|
 Mayın
3-də Bakıdakı Avropa otelində "Kənd Təsərrüfatı
Sahəsində İlkin Peşə Təhsilinin Möhkəmləndirilməsi"
Aİ-Tvininq layihəsi üzrə yekun konfrans keçirilmişdir.
Konfransda Təhsil Nazirliyinin Texniki peşə təhsili
şöbəsinin müdiri Namiq Məmmədov, missiya rəhbərinin
müavini Volfgang Mössinger, ekspertlər, peşə təhsili
müəssisələrinin rəhbərləri və digər şəxslər iştirak
edirdilər.
Qeyd edək ki, Avropa İttifaqının maliyyə dəstəyi ilə
Azərbaycan Respublikası Təhsil Nazirliyi və Almaniya
Qida, Kənd Təsərrüfatı və İstehlakçının Müdafiəsi
Federal Nazirliyinin birgə həyata keçirdiyi Tvininq
layihəsi 21 ay davam etmişdir. Layihə heyəti dörd
komponentin həyata keçirilməsi üzərində çalışmış və
benefisiar ölkənin texniki peşə təhsili və təlimi üzrə
rəhbərliyinə dəstək göstərmişlər. Layihə uğurunun əsas
hissəsi ondan ibarətdir ki, təklif olunmuş peşə
məktəblərindən biri hökumət tərəfindən kənd təsərrüfatı
sahəsində fəaliyyət göstərəcək müasir çoxxidmətli Peşə
Təhsili Mərkəzi kimi qəbul olunmuşdur.
Tədbiri giriş sözü ilə açan Təhsil Nazirliyinin Texniki
peşə təhsili şöbəsinin müdiri Namiq Məmmədov Tvininq
layihəsinin əhəmiyyətindən söz açmışdır. Bildirmişdir
ki, 2011-ci ildə başlayan Tvininq layihəsi çərçivəsində
bir çox nailiyyətlər əldə olunmuşdur. Peşə təhsilinin
inkişafı ilə əlaqədar olaraq həyata keçirilən layihədə
bir çox tədqiqatlar aparılmış, müxtəlif ölkələrə işgüzar
səfərlər edilmişdir. Layihə mütəxəssisləri tərəfindən
kənd təsərrüfatı ixtisasları üzrə yeddi peşə təhsili
standartı tərtib edilmiş və ilk peşə-ixtisas təhsilində
daha geniş və eyni zamanda nəticələrə əsaslanan
yanaşmadan istifadə olunmuşdur. Layihə çərçivəsində icra
olunmuş mühüm fəaliyyətlərdən biri də alman
mütəxəssisləri tərəfindən Aqro-İnformasiya Mərkəzinin
dəstəyi ilə aparılmış əmək bazarının təhlili olmuşdur.
Sorğu kənd təsərrüfatı sahəsində peşə təhsili haqqında
fərdi fikirləri və ehtiyacları öyrənmək, əmək bazarında
əhəmiyyətli mövqeyə malik kənd təsərrüfatı nəticələri
barədə statistik məlumatlar toplamaqdan ibarət olmuşdur.
Sorğuda Azərbaycanın 6 rayonundan ailə-kəndli və böyük
kənd təsərrüfatları müəssisələri iştirak etmişdir.
Bundan başqa, layihə çərçivəsində müxtəlif məktəblərdən
seçilmiş müəllimlər üçün əsas kənd təsərrüfatı
profilləri üzrə ünvanlı təlimlər keçirilmişdir.
Təlimləri müvəffəqiyyətlə bitirmiş müəllimlər və
seçilmiş məktəb rəhbərləri Avropanın qabaqcıl təcrübəsi
ilə yaxından tanış olmaq məqsədilə Sloveniya və
Almaniyada təşkil olunmuş təlimlərdə iştirak etmişlər.
Layihənin uğurla həyata keçirilməsində zəhməti olan hər
bir şəxsə minnətdarlığını bildirən N.Məmmədov
əməkdaşlığın gələcək illərdə də davam etməsindən ümidvar
olduğunu vurğulamışdır.
Konfransda çıxış edən missiya rəhbərinin müavini
Volfgang Mössinger, Avropa İttifaqının Azərbaycandakı
nümayəndəliyinin Əməliyyatlar bölməsinin rəhbəri
Federiko Berna və başqaları layihənin əhəmiyyətindən
danışmışlar.
Tədbirdə Aİ-Tvininq layihəsinin daimi Tvininq müşaviri
Ruediger Heining slaydlar vasitəsilə layihənin
nəticələrinin təqdimatını etmişdir.
Niyazi RƏHİMOV |
