|
 Mikayıl
Çingiz oğlu Cabbarov 1976-cı il sentyabrın 19-da Bakı
şəhərində anadan olmuşdur.
1992-ci ildə Bakı Dövlət Universitetinin beynəlxalq
hüquq fakültəsinə daxil olmuş, 1997-ci ildə fakültəni
fərqlənmə diplomu ilə bitirmişdir.
1997-1998-ci illərdə ABŞ-ın Kaliforniya ştatının
Sakramento şəhərindəki Pasifik Universitetinin Macgeorge
hüquq məktəbində hüquq, 2004-cü ildə isə Azərbaycan
Dövlət İqtisad Universitetində iqtisadiyyat üzrə magistr
dərəcələri almışdır.
1999-cu ildən ABŞ-ın Nyu-York ştatında Vəkillər
Kollegiyasının (New York Bar) üzvüdür.
Əmək fəaliyyətinə 1995-ci ildən bank sektorunda başlamış,
1999-2002-ci illərdə hüquq şirkəti və özəl sektorda
hüquqşünas kimi fəaliyyət göstərmişdir.
2002-2003-cü illərdə iqtisadi inkişaf nazirinin müşaviri,
2003-2004-cü illərdə Azərbaycanda İxracın və
İnvestisiyaların Təşviqi Fondunun (AZPROMO) prezidenti
vəzifələrində çalışmışdır.
Azərbaycan Respublikası Prezidentinin 2004-cü il 20
fevral tarixli Sərəncamı ilə iqtisadi inkişaf nazirinin
müavini vəzifəsinə təyin edilmişdir. Həmin vəzifədə
işlədiyi dövrdə beynəlxalq maliyyə qurumları ilə
əməkdaşlıq, xarici iqtisadi əlaqələr, xarici investisiya
siyasəti, beynəlxalq arbitrajlarda hüquqi məsələləri və
korporativ idarəetmə kimi fəaliyyətlərin
əlaqələndirilməsini həyata keçirmişdir.
Azərbaycan Respublikası Prezidentinin 2009-cu il 6 mart
tarixli Sərəncamı ilə Nazirlər Kabineti yanında "İçərişəhər"
Dövlət Tarix-Memarlıq Qoruğu İdarəsinin rəisi vəzifəsinə
təyin edilmişdir.
İctimai həyatda fəal rol oynayır. 1996-1997-ci illərdə
Azərbaycan Gənclər Təşkilatları Forumunun sədr müavini
seçilmişdir. "Nə? Harada? Nə vaxt?" və "Brey Rinq"
oyunlarının fəal üzvü olmuşdur.
1994-1997-ci illərdə "Atəşgah" Bakı Bilicilər Klubunun
prezidenti olmuşdur.
Müxtəlif illərdə MDB və dünya çempionu adını
qazanmışdır. 1997-ci ildə Rusiyanın 1-ci kanalında
yayımlanan "Nə? Harada? Nə vaxt?" oyununda Azərbaycandan
olan ilk bilici olmuşdur.
Evlidir, 2 övladı var.
Azərbaycan Respublikası Prezidentinin 2013-cü il 19
aprel tarixli Sərəncamı ilə Azərbaycan Respublikasının
təhsil naziri təyin edilmişdir. |
