Bu
günlərdə Biləcəri qəsəbəsindəki şəhid Rizvan Pirnəzərov
adına 299 nömrəli məktəb-liseydə onun doğum gününə həsr
olunmuş tədbir keçirildi. Məktəbin dəhlizində şəhidin
müxtəlif illərdə çəkdirdiyi şəkillərdən ibarət gül
dəstələri ilə bəzədilmiş guşə var idi. Qonaqlar
şəhidin büstünü ziyarət edib önünə gül dəstələri
qoydular. Akt zalında "Qəhrəmanlar unudulmur" adı
altında keçirilən ədəbi-bədii gecədə ilk olaraq
şəhidlərimizin əziz xatirəsi bir dəqiqəlik sükutla yad
edildi. Dövlət himni ifa olundu. Üçrəngli Dövlət
bayrağımız səhnəyə gətirildi. Sonra tədbiri təhsil
ocağının rəhbəri Solmaz Kazımova açaraq Rizvan
Pirnəzərovun ömür yoluna nəzər saldı. "Eldə doğulub el
üçün böyüyənlər, ana qucağını cənnət, ata yurdunu
qibləgah, axar sularını can dərmanı bilən qeyrətli Vətən
oğullarımızın içərisində Rizvanın da öz yeri var. Onu
tanıyanlar yaxşı bilirdi ki, Rizvan vətənin dar gündə
qalmasına dözmədi. O, həmişə qaynar bölgələrdə keçirilən
əməliyyatlarda iştirak edərək düşmənə ağır zərbələr
vururdu. Həmin döyüşlərin birində düşmən gülləsinə tuş
gələrək qəhrəmancasına həlak oldu Rizvan. Pedaqoji
kollektivimiz çalışır ki, böyüməkdə olan gənc nəslimiz
Rizvan kimi vətənpərvər, xalqa, torpağa sadiq olsunlar.
Gecənin aparıcıları qəhrəmanın həyatı haqqında məlumat
verərək bildirdilər ki, Rizvan 1963-cü il fevralın
25-də Krasnoselo rayonunun Gölkənd kəndində anadan
olmuşdur. 1980-ci ildə orta məktəbi bitirdikdən sonra
Donetsk Ali Hərbi Siyasi Məktəbinə qəbul olmuşdur.
1984-cü ildə təhsilini başa vurduqdan sonra Əfqanıstan
Respublikasına göndərilmiş, 80-dən çox döyüş
əməliyyatlarında iştirak etmişdir. Göstərdiyi cəsarət və
igidliyə görə orden və medallarla təltif olunmuşdur.
Rizvan Pirnəzərov 1995-ci ildə Qarabağ döyüşlərində
qəhrəmanlıq göstərərək həlak olmuşdur. Tədbirdə iştirak
edənlər şəhidlə bağlı xatirələrindən danışdılar. Anım
gecəsində məktəbin şagirdləri şəhid Rizvana həsr olunmuş
şeirlər söylədilər, mahnılar oxudular. Onlar
ədəbi-bədii kompozisiyalarla çıxış etdilər.
Şəhid Rizvan Pirnəzərovun döyüş yolundan bəhs edən film
nümayiş olundu.
Tədbirin sonunda Şəmistan Əlizamanlının təqdimatında
milli vətənpərvərlik ruhunda mahnılar ifa olundu.
Rəşad ZİYADOV |