|
 Naxçıvan
Dövlət Universitetində 31 mart - Azərbaycanlıların
soyqırımı gününə həsr olunmuş konfrans keçirildi.
Konfransdan öncə Türkiyənin Beynəlxalq Əsassız Erməni
İddiaları ilə Mübarizə Dərnəyinin rəhbəri Göksel
Gülbeyin rəhbərliyi ilə universitetdə təşkil olunan
fotosərginin açılışı oldu. Universitetin rektoru,
akademik İsa Həbibbəyli, Türkiyə Cümhuriyyətinin
Naxçıvandakı Baş konsulunun müavini Ömər Gülər burada
sərgilənən 30-a yaxın tarixi fotonun erməni
vandalizmini, onların türklərə qarşı törətdikləri
qətliamları bir daha təsdiq etdiyini bildirdilər.
Azərbaycan Milli Elmlər Akademiyasının müxbir üzvü,
professor Kərim Kərimovun, universitetin müəllim və
tələbələrinin karikatura və siyasi plakatlardan ibarət
sərgilərinə də baxış keçirildi.
Konfransda çıxış edən rektor, akademik İsa Həbibbəyli
qeyd etdi ki, ermənilərin XIX əsrin sonlarından etibarən
Azərbaycan xalqına və onun dövlətçiliyinə qarşı
yürütdükləri soyqırımı və deportasiya siyasəti
inkarolunmaz tarixi həqiqətdir. 1905-07, 1918-20,
1946-48-ci illərdə törədilən, eləcə də ötən əsrin 80-ci
illərindən etibarən Azərbaycanın müstəqilliyinə və ərazi
bütövlüyünə qarşı yönəldilmiş soyqırımı tarixdə silinməz
ləkə, bəşəri cinayətdir. Ümummilli lider Heydər Əliyevin
hakimiyyətə ikinci dəfə qayıdışından sonra ermənilərin
soyqırımı və etnik təmizləmə siyasətinə tarixi, siyasi
və hüquqi qiymət verilməyə başlanmış, "Azərbaycanlıların
soyqırımı haqqında" 1998-ci il 26 mart tarixli fərman,
digər mühüm qərarlar imzalanmışdır. Rektor, bu gün
Azərbaycan həqiqətlərinin dünya dövlətləri və
ictimaiyyəti tərəfindən qəbul edilməsi istiqamətində
Azərbaycan iqtidarının və diasporunun məqsədyönlü
fəaliyyətindən də danışdı.
Azərbaycan tarixi kafedrasının müdiri, tarix elmləri
doktoru Zəhmət Şahverdiyev "Azərbaycanda ermənilərin
törədikləri soyqırımların tarixindən" mövzusunda
məruzəsində vurğuladı ki, azərbaycanlılara qarşı iki əsr
davam edən soyqırımı düşünülmüş şəkildə, əksər xristian
dövlətlərinin havadarlığı ilə həyata keçirilmişdir.
Ermənilərin Azərbaycana qarşı uzun illər boyu apardığı
ardıcıl etnik təmizləmə, soyqırımı nəticəsində minlərlə
azərbaycanlı böyük qəddarlıqla qətlə yetirilmiş, doğma
torpaqlarından didərgin düşmüşdür.
Azərbaycan tarixi kafedrasının dosenti, tarix üzrə
fəlsəfə doktoru Xəzər Hüseynov "1918-1920-ci illərdə
Naxçıvanda azərbaycanlılara qarşı törədilmiş soyqırımı",
hüquqşünaslıq ixtisası üzrə II kurs tələbəsi Ağalar
Qəribov "XX əsrin sonlarında ermənilərin
azərbaycanlılara qarşı soyqırımı siyasəti" mövzularında
məruzələr etdilər. Türkiyənin Beynəlxalq Əsassız Erməni
İddiaları ilə Mübarizə Dərnəyinin rəhbəri Göksel Gülbey
rəhbərlik etdiyi təşkilatın Avropada, Türkiyədə həyata
keçirdiyi tədbirlər barədə məlumat verdi, erməni
iddiaları ilə mübarizədə türkdilli və müsəlman xalqların
həmrəyliyinin, erməni vandalizminə qarşı davamlı,
mütəşəkkil formada mübarizə aparmalarının zəruriliyini
söylədi.
Konfransda mövzu ilə bağlı slayd da göstərildi,
aktyorluq ixtisasının tələbələri bədii qiraət etdilər.
Mehriban SULTAN.
NDU-nun Mətbuat şöbəsinin müdiri |
