Azərbaycan
Müəllimlər İnstitutunun Qazax filialında ulu öndərimiz
Heydər Əliyevin anadan olmasının 90 illik yubileyi ilə
əlaqədar kompleks tədbirlər həyata keçirilməkdədir.
Filialda ümummilli liderimizin həyat və fəaliyyətinin
müxtəlif dövrlərini əks etdirən zəngin guşə və sərgi
fəaliyyət göstərir. Burada düzənlənən tədbirlərdən öncə
dahi şəxsiyyətin şərəfinə Qazax şəhərində ucaldılmış
abidənin də ziyarəti ənənəyə çevrilmişdir. Yubiley
çərçivəsində ali təhsil müəssisəsində reallaşdırılan
"Heydər Əliyevin ideya-nəzəri irsində insan amili"
mövzusunda elmi-praktik konfrans iştirakçıları ənənəyə
sadiq qalmaqla ulu öndərin xatirəsinə rəğbət və
məhəbbətlərini bir daha nümayiş etdirmişlər.
Konfransı giriş sözü ilə Qazax Rayon İcra Hakimiyyəti
başçısının müavini Gülayə Həsənova açaraq bildirmişdir
ki, Heydər Əliyev Azərbaycan xalqının, bütövlükdə türk
dünyasının yetirdiyi nadir tarixi şəxsiyyətlərdəndir.
Onun görkəmli dövlət xadimi, mahir siyasətçi və
təşkilatçı kimi nəsillərə miras qoyduğu irs bənzərsiz
zəngin xəzinədir. Bu xəzinədə toplanan nə varsa, ilk
növbədə, xalqımızın, cəmiyyətimizin, insanların
inkişafına, rifah halının yüksəlməsinə xidmət edir.
Qazax rayonunun sakinləri də bunu öz şəxsi həyatlarında,
bölgənin hərtərəfli tərəqqisində görür, duyur və
dəyərləndirirlər.
AMİ-nin Qazax filialının direktoru, dosent Afaq
Qasımovanın məruzəsində ümummilli liderin Azərbaycana
rəhbərlik etdiyi iki müxtəlif dövrün konkret faktlarla
xarakteristikası verilmişdir. O demişdir ki, Heydər
Əliyev həyat və fəaliyyətinin bütün dövrlərində
xalqımız, respublikamız, Azərbaycan və azərbaycanlılar
barədə düşünmüş, tərəqqiyə aparan yolların nəzəri
əsaslarını müəyyənləşdirməklə kifayətlənməmiş, bunların
reallığa uyğunluğunu praktik həyatda sübuta yetirmişdir.
Məruzədə ulu öndərin milli istiqlalımızın bərpasında və
qorunmasında, Azərbaycanın beynəlxalq miqyasda nüfuzunun
yüksəlişində, dünya dövlətləri sırasında layiqli yerini
tutmasındakı yorulmaz səyləri ətraflı təhlil olunmuşdur.
Məruzəçi Heydər Əliyev irsinin fövqündə insana, onun
hərtərəfli inkişafına diqqət və qayğının dayandığını
vurğulamış, bunun müsbət nəticələrini təhsil sisteminin
inkişafında da göstərdiyini demişdir. A.Qasımova dahi
şəxsiyyətin vəsiyyətlərinə daim layiqincə əməl
olunduğunu, onun yaratdığı təməllərin daha da
möhkəmləndirildiyini nəzərə çatdırmış, Azərbaycan
Respublikasının Prezidenti İlham Əliyev cənablarının
şəxsində xalqımızın etibarlı varisə, dövlət xadiminə
malik olmasından qürur duyduğunu demişdir.
Sonra məruzə ətrafında çıxışlar olmuşdur. Filialın
dosenti Məmməd Yusifov, kafedra müdiri İradə Arixova,
baş müəllim Aygün Əliyeva, tələbələrdən Pərviz Bayramov
və başqaları mövzunun müxtəlif aspektləri ətrafında
fikir və mülahizələrini səsləndirmiş, Heydər Əliyev
fenomeninin onların həyat amalı olduğunu söyləmişlər.
Konfransda təhsildə və ictimai işlərdə fərqlənən 27
tələbəyə filial rəhbərliyinin fəxri fərmanları təqdim
olunmuşdur. Tədbirin sonunda konfrans iştirakçıları
adından Azərbaycan Respublikasının Prezidenti İlham
Əliyev cənablarına müraciət ünvanlanmışdır. Müraciətdə
dövlət başçısının daxili və xarici siyasətinin
bəyənildiyi bildirilir və ali məktəbin müəllim-tələbə
kollektivinin növbəti Prezident seçkilərində onu
yekdilliklə dəstəkləyəcəyi göstərilir. |