|
 Kiçikyaşlı
məktəbli dostlarımızın hər gəlişini səbirsizliklə
gözlədikləri sevimli "Göyərçin" jurnalının 3 və 4-cü
nömrələri artıq işıq üzü görüb, necə deyərlər, balaca
fidanların nigarançılıqlarına axır ki, son qoyulub.
Axı onlar həmişə bu dərginin al-əlvan rənglərə boyanmış
səhifələrində öz arzu və istəklərinə uyğun olan nağıl,
hekayə, şeir, yumorlar, yaşıdlarının yaradıcılıq
nümunələri ilə tanış olurlar.
Jurnalın 3-cü nömrəsi oxucuların sevimli şairi,
vaxtilə Azərbaycan radiosunda uşaq və yeniyetmələr
redaksiyasının baş redaktoru işləmiş, bir vaxtlar
uşaqların hər gün radioda sevə-sevə dinlədikləri "Sandıqça"
verilişinin yaradıcısı, mərhum istedadlı şair Eldar
Baxışın "Boz ay", xanım şairlərimizdən Mədinə Gülgünün "Mənim
anam" və "Anamız" şeirləri ilə açılır. Bir-birindən
maraqlı ədəbi nümunələrlə diqqəti cəlb edəcək bu
nömrədə balaca oxucular daha sonra Elmira Əliqızının "Qış
nənə və üç oğul" və Mirvarid Dilbazinin "Sevincin
bayramı" nağılları ilə tanış ola biləcəklər.
Dərginin 4-cü nömrəsi də əvvəlki nömrələr qədər
oxunaqlı, diqqətçəkəndir. Bir-birindən maraqlı şeirlər,
nağıllar, hekayələr, yumorlar, eləcə də rəssamlarımızın
uşaqların ecazkar nağıl dünyasından bəhs edən rəsmləri
zövq oxşayır, könül açır. Kiçikyaşlı oxucular jurnalın
ikinci səhifəsində xalq şairi Cabir Novruzun
vətənpərvərlik mövzusunda yazdığı, onların yurd, torpaq,
el-oba sevgisindən bəhs edən "Qorudun sənindir" şeiri
ilə tanış olacaqlar. Şair Hüseyn Kürdoğlunun "Aytən və
Göyərçin", "Kitabım, dəftərim var", "Nənəmə muncuq aldım"
şeirləri, balaca rəssamlar Fəxriyyənin, İlqarın, Günayın,
Aytənin uşaq fantaziyasının məhsulları olan rəsmləri,
Erkinin hekayələri, "Xeyirxah ovçu" Şimali Amerika
hindularının nağılı tərcüməçi Rafiq Əliyevin
təqdimatında jurnalda yer alan maraqlı, oxunaqlı qələm
məhsullarıdır. Bir sözlə, balaca oxucularımızın
jurnalın hər iki nömrəsindən məmnun qalacaqlarına əminik.
Odur ki, alın, oxuyun, öyrənin, dostlar!
Sifai SƏFƏROVA |
