|
Fevralın 28-də Bakıdakı 35 nömrəli tam orta məktəbdə
müasir təlim metodlarından istifadə etməklə Azərbaycan
tarixi fənnindən "Tarix unudulmur" mövzusunda "açıq
dərs" keçirildi.
 Tarix
müəllimi Səkinə Aslanovanın VIII siniflər arasında
təşkil etdiyi "açıq dərs" fevral ayına təsadüf
etdiyindən əvvəlcə Xocalıda şəhid olan həmvətənlərimizin
və torpaqlarımızın bütövlüyü uğrunda canından keçmiş
şəhidlərimizin əziz xatirəsi bir dəqiqəlik sükutla yad
edildi. Dövlət himni tədbir işitirakçıları tərəfindən
ifa olundu. Qonaqları salamlayan məktəbin direktoru
Rəna Naibova bildirdi ki, Azərbaycan tarixinin müasir
inkişaf mərhələsi məhz ulu öndər Heydər Əliyevin adı ilə
bağlıdır. Xalqımızın ümummilli lideri Heydər Əliyev
təkcə Azərbaycan tarixində yox, dünya tarixində də
özünəməxsus yeri və rolu olan lider kimi yaşayacaq.
Müasir tariximizin ən böyük azərbaycanlısı Heydər Əliyev
təhsil, mədəniyyət və incəsənətə diqqəti ilə bütün bu
sahələrin inkişafına təkan verib. Ulu öndərin siyasi
kursunu uğurla davam etdirən Prezidentimiz İlham Əliyev
də uşaqların savadlı, vətənpərvər vətəndaş kimi böyüməsi
üçün təhsilə böyük diqqət ayırır. Bunun nəticəsi olaraq
35 nömrəli tam orta məktəb Prezidentin müvafiq sərəncamı
ilə yüksək səviyyədə əsaslı təmir olunub.
Müəllim Səkinə Aslanova Azərbaycan tarixinin çox qədim
və keşməkeşli olduğunu diqqətə çatdırdı. O, şagirdləri
üç qrupa - VIII "a", VIII "b", VIII "ç" qruplarına
böldü. Qrupların rəhbərləri seçildi. Müəllim qruplara
ilk olaraq xəritə ilə işləmək tapşırığını verdi. Suallar
Azərbaycan Respublikası, Türkiyə Cümhuriyyəti və İran
İslam Respublikasının xəritədə yeri və hər üç dövlət
haqqında məlumata aid idi. Hər üç qrupun şagirdləri
onlara ünvanlanan sualları məharətlə cavablandırdılar.
İkinci tapşırıq Azərbaycan tarixinə aid testlər, üçüncü
tapşırıq isə səhnəciklər idi. Qruplar test
tapşırıqlarını yerinə yetirdikdən sonra üçüncü
tapşırığa əsasən İmadəddin Nəsiminin soyulma
səhnəsindən, Qarabağ və Xocalı hadisələrindən
səhnəciklər nümayiş etdirdilər. Münsiflər heyəti və
şagirdlərin özləri tərəfindən obyektiv qiymətləndirmə
aparıldı.
Tədbirdə iştirak edən Təhsil Nazirliyinin şöbə müdiri
Ağababa İbrahimov, Təhsil Nazirliyinin Monitorinq və
qiymətləndirmə şöbəsinin baş məsləhətçisi Nəbi
Mahmudov, Bakı Şəhəri üzrə Təhsil İdarəsinin
nümayəndələri və digər qonaqlar dərsin yüksək səviyyədə
təşkilinə görə müəllimə təşəkkürlərini bildirdilər.
Tədbirin sonunda tariximizi əks etdirən film nümayiş
olundu.
Rəşad ZİYADOV |
