Aprelin
11-də Moskva Dövlət Beynəlxalq Münasibətlər İnstitutunun
(MDBMİ) rektoru, akademik Anatoli Torkunov Azərbaycan
Diplomatik Akademiyasının (ADA) birinci Fəxri doktoru
adına layiq görülmüşdür.
ADA-nın rektoru, Azərbaycanın xarici işlər nazirinin
müavini Hafiz Paşayev demişdir: "Biz ADA ilə MDBMİ
arasındakı əməkdaşlığı çox yüksək qiymətləndiririk. Ali
məktəblərimiz arasında tələbə-müəllim mübadiləsinə dair
əməkdaşlıq mövcuddur. Belə əməkdaşlıq Azərbaycan ilə
Rusiya arasında əlaqələrin möhkəmlənməsinə töhfə verir".
Bu günlər Bakıda MDBMİ məzunlarının I Ümumdünya
forumunun keçirildiyini bildirən H.Paşayev demişdir:
"Hesab edirəm ki, birinci forumun keçirilməsi yeri kimi
Bakı təsadüfən seçilməmişdir. Ona görə ki, MDBMİ-nin
çoxlu sayda məşhur məzunları arasında məhz Azərbaycan
Prezidenti İlham Əliyev xüsusi yer tutur. O, MDBMİ-nin
dövlət başçısı olan yeganə məzunudur. Prezidentimiz bu
institutda oxumuşdur. O, ömrünün təxminən 15 ilini bu
ali məktəbə həsr etmişdir".
ADA-nın rektoru demişdir ki, bu gün həm də ona görə
əlamətdardır ki, ADA-nın Elmi Şurasının qərarı ilə
A.Torkunova akademiyanın Fəxri doktoru adı verilmişdir.
H.Paşayev bildirmişdir ki, A.Torkunov da MDBMİ-nin
məzunudur. O, həmin ali məktəbin beynəlxalq münasibətlər
fakültəsini bitirmiş, müəllimlikdən MDBMİ-nin
rektorunadək yüksəlmişdir. A.Torkunov siyasi elmlər
doktoru, çoxsaylı məqalə və kitabların müəllifidir.
MDBMİ-nin rektorunun zəngin diplomatik fəaliyyət
təcrübəsi də vardır. O, SSRİ-nin KXDR və ABŞ-dakı
diplomatik nümayəndəliklərində işləmişdir.
Sonra H.Paşayev ADA-nın Fəxri doktoru diplomunu Anatoli
Torkunova təqdim etmişdir. A.Torkunov bu ada ADA Elmi
Şurasının qərarı ilə elmin və təhsilin inkişafında
xidmətlərinə, Azərbaycan ilə Rusiya arasında əlaqələrin
möhkəmlənməsinə töhfəsinə görə layiq görülmüşdür.
MDBMİ-nin rektoru demişdir: "ADA-nın birinci Fəxri
doktoru şərəfinə layiq görülməyim məni çox mütəəssir
etdi". Belə bir universitetin yaradılmasının böyük
nailiyyət olduğunu vurğulayan A.Torkunov demişdir: "Biz
əməkdaşlıq haqqında Memorandum imzalayanda əvvəlcə
tələbə-müəllim mübadiləsi səviyyəsində əməkdaşlıq
aparmışıq. Lakin hazırda birgə tədris proqramları, ilk
növbədə, magistr proqramları yaratmaq üçün hər cür
şərait vardır. Bu, magistrlərimizə həm ADA-nın, həm də
MDBMİ-nin diplomlarını almaq imkanı verəcəkdir".
MDBMİ-nin rektoru ADA-nın tələbələri qarşısında
"Böhrandan sonra dünyada beynəlxalq münasibətlər:
Moskvadan baxış" mövzusunda mühazirə ilə çıxış etmişdir.
A.Torkunov Rusiya-Azərbaycan əlaqələrindən danışarkən
vurğulamışdır ki, bu əlaqələr möhkəm zəmin üzərində
qurulmuşdur. Onun fikrincə, həmin münasibətlərin ən
mühüm amili sabit humanitar əlaqələr, fəal iqtisadi
əməkdaşlıqdır. O demişdir: "Rusiya ilə Azərbaycan öz
mənafelərinə sadiqliyi qoruyub saxlayır, beynəlxalq
məsələlərdə kompromis əldə etmək sahəsində qonşu
ölkələrə nümunə göstərirlər".
A.Torkunovun fikrincə, dünya böhranı bir sıra meyil və
proseslərin inkişafında müəyyən sərhəd rolunu
oynamışdır. O demişdir: "Böhran zamanı bir sıra ölkələr,
o cümlədən Rusiya, zənnimcə, Azərbaycan üçün
"təhlükəsizlik balışı" energetikadan gələn gəlirlər
olmuşdur". MDBMİ-nin rektoru hazırda Koreya
yarımadasında yaranmış vəziyyətlə bağlı fikirlərini də
bölüşmüşdür.
AzərTAc |