|
 22-24
aprel 2013-cü il tarixlərində Bakıda Azərbaycan
Respublikası ilə İSESKO arasında əməkdaşlıq proqramı
çərçivəsində "Ali təhsil müəssisələri üçün tədris
planları və kurikulumların hazırlanması, insan
ehtiyatları və universitetlərin idarə olunması" mövzusu
üzrə milli seminar keçirilmişdir. 3 gün davam edən
tədbirdə yerli mütəxəssislərlə yanaşı İSESKO-nun
nümayəndəsi Dr.Məhəmməd Helal və Malayziyanın Beynəlxalq
İslam Universitetinin nəzdində Təhsil Problemləri
İnstitutunun professoru Dr.Nik Ahmad Hişam da iştirak
etmişlər.
Qeyd edək ki, tədbirin əsas məqsədi ali təhsil
müəssisələri üçün fənn kurikulumlarının hazırlanması,
təhsilin keyfiyyətinin planlaşdırılması, ali təhsil
müəssisələrinin idarə olunmasında yeni tendensiyaların
tətbiqi, universitetlərlə iş adamları arasında
əməkdaşlıq, elmi-tədqiqat işlərinin planlaşdırılması,
doktorantura təhsilində islahatlar və digər məsələlərin
müzakirəsindən ibarət olmuşdur.
Tədbirdə çıxış edən Təhsil Nazirliyinin Elm şöbəsinin
müdiri Gültəkin Hüseynova nəzərə çatdırmışdır ki,
seminar bizə imkan verəcək ki, müstəqillik illərində
Azərbaycan təhsil sisteminin keçdiyi yola bir daha nəzər
salaq, bu yolda olan çətinlikləri, yaranmış problemləri
və əldə olunan nəticələri təhlil edək, gələcək
perspektivləri müəyyənləşdirək. 1999-cu ildə Azərbaycan
Respublikası Prezidentinin sərəncamı ilə təsdiq edilmiş
"Təhsil sahəsində İslahat Proqramı" ölkəmizdə təhsilin
inkişaf strategiyasını və islahatların mərhələlərini
müəyyənləşdirmişdir. Ulu öndər Heydər Əliyevin
rəhbərliyi dövründə ölkəmizdə Azərbaycan gənclərinin
elmə, təhsilə yiyələnməsi və hərtərəfli inkişafı üçün
geniş imkanlar açılmışdır. G.Hüseynova bildirmişdir ki,
hazırda "Elm haqqında" qanun layihəsi hazırlanır və
artıq Milli Məclisin müvafiq komitəsi həmin layihəni
müzakirə üçün ali təhsil və elmi tədqiqat-müəssisələrinə
göndərmişdir.
Seminarda yerli mütəxəssislər və Malayziyadan gəlmiş
ekspertin - Nik Ahmad Hişam İsmailin iştirakı ilə ali
təhsilin müqayisəli təhlili aparılmışdır.
Seminarın sonunda iştirakçılara sertifikatlar təqdim
edilmişdir.
Niyazi RƏHİMOV |
