|
 4
nömrəli Bakı Peşə Liseyindən aldığımız məlumata görə, bu
il aprelin 8-dən 12-dək Ukrayna Respublikasının Lvov
şəhərindəki dizayn və inşaat peşə liseyində "Gipskarton
konstruksiyalarının quraşdırıcısı" ixtisası üzrə peşə
liseylərinin ustaları və şagirdləri arasında "Knauf"
"Gipskarton Konstruksiyaları quraşdırıcısı" (MGK) - 2013
- Ukrayna" mövzusunda beynəlxalq müsabiqə keçirilmişdir.
Müsabiqə Ukrayna Təhsil və Elm, Gənclər və İdman
Nazirliyi, Ukrayna Pedaqoji Elmlər Milli Akademiyası,
Lvov vilayəti administrasiyasının dəstəyi ilə "Knauf
Servis Ukrayna" təşkilatı və Lvov dizayn və inşaat peşə
liseyi tərəfindən təşkil olunmuşdur. Müsabiqənin açılış
mərasimində Ukrayna Knauf şirkəti müəssisələrinin, MDB
Knauf Akademiyasının, Ukrayna Təhsil və Elm, Gənclər və
İdman Nazirliyi Peşə Təhsili Departamentinin, Ukrayna
Pedaqoji Elmlər Milli Akademiyası Texniki Peşə Təhsili
İnstitutunun, Lvov vilayəti administrasiyasının
nümayəndələri, Ukrayna Knauf resurs mərkəzlərinin
əməkdaşları iştirak etmişlər.
Müsabiqə iştirakçıların peşə hazırlığının keyfiyyətinin,
eləcə də gipskarton konstruksiyaları quraşdırıcılarının
hazırlanması üzrə bölgələrin Knauf mərkəzlərinin
reytinqini müəyyənləşdirmək məqsədi daşımışdır.
Müsabiqədə 24 komanda iştirak etmişdir. Onlardan 20-si
Ukrayna bölgələrinin Knauf mərkəzlərini, 4-ü isə MDB
ölkələrinin təmsilçiləri olmuşdur.
Respublikamızdan müsabiqədə 4 nömrəli Bakı Peşə
Liseyinin nəzdində yaradılmış və artıq ikinci ildir ki,
fəaliyyət göstərən Knauf resurs mərkəzinin təmsilçiləri
- istehsalat təlimi ustası Bəybala Abasov və şagird
Mahmud Cəfərli iştirak etmişlər.
Müsabiqə nəzəri və praktik olmaqla 2 turda
keçirilmişdir. Nəzəri turda iştirakçılara
"Materialşünaslıq", "Gipskarton konstruksiyalarının
quraşdırılması", "Əməyin mühafizəsi" fənləri üzrə
bilikləri əhatə edən 60 test tapşırığı təqdim
olunmuşdur. Nəzəri turu komanda (usta və şagird) bir
kompüterdə yerinə yetirmişdir. Qiymətləndirmə kompüter
vasitəsi ilə aparılmışdır. Nəzəri tur üzrə balların
maksimum miqdarı hər bir düzgün cavab üçün 0,5 bal
olmaqla 30 bal təşkil etmişdir. Komandamız nəzəri turdan
22 bal yığmışdır.
Memarlıq-dekorativ konstruksiyanın çertyoj üzrə
qurulmasını, düzbucaqlı oyuqlu konstruksiyanın
yarımdairəvi sütunun elementlərinin ardıcıllıqla tam
yığılmasını, məcunlanmasını tamamlamaqdan ibarət olan
praktik tur üzrə balların maksimum miqdarı isə 78
olmuşdur. 4 əsas texnoloji mərhələni özündə birləşdirən
praktik tur üzrə tapşırığın yerinə yetirilməsinə 12 saat
vaxt ayrımış və o, 3 gün davam etmişdir.
Müsabiqə iştirakçıları konstruksiyanı hazırlamaq üçün
lazım olan iş yeri, avadanlıq və materiallarla təmin
olunmuşlar. Turun gedişi münsiflər heyətinin və
təşkilat komitəsinin üzvləri tərəfindən müşahidə edilmiş
və nəticələrin qiymətləndirilməsi aparılmışdır.
Komandamız bu turda 78 mümkün baldan 73,5-ni və iki
turun yekununa əsasən 95,5 bal toplayaraq II yerə layiq
görülmüşdür. Komandamızın üzvləri beynəlxalq müsabiqənin
fəxri diplomu ilə təltif olunmuşlar.
4 nömrəli Bakı Peşə Liseyinin direktoru Alik
Allahverdiyev komandanın peşə hazırlığını yüksək
səviyyədə təşkil, liseyin təlim-tərbiyə işləri üzrə
direktor müavini, ixtisas fənn müəllimi Rafik İsmayılov
isə peşə hazırlığını yaxşı təlim etdiklərinə görə "Knauf
MGK-2013 - Ukrayna" Beynəlxalq müsabiqənin
təşkilatçıları tərəfindən tərifnamə ilə təltif
olunmuşlar.
Sonda onu da xatırladaq ki, 4 nömrəli Bakı Peşə
Liseyinin komandası sözügedən müsabiqədə II yeri tutduğu
üçün bu ilin iyulunda Rusiyanın Nijni-Novqorod şəhərində
keçiriləcək tədbirə qatılacaq.
Yusif ƏLİYEV |
