Hər dəfə Bülbül adına Orta İxtisas Musiqi Məktəbinə
daxil olanda ayrı-ayrı auditoriyalardan eşidilən musiqi
əsərlərinin sehrinə düşürsən. Bu sehrli aləmi bütün
əzəməti ilə öz yetirmələrinə çatdıran, gənc, istedadlı
ifaçılarımızı peşəkər musiqi həyatına, nüfuzlu
beynəlxalq müsabiqələrə hazırlayanlar isə bizim
müəllimlərimizdir.
Onların
arasında qadın müəllimlərimiz çoxdur, məhz onların
gərgin əməyi, ağır zəhmətinin nəticəsidir ki, bu gün
istedadlı gənclərimizin sorağı bir sıra beynəlxalq
musiqi müsabiqələrindən gəlir. 8 mart - Beynəlxalq
Qadınlar Günü ərəfəsində onlardan biri ilə, Azərbaycan
Dövlət Mədəniyyət və İncəsənət Universitetinin vokal
fakültəsinin dosenti, fəlsəfə doktoru, eyni zamanda
Bülbül adına Orta İxtisas Musiqi Məktəbinin müəllimi
İradə Xəlilova ilə görüşərək yaradıcılıq planları və
yetirmələri barədə söhbətləşdik. İlk öncə qeyd edək ki,
son günlər İradə xanım şagirdləri ilə birlikdə zəngin iş
qrafiki üzrə çalışır: "Ümummilli lider Heydər Əliyevin
anadan olmasının 90-cı ildönümünün keçirilməsi ilə
əlaqədar Prezident İlham Əliyevin sərəncamına və Təhsil
Nazirliyinin Fəaliyyət proqramına əsasən respublika
mahnı müsabiqəsi elan olunub. Biz də şagirdlərimizlə
aprelin sonları mayın əvvəllərində keçiriləcək bu
müsabiqəyə çox ciddi hazırlaşırıq".
Bundan əlavə, İradə Xəlilova hazırda tələbələri ilə çox
məsuliyyətli beynəlxalq müsabiqəyə də hazırlaşır. Bir
həftə sonra Estoniyada Koxtla-Yardda beynəlxalq müsabiqə
keçiriləcək. İradə Xəlilova yetirmələrinin bu müsabiqəyə
ciddi hazırlaşdıqlarını və onların qələbə əzminin çox
yüksək olduğunu bildirdi. İradə xanım Azərbaycan
Respublikası Təhsil Nazirliyinin bu işlərdə onlara
hərtərəfli dəstək göstərdiyini bildirdi: "Mən onu da
deyim ki, biz Təhsil Nazirliyi tərəfindən böyük qayğı və
diqqətlə əhatə olunmuşuq. Bir faktı da qeyd edim ki,
bizim Estoniyada keçiriləcək beynəlxalq müsabiqədə
iştirakımız tamamilə Təhsil Nazirliyinin dəstəyi ilə
həyata keçirilir. Fürsətdən istifadə edərək Təhsil
Nazirliyinin rəhbərliyinə öz dərin minnətdarlığımızı
çatdırmaq istəyirəm".
İradə Xəlilova qeyd etdi ki, tələbələri bir sıra
beynəlxalq müsabiqələrdə ölkəmizi layiqli təmsil
edirlər. Hər dəfə çalışıram ki, onların repertuarında
Azərbaycan xalq musiqiləri yer alsın. Öz ölkəmizin
vətənpərvər vətəndaşları kimi biz milli mədəniyyət
nümunələrimizi təbliğ etməyə
çalışırıq. Biz Azərbaycan mədəniyyətini bütün dünyada
yaymağa borcluyuq. Azərbaycan musiqi sənətinin, incəsənətinin
bütün dünyada tanıdılmasında Heydər Əliyev Fondunun
xüsusi rolu var. Azərbaycanın birinci xanımı, Milli
Məclisin deputatı Mehriban Əliyeva incəsənətimizə çox
böyük dəstək göstərir. Onun dəstəyi sayəsində bizim
incəsənətimiz inkişaf edir, bütün dünyada təbliğ
olunur. İradə Xəlilova bütün varlığı ilə musiqiyə bağlı
insandır. "Musiqi sizin üçün nədir" sualına o, belə
cavab verdi: Bir misal çəkim. Biz bir qədər əvvəl elə bu
barədə söhbət açmışdıq. Ölkəmizin birinci xanımı
Mehriban Əliyevanın dəstəyi ilə Azərbaycanda simfonik
gənclər orkestri yaradılıb. Bu orkestrin rəhbəri isə
bizim məktəbin direktoru, Azərbaycanın xalq artisti
Teymur Göyçayevdir. Biz bir qədər əvvəl orkestrin
məşqində olmuşuq. Məşqdən sonra Teymur Göyçayev qeyd
etdi ki, musiqi bizim həyatımızdır. Biz özümüzü
musiqisiz təsəvvür edə bilmirik. Mən uşaqlara baxaraq
dedim ki, onlar ən xoşbəxt insanlardır, çünki
musiqiçidirlər. Onlar fərqlidirlər. Bu uşaqlar fərqli
düşüncəyə, davranışlara malikdir. Onların tamamilə başqa
dünyaları var. Onlar musiqi uşaqlarıdır. Bir sözlə,
musiqi bizim üçün həyat deməkdir.
Söhbətimizin sonunda İradə Xəlilova bir müəllim, bir
qadın, bir ana kimi nikbin arzularla yaşadığını belə
ifadə etdi: Bir qadın, pedaqoq müəllim kimi mən özümə
daha çox istedadlı şagirdlər, tələbələr arzu edirəm.
Mən ölkəmizin birinci xanımı Mehriban Əliyevanın
timsalında Azərbaycanın bütün qadınlarını təbrik etmək
istəyirəm. Onlara cansağlığı və xoşbəxtlik arzulayıram.
Biz də, öz növbəmizdə, İradə xanımı və onun timsalında
təhsil sahəsində çalışan bütün qadın müəllimlərimizi
ürəkdən təbrik edir və onlara şərəfli fəaliyyətlərində
uğurlar arzulayırıq.
Oruc MUSTAFAYEV |