səsvermə
Azərbaycan həqiqətlərinin dünyaya çatdırılması
istiqamətində atılan addımlardır. Vurğulandı ki, bugünkü
ziyalı gənclik Vətənə, torpağa, azərbaycançılıq
ideologiyasına sədaqətlə fəaliyyət göstərməli, mənfur
düşmənlərimizin törətdikləri faciələri unutmamalıdır.
Azərbaycan tarixi kafedrasının dosenti, tarix üzrə
fəlsəfə doktoru Elçin Zamanov "Xocalı soyqırımı
zəmanəmizin ən dəhşətli faciəsidir" adlı məruzəsində
faciənin köklü səbəbləri, siyasi məqsədi və
günahkarları, Azərbaycan dövlətinin bu soyqırımının
tanıdılması məqsədi ilə gördüyü işlərdən danışdı.
Konfransda incəsənət fakültəsinin aktyorluq ixtisası
üzrə tələbələri Çinarə Feyzullayeva və Şölə Novruzbəyli
Xocalı faciəsindən bəhs edən şeirlər bədii qiraət
etdilər, slayd və tarixi videokadrlar nümayiş
etdirildi.
Mehriban SULTAN |
