|
 Təhsil
sahəsində aparılan məqsədyönlü islahatlar daim
innovasiyaların tətbiqinə, müasir təlim
texnologiyalarının reallaşdırılmasına və təhsilin
keyfiyyətinin yüksəldilməsinə xidmət edir. Ölkəmizin
dinamik inkişafı təhsil ocaqları qarşısında da mühüm
vəzifələr qoyur. Həmin vəzifələrdən biri də təhsil
müəssisələrində fəlakət riskinin azaldılmasına
yönəldilmiş təlimlərin təşkilidir. Bu məsələnin həlli
yeni təhsil proqramlarının (kurikulumların) tətbiqində
mühüm əhəmiyyət kəsb edir.
YUNİSEF-in dəstəyi ilə Təhsil və Fövqəladə Hallar
nazirlikləri tərəfindən birgə həyata keçirilən "Təhsildə
fəlakət riskinin azaldılması" layihəsi istiqamətində
müəyyən işlər görülmüşdür.
"Mərkəzi Asiya və Cənubi Qafqaz regionu üzrə təhsildə
fəlakət riskinin azaldılması" mövzusunda 25 fevral - 1
mart 2013-cü il tarixlərində Türkiyə Respublikasının
İstanbul şəhərində keçirilən seminarda 10 ölkənin
nümayəndə heyəti iştirak edirdi. Seminarda ölkəmizi
Təhsil Nazirliyinin Strateji təhlil, planlaşdırma və
kadrların idarəolunması şöbəsinin müdiri Fərzəli
Qədirov, Azərbaycan Müəllimlər İnstitutunun əlavə
təhsil üzrə prorektoru Rahim Əzizov, YUNİSEF-in təhsil
proqramlarının rəhbəri Kənan Məmmədli, Fövqəladə Hallar
Nazirliyinin idarə rəisi Məhbubə Mustafayeva, baş
məsləhətçisi Aytəkin Mustafayeva, Şimal-qərb regional
mərkəzinin şöbə müdiri Tural Ağayev təmsil edirdilər.
Seminarı Beynəlxalq Seysmikliyə Davamlılıq
Assosiasiyasının prezidenti, professor Polat Qulkan,
YUNİSEF-in Mərkəzi və Qərbi Avropa, MDB ölkələri üzrə
"Fövqəladə hallar" proqramının rəhbəri Andrea Ceyms
açdılar. Seminarda 5 gün müddətində 20 təqdimat
dinlənildi.
Təhsildə fəlakət riskinin azaldılmasına dair ölkəmizdə
səfərdə olmuş Avropa İttifaqının layihə üzrə
koordinatoru Ketevan Lomsadze təqdimat apararkən qeyd
etdi ki, bu sahədə Azərbaycan Respublikası Təhsil
Nazirliyində effektiv iş aparılır. Azərbaycan Müəllimlər
İnstitutunda maarifləndirmə və təlimləri aparmaq üçün
təlimçilər hazırlanır. Eyni zamanda respublikanın ümumi
təhsil məktəblərindən Azərbaycan Müəllimlər İnstitutuna
ixtisasartırma təhsilinə cəlb olunan rəhbər və digər
pedaqoji işçilərə təlimlər keçirilir. Bu layihə
çərçivəsində Azərbaycan Müəllimlər İnstitutunda fəlakət
riskinin azaldılması istiqamətində çevik proqramlar
hazırlanmış, xüsusi təlimlərin keçirilməsi üçün müasir
tələblərə cavab verən mərkəz yaradılmışdır.
Seminarda Fərzəli Qədirov "Fəlakət riskinin azaldılması
modulunun müəllimlərin ixtisasartırma təhsilinə daxil
edilməsi" mövzusunda təqdimat etdi. Təqdimat çox maraqla
dinlənildi. İştirakçı ölkələrin nümayəndələri
Azərbaycanda məktəblərin maddi-texniki bazasının
gücləndirilməsi, yeni təhsil proqramlarının
(kurikulumların), qiymətləndirmə sisteminin tətbiqi,
pedaqoji kadrların ixtisasının artırılması üzrə yeni
modelə keçid sahəsində qazanılmış nailiyyətləri maraqla
dinləyib müzakirə etdilər. İki saata yaxın davam edən
müzakirələrdə çoxsaylı suallar, şərhlər və təkliflər
F.Qədirov tərəfindən konkret faktlarla izah edildi.
Türkiyə, Gürcüstan, Qazaxıstan, Tacikistan və
Qırğızıstanın nümayəndə heyətləri, Serbiya, Xorvatiya və
Türkiyədən olan YUNİSEF-in rəsmi nümayəndələri
təqdimatın çox maraqlı olduğunu, yenilikləri əks
etdirdiyini bildirdilər.
Seminar çərçivəsində İstanbul şəhərində yerləşən Hasdal
məktəbində fəlakət riskinin azaldılması məsələləri ilə
əlaqədar görülən işlər barədə təqdimat oldu. Sonra
proqramların hazırlanması və həyata keçirilməsi
məsələlərinə həsr olunmuş təcrübə mübadiləsi aparıldı.
Təcrübə mübadiləsinin sonunda fəlakət riskinin
azaldılması ilə bağlı təlim təqdim olundu. Sonda
məktəbin pedaqoji kollektivi ilə görüş keçirildi.
Seminarın tövsiyələrinə əsasən ilkin müəllim hazırlığı
proqramlarına, ixtisasartırma təhsili proqramlarına
fəlakət riskinin azaldılması modulunun daxil edilməsi,
ümumi təhsil proqramlarının (kurikulumların) təhlil
edilməsi və fəlakət riskinin azaldılması üzrə
məktəblilərdə kompetensiyaların formalaşdırılması
zərurəti nəzərə alınaraq müvafiq standartların daxil
edilməsi qarşıda duran vəzifələrdəndir.
Yusif ƏLİYEV |
