Tanınmış
alim və şairlə görüşdə məktəbin müəllim və şagirdləri
ilə bərabər qonaqlar - Şuşa Rayon İcra Hakimiyyəti
başçısının müavini Vüsalə Fətəliyeva, RTŞ-ın müdiri
Təvəkkül Əliyev, Şuşa Rayon Məhkəməsinin sədri
Allahverən Həsənov, Şuşa rayon prokuroru Məmmədəli
Rəhmətov, Şuşa Musiqi Kollecinin direktoru Rəsul
İsmayılov, məktəb direktorları və digər qonaqlar iştirak
ediblər.
Tədbirin aparıcısı Elnurə Səfərova görüşü açıb hörmətli
qonaqları salamladıqdan sonra Hamlet İsaxanlının ömür
yolundan bəhs edən film nümayiş olunub. Məktəbin
təlim-tərbiyə işləri üzrə direktor müavini Nazilə
Əzizova Hamlet İsaxanlının həyat və yaradıcılığı
haqqında geniş məruzə edib. Məruzəsində öncə
H.İsaxanlının ömür yolunun bəzi mühüm tarixlərini
diqqətə çatdıran N.Əzizova daha sonra onun riyaziyyatçı
alim, istedadlı şair, ölkəmizdə ilk ingilisdilli
universitetin təsisçisi kimi ilk baxışda bir-biri ilə o
qədər də yaxın olmayan fəaliyyətlərindən söz açıb,
riyaziyyatımızın və poeziyamızın inkişafına dəyərli
töhfələr verdiyini qeyd edib. Bildirilib ki, dünyanın
40-dan çox ölkəsində beynəlxalq konfrans və
simpoziumlarda maraqlı elmi məruzələrlə çıxış edən
H.İsaxanlı özünü geniş diapazonlu riyaziyyatçı alim,
sosial və humanitar elmlər, təhsil tarixi və
nəzəriyyəsi üzrə mütəxəssis kimi təsdiqləyib.
H.İsaxanlı 200-dən çox elmi məqalənin, riyaziyyat,
təhsil, dilşünaslıq üzrə monoqrafiya və dərsliklərin,
müxtəlif dillərdə nəşr olunmuş şeir kitablarının
müəllifidir.
Sonra
meydan məktəbin istedadlı şagirdlərinə verilib.
Z.Əhmədli, F.Cabbarlı, A.Məcidli, Ş.Abbasov Azərbaycan
Milli Konservatoriyasının 1-ci kurs tələbəsi Xəzri
Əzizovun tarda müşayiəti ilə "Parlayan günəşdir
riyaziyyat" şeirini söyləyiblər. Şagirdlərdən
A.Cavadbəyli, N.İbrahimov, H.Rzayev, H.İbrahimzadə və
başqaları H.İsaxanlının lirik və ictimai məzmunlu
şeirlərini ifa ediblər. Görüşün sonunda H.İsaxanlı dəvət
üçün minnətdarlığını bildirib və tədbir
iştirakçılarının ona ünvanlanmış suallarını
cavablandırıb. Tanınmış alim-şairə 65 illik yubileyi
münasibətilə Şuşa şəhərini əks etdirən rəsm əsəri
hədiyyə olunub.
Yusif ƏLİYEV |