|
 Son
illərdə respublikamızda qabiliyyətli, istedadlı
şagirdlərin aşkar edilməsi və inkişaf etdirilməsi
istiqamətində müəyyən işlər görülür, müvafiq tədbirlər
həyata keçirilir. İstedadlı şagirdlərin üzə çıxarılması
və inkişaf etdirilməsində fənn olimpiadalarının və
beynəlxalq layihələrin rolu da inkaredilməzdir.
İstedadlı şagirdlərin təhsil aldığı lisey və
gimnaziyaların ali təhsil müəssisələri ilə işgüzar
əlaqələrinin yaradılması daim diqqət mərkəzindədir. Bu
cür təhsil ocaqlarından biri də Bakının Nizami rayonunda
yerləşən "Zəngi" liseyidir. "Zəngi" liseyinin əsas
məqsədi istedadlı uşaqların intellektual və yaradıcı
potensialının üzə çıxarılması və inkişafı, onların
şəxsiyyətinin yüksək mənəvi və mədəni dəyərlərə
əsaslanaraq formalaşdırılmasıdır. Liseydə 2008-ci ildən
"Kiçik akademiya" fəaliyyət göstərir. Şagirdlərimiz
burada sərbəst idarəçilik, təşkilatçılıq, araşdırma və
qərarvermə qabiliyyətlərinə yiyələnirlər. Bu da
şagirdlərin müasir, daima inkişafda olan ölkəmizin
tələblərinə uyğun şəkildə yetişdirilməsinə gətirib
çıxarır. Liseydə keçirilən şagird elmi konfransları
artıq çoxdan bu təhsil ocağının nümunəvi bir ənənəsinə
çevrilib. Şagirdləri elmi tədqiqatlara həvəsləndirmək,
onlarda ilkin tədqiqatçılıq bacarıq və vərdişləri
formalaşdırmaq məqsədi daşıyan elmi konfranslar liseydə
hər il may ayında keçirilir. Elmi tədqiqatlara
həvəsləri, maraqları olan, gələcəkdə özlərini elmdə
görməyi arzulayan şagirdlər müəllimlərinin rəhbərliyi
altında müxtəlif fənlərdən hazırladıqları elmi
məruzələrlə tanınmış alimlər qarşısında çıxışlar edərək
hesabat verirlər. Qeyd etmək lazımdır ki, liseyin
şagirdləri dəfələrlə müxtəlif milli və beynəlxalq
yarışmaların qalibləri olmuşlar. Hər il onlar müxtəlif
milli və beynəlxalq tədris layihələrində, idman və digər
yaradıcı yarışmalarda iştirak edib müvafiq yerlər və
mükafatlar qazanırlar.
2012-2013-cü tədris ilində liseyimiz daha böyük uğurlara
imza atmışdır. Belə ki, liseyin 4 şagirdi: IX sinif
şagirdi Kənan Quluzadə Respublika fənn olimpiadalarında
Azərbaycan dili və ədəbiyyat fənni üzrə IV yerə, XI
sinif şagirdi Aytac Dəmirçibəyli biologiya fənni üzrə II
yerə, IX sinif şagirdi Zəhra Bağırova Azərbaycan dili və
ədəbiyyat fənni üzrə IV yerə və XI sinif şagirdi Yusif
Məmmədov riyaziyyat fənni üzrə III yerə layiq
görüldülər.
Liseydə hər dərs ilinin sonunda mötəbər qonaqların
iştirakı ilə təşkil olunmuş təqdimat mərasimi keçirilir.
Bu mərasimlərdə olimpiadalarda, yerli və beynəlxalq
yarışlarda uğurlar qazanan şagirdlərimizlə görüşlər
keçirilir, onlara müdiriyyət tərəfindən qiymətli
hədiyyələr, fəxri fərmanlar təqdim olunur. Bu cür
yaddaqalan görüşlərdən biri də bu il aprelin 13-də
keçirilən tədbirdir. Tədbirdə YAP Nizami rayon
təşkilatının sədri, Milli Məclisin deputatı Sədaqət
Vəliyeva, BDU-nin professorları Rövşən Xəlilov, İsmət
Əhmədov, "İki sahil" qəzetinin redaktoru, "Zəngi"
liseyində VMA-nın prezidenti Vüqar Rəhimzadə və liseyin
müəllim-şagird kollektivi iştirak edirdi. Liseyin
direktoru Bayram Heydərov mərasimi açaraq iştirakçıları
salamlamış və belə bir vacib məqamı diqqətə çatdırmışdır
ki, bu tədbir müstəqil Azərbaycan dövlətinin banisi,
ümummilli lider Heydər Əliyevin anadan olmasının 90-cı
ildönümünün qeyd olunduğu günlərə təsadüf edir və bu
bizi çox sevindirir. Daha sonra tədbir iştirakçılarına
məktəblilər arasında keçirilmiş fənn olimpiadaları,
beynəlxalq müsabiqələr haqqında ətraflı məlumat verən
Bayram Heydərov bildirdi ki, bilik yarışları şagirdlər
arasında sağlam rəqabətin yaranmasına, keyfiyyətli
təhsil almağa marağın güclənməsinə səbəb olur. Tədbirin
sonunda B.Heydərov olimpiada və beynəlxalq müsabiqə
qaliblərini, bu şagirdlərin biliklərə dərindən
yiyələnməsində xüsusi əməyi olan müəllimləri təbrik
etmiş, şagirdlərə elmin çətin, lakin şərəfli yollarında
inamla addımlayaraq daha böyük uğurlar, yeni-yeni
nailiyyətlər qazanmağı arzuladı. Sonra qaliblərə diplom
və hədiyyələr təqdim olunmuşdur.
Artıq iki ildir ki, "Zəngi" liseyinin şagirdləri
məktəblilər arasında keçirilən "Ətraf mühitin
mühafizəsi" (İNEPO-Euroasia) Beynəlxalq Layihə
Olimpiadasında iştirak edərək bürünc medala layiq
görülürlər. Şagirdlərimiz öz layihələrinə çox
məsuliyyətlə yanaşaraq maraqlı nəticələr əldə edirlər.
2012-ci ildə bu olimpiadada şagirdlərimiz - Fidan
Abdullayeva (VIII sinif) və Rauf Rəhimzadənin (X sinif)
qalib olduqları layihə mövzusu ətraf mühitin qorunmasına
həsr olunmuşdu. 2013-cü ildə isə Aynur Nadirli (IX
sinif) və Orxan Qasımlı (XI sinif) dünyanın ən aktual
problemi sayılan alternativ enerji mənbəyindən bəhs edən
layihələrinə görə bürünc medala layiq görülmüşlər.
8-9 fevral 2013-cü il tarixlərində keçirilən "Sabahın
alimləri" II Respublika müsabiqəsində iştirak edən
"Zəngi" liseyinin IX sinif şagirdi Telarə Əlibəyli öz
tədqiqat layihəsi ilə uğur əldə etmiş və "Biologiya"
nominasiyası üzrə II yeri tutub gümüş medala layiq
görülmüşdür. Şagirdlərimizin bu müsabiqələrdə iştirak
edərək yüksək nəticələr göstərməsində onlara AMEA
Botanika İnstitutunun əməkdaşları və BDU-nun biofizika
kafedrasının professoru Rövşən Xəlilov tərəfindən elmi
dəstək verilmiş, o cümlədən sagirdlərə həmin təhsil
ocaqlarının laboratoriyalarındakı müasir
avadanlıqlardan istifadə etmək imkanı yaradılmışdır.
Qeyd etmək istərdim ki, 2012-2013-cü tədris ilində
liseyimizin şagirdləri 3 beynəlxalq müsabiqə və
olimpiadada iştirak ediblər. Şagirdlərin bu kimi bilik
yarışlarında iştirakı onların elmə marağını artırır.
Onlar dərk edirlər ki, bu gün aldıqları bilikləri sabah
necə tətbiq edəcəklər. Layihələr üzərində işləyən
şagirdlər maraqlı ideyalar irəli sürürlər və mən elmi
rəhbər kimi bu işlərin təşkili üçün öz məsləhətlərimi
verib, daima nəzarət edirəm. Həmçinin daim axtarışlar
aparan şagirdlərimiz tədqiqatçı alimlərlə,
mütəxəssislərlə əməkdaşlıq edərək maraqlı nəticələr əldə
edirlər. Doğrusu, bu müsabiqələrdə mən də şagirdlərlə
bərabər həyəcanlanıb, onlarla bərabər sevinirəm. Ən
həyəcanlı anlarımız isə finalda qaliblərin elan edildiyi
anlar olur. Mən əminəm ki, bu kimi olimpiadalar və
müsabiqələr şagirdlərin həyatında xüsusi iz buraxacaq
və gələcək işlərində də mütləq bir təkan olacaq.
Gülnarə SƏFƏROVA,
Bakı şəhəri "Zəngi"liseyinin təmayül üzrə direktor
müavini,
biologiya elmləri üzrə fəlsəfə doktoru,
"Ən yaxşı müəllim" müsabiqəsinin (2008-2009-cu dərs ili)
qalibi |
