Bakıdakı 7 nömrəli tam orta məktəbdə Korrupsiyaya
Qarşı Mübarizə Fondunun təşəbbüsü ilə "Korrupsiya
anlayışı və onun neqativ nəticələri" mövzusunda
şagirdlər arasında maarifləndirici dərs
keçirilmişdir.
Korrupsiyaya Qarşı Mübarizə Fondunun icraçı direktoru
Vasif Mövsümov bildirmişdir ki, orta məktəb şagirdləri
arasında antikorrupsion dərslər keçirməklə bağlı layihə
hazırlanmışdır. Bu layihənin məqsədi şagirdləri
korrupsiya kimi sosial bəla ilə tanış etmək,
korrupsiyaya qarşı cəmiyyətdə dözülməz münasibət
formalaşdırmaq və müqavimət göstərməyə imkan yaradan
sosial bacarıqlara yiyələnməkdə onlara kömək etməkdir.
Korrupsiyaya Qarşı Mübarizə Fondunun hüquqşünası
Nəzirməmməd Kazımov çıxışında qeyd etmişdir ki, layihə
çərçivəsində keçiriləcək dərslər şagirdləri
"korrupsiya" anlayışı ilə bağlı maarifləndirmək və
korrupsiyaya qarşı müqavimət üsulları barədə təsəvvür
yaratmaq kimi məqsədlərə xidmət edir.
Çıxışlardan sonra "Korrupsiya anlayışı və onun neqativ
nəticələri" ilə əlaqədar şagirdlər arasında geniş
fikir mübadiləsi aparılmışdır. Bu müzakirələrdə
şagirdlərdən Süleyman Əliyev, Cavad Rəhimov, Namiq
Rəsulov daha fəal iştirak etmişlər.
Maarifləndirici dərs diskussiya şəklində başa çatmışdır.
Şakir CƏFƏROV |