|
Aprelin 8-də Azərbaycan Müəllimlər İnstitutunda
görkəmli Azərbaycan şairəsi Məhsəti Gəncəvinin
yaradıcılığının 900 illik yubileyinə həsr olunmuş tədbir
keçirildi. Tədbiri giriş sözü ilə açan institutun
rektoru, Milli Məclisin deputatı, professor Aqiyə
Naxçıvanlı qeyd etdi ki, XI əsrin sonu-XII əsrin
əvvəllərində yaşamış böyük Azərbaycan şairəsi Məhsəti
Gəncəvi Azərbaycan və müsəlman intibahının parlaq
nümayəndələrindən biridir. Azərbaycan Respublikasının
Prezidenti cənab İlham Əliyev 2013-cü il yanvarın 16-da
görkəmli şairə Məhsəti Gəncəvinin 900 illik yubileyinin
keçirilməsi haqqında sərəncam imzalayıb. Görkəmli elm
xadimlərinin, şairlərin, yazıçıların yubileylərinin
keçirilməsi, onların yaradıcılıqlarının daha dərindən
araşdırılması və öyrənilməsi olduqca əhəmiyyətlidir.
Rektor A.Naxçıvanlı Məhsəti Gəncəvinin 900 illik
yubileyi YUNESKO-nun görkəmli şəxsiyyətlərin və
əlamətdar hadisələrin qeyd olunması proqramına da daxil
edildiyini bildirdi.
Sonra Azərbaycan ədəbiyyatı və onun tədrisi metodikası
kafedrasının müdiri, filologiya elmləri doktoru Ramil
Əliyev "Məhsəti və Əmir Əhməd dastanı" mövzusunda çıxış
etdi. O qeyd etdi ki, dastanın əsas mövzusu Məhsəti
Gəncəvinin həyatından, onun sevgisindən ibarətdir.
Məhsəti Gəncəvi Azərbaycanın elə şairlərindəndir ki,
onun yaşadığı dövr, mühit, ictimai-siyasi həyat
şairənin yaradıcılığına bilavasitə təsir edib. Şairə
böyük Azərbaycan şairləri olan Əbül-üla Gəncəvi,
Xəqani, Nizami Gəncəvi və digərləri ilə bir dövrdə
yaşayıb-yaradıb.
Azərbaycan dili və onun tədrisi metodikası kafedrasının
müdiri, professor Fikrət Xalıqov "Məhsəti
yaradıcılığında şəhraşublar", Azərbaycan ədəbiyyatı və
onun tədrisi metodikası kafedrasının dosenti Əlizadə
Əsgərli "Məhsəti necə varsa", dosent Seyfəddin Rzayev
"Məhsətişünaslığın aktual problemləri" mövzularında
çıxış etdilər.
Tədbir boyunca tələbələrdən Yunis Sadıqov, Günay
Qəbudərova, Məlahət Ələsgərli və Suadə Zeynalova
Məhsəti Gəncəvinin rübailərindən parçalar səsləndirdilər.
Qeyd edək ki, institutun kitabxanasında M.Gəncəvinin 900
illik yubileyi ilə əlaqədar şairənin yaradıcılığını əks
etdirən guşə hazırlanmış, oxu zalında bədii qiraət
keçirilmişdir.
AMİ-nin Mətbuat xidməti |
