|
Martın 18-də Azərbaycan Dövlət Mədəniyyət və İncəsənət
Universitetinin sərgi salonunda rəssamlıq fakültəsinin
müəllim və tələbələrinin əsərlərindən ibarət sərginin
açılışı olub.
"Baharın rəngləri" adlı sərgidə 100-ə yaxın sənət
nümunəsi nümayiş etdirilib. Mərasimi giriş sözü ilə açan
universitetin rektoru, professor Timuçin Əfəndiyev
çıxışında Azərbaycan Respublikasının Prezidenti cənab
İlham Əliyevə respublikamızda mədəniyyət və incəsənət
sahəsində yüksək ixtisaslı kadrlar hazırlığında və
milli mədəniyyətin inkişafında mühüm xidmətlərini nəzərə
alaraq ADMİU-nun 90 illik yubileyinin keçirilməsi ilə
əlaqədar imzaladığı sərəncama görə universitetin
professor-müəllim heyəti adından dərin təşəkkür və
minnətdarlığını bildirib. Professor Timuçin Əfəndiyev bu
günlərdə Almaniyada, özünün də iştirak etdiyi tələbə
rəssamların Xocalı faciəsinə həsr olunan sərgidən,
habelə Bolqarıstanda rəssamlıq fakültəsinin dekanı Sevda
Sadıqbəyova və kafedra müdiri Aytən Rzaquluyevanın
yaradıcılıq sərgisindən də söz açıb. Rektor, eyni
zamanda, universitetin təkcə rəssamlıq fakültəsinin
deyil, digər fakültələrlə yanaşı, musiqi sənəti
fakültəsinin də nailiyyətlərini, bu il "Avroviziya"
müsabiqəsinə seçim turunda universitetin tələbəsi Fərid
Məmmədovun birincilik qazanmasını qürur hissi ilə
vurğulayıb. Qeyd edib ki, bu uğur universitetin digər
tələbəsi Safura Əlizadənin 2011-ci ildə "Avroviziya"
müsabiqəsində müvəffəqiyyətli çıxışının davamıdır.
Sonra rəssamlıq fakültəsinin müəllim kollektivi adından
professor Arif Əziz, xalq rəssamı, professor Ağəli
İbrahimov, fakültənin dekanı, dosent Sevda Sadıqbəyova
çıxış edərək universitetdə aparılan yaradıcılıq
prosesindən və ADMİU-nun 90 illiyi ilə əlaqədar
keçiriləcək tədbirlərdən söz açıblar.
Vurğulanıb ki, bu sərgi Azərbaycan Dövlət Mədəniyyət və
İncəsənət Universitetində gedən səmərəli yaradıcılıq və
müasir metodikaya əsaslanan tədris prosesinin bariz
nümunəsidir. Son dövrdə respublikamızda və digər xarici
ölkələrdə müvəffəqiyyətlə nümayiş etdirilən sərgilər,
musiqi sahəsində qeyd olunan uğurlar ADMİU-nun keçdiyi
şərəfli yolun uğurlu səhifələridir.
Maral MANAFOVA,
ADMİU-nun elm və yaradıcılıq işləri üzrə prorektoru |
