|
Azərbaycan Müəllimlər İnstitutunun Şamaxı filialında ulu
öndər Heydər Əliyevin anadan olmasının 90 illik
yubileyinə həsr edilmiş silsilə tədbirlər keçirilir.
Aprelin 6-da keçirilən növbəti tədbir Tələbə Elmi
Tədqiqat işlərinə həsr edilmiş konfrans oldu.
Konfransı giriş sözü ilə açan filialın direktoru,
filologiya elmləri üzrə fəlsəfə doktoru Tünzalə
Yusifova çıxışına ulu öndər Heydər Əliyevin müdrik
kəlamları ilə başladı: "Təhsil sisteminin nə qədər
dəyərli olduğunu ondan görmək olar ki, Azərbaycanda
yüksək savada, biliyə, ixtisasa, elmə malik insanlar var
və onlar cəmiyyətin çox hissəsini təşkil edir. Bunlar
olmasaydı, iqtisadiyyatımız belə güclü inkişaf edə
bilməzdi. Bunlar olmasaydı, biz indi Azərbaycanı
müstəqil dövlət kimi idarə edə bilməzdik". Qeyd edildi
ki, biz ulu öndərin təhsilə, elmə verdiyi yüksək
dəyərləri daim əldə rəhbər tutaraq qabiliyyətli
gənclərin elmə cəlb olunmasına xüsusi diqqət
yetirməliyik. Yüksək elmi potensialı olan tələbələrimiz
həmişə irəli çəkilməli, onların səmərəli işləmələri üçün
hər cür şərait yaradılmalıdır. Bu baxımdan tələbələrin
elmi tədqiqat işlərinə cəlb edilməsi, yüksək səviyyəli
konfransların keçirilməsi çox önəmlidir.
Tələbə Elmi Cəmiyyətinin sədri Əzizağa Vəliyev qurumun
fəaliyyəti və hazırlıq işləri barədə məlumat verdi.
Bildirildi ki, konfransa hazırlıq işləri hələ tədris
ilinin əvvəlindən başlanılmışdır. Filialda təhsil alan
tələbələrin yarısından çoxu elmi tədqiqat işi üzərində
işləmişdir. Bununla bağlı kafedralarda məsləhət saatları
müəyyən edilmiş, tələbələr elmi rəhbərləri ilə müntəzəm
olaraq məsləhətləşmələr aparmışlar. Konfransdan bir neçə
gün əvvəl poster üsulu ilə qurulmuş elmi tədqiqat
işləri kafedralarda geniş şəkildə müzakirə olunmuşdur.
Onlardan yalnız layiqliləri konfransa vəsiqə
qazanmışdır.
Sonra Azərbaycan dili və ədəbiyyatı müəllimliyi
ixtisasının 202-ci qrup tələbəsi Elvin Bəhrəmov "Müasir
Azərbaycan gəncliyinin elmə münasibəti", tarix və
coğrafiya müəllimliyi ixtisasının 203-cü qrup tələbəsi
Gülyanə İmamova "Biz gəncliyin elmi potensialıyıq"
mövzuları ilə çıxış etdilər.
Plenar iclasdan sonra konfrans iki bölmədə öz işini
davam etdirdi .
Filialda tələbə elmi-tədqiqat işlərinin konfransının
keçirilməsi ilk dəfə olmasına baxmayaraq tələbələr çox
böyük maraqla seçdikləri mövzularda problemləri və onun
həlli yollarını şəkil, diaqram və cədvəllər üzrə
məntiqə söykənərək elmi şəkildə təhlil etdilər.
Bölmə rəhbərlərinin müzakirələrin yekununa dair
hesabatlarından sonra yazılmış işlərdən ən yaxşıları
fəxri fərmana layiq görüldü və onlardan bir neçəsinin
AMİ-də keçiriləcək Tələbə Elmi Tədqiqat işlərinin VII
konfransına göndərilməsi qərara alındı. |
