İ.Hacıyev
adına "Tərəqqi" texniki-humanitar təmayüllü liseydə
mayın 4-də keçirilən elmi-praktik konfransda iştirak
edənlər bu təhsil ocağının dərin məzmunlu, yüksək
səviyyəli tədbirlər keçirmək ənənəsini uğurla
yaşatmasına bir daha şahidlik etmişlər.
"Ən böyük azərbaycanlı" mövzusunda olduqca maraqlı və
orijinal formada keçən konfrans Azərbaycan xalqının
ümummilli lideri Heydər Əliyevin 90 illiyinə həsr
olunmuşdu. Liseyə gələn qonaqların diqqətini öncə
birinci mərtəbənin foyesində bu şərəfli yubileyə və gül
bayramına həsr olunmuş stendlər, istedadlı şagirdlərin
ifa etdikləri mahnı və rəqs nömrələri, idmançı
şagirdlərin çıxışları cəlb etmişdir.
YAP Nərimanov rayon təşkilatı Qadınlar Şurasının
təşəbbüsü ilə təşkil olunmuş konfransda rayon icra
hakimiyyətindən, YAP rayon təşkilatından nümayəndələr,
millət vəkilləri iştirak etmişlər.
Konfrans iştirakçıları əvvəlcə liseyin ikinci
mərtəbəsindəki geniş dəhlizdə açılmış sərgi ilə tanış
olmuşlar. Ulu öndər Heydər Əliyevə həsr olunmuş sərgidə
istedadlı şagird və müəllimlərin mövzu ilə bağlı əl
işləri, rəsm əsərləri, referatları, Heydər Əliyevin
həyat və fəaliyyətinə, zəngin irsinə aid fotolar,
kitablar nümayiş olunmuşdur.
"Dəyirmi masa" ətrafında keçən konfransı "Tərəqqi"
texniki-humanitar təmayüllü liseyin direktoru, YAP
Nərimanov rayon təşkilatı Qadınlar Şurası İdarə
Heyətinin üzvü, şuranın sədr müavini Məhbubə Məmmədova
açaraq "Ən böyük azərbaycanlı" mövzusunda geniş məruzə
etmişdir. Məruzə ekranda nümayiş olunan slaydlarla,
liseyin istedadlı şagirdlərinin ifa etdikləri şeir
nömrələri ilə müşayiət olunmuşdur.
Məruzə tarixi müqayisə əsasında qurulmuşdu. Öncə ulu
öndər Heydər Əliyevin "Tarix tarixdir, tariximizin hər
səhifəsi bizim üçün əzizdir. Hər bir azərbaycanlı, hər
bir vətəndaş, hər bir uşaq öz tarixini bilməlidir"
kəlamları diqqətə çatdırılmışdır. M.Məmmədova
tariximizin müxtəlif dönəmlərində yaşamış, xalqımızın
taleyində özünəməxsus izi qalmış şəxsiyyətlər, liderlər,
o cümlədən Babək, Şah İsmayıl Xətai və b. ilə ulu öndər
Heydər Əliyev arasında paralellər apararaq ümummilli
liderin bir şəxsiyyət, dövlət xadimi, siyasətçi kimi
böyüklüyünü sübut etmişdir. Azərbaycanın tarix
salnaməsini kainata bənzədən məruzəçi tariximizin şanlı
səhifələrini yaratmış şəxsiyyətləri bu kainatın parlaq
ulduzları, müasir Azərbaycan dövlətinin banisi,
əbədiyaşar lider Heydər Əliyevi isə günəşi adlandıraraq
ulu öndərin keçdiyi olduqca zəngin həyat yolundan,
ölkəmizin tərəqqisi, xalqımızın rifah halını yüksəltməyi
hədəfə almış çoxtərəfli fəaliyyətindən, dövlətimiz
qarşısındakı böyük xidmətlərindən geniş söz açmışdır.
Heydər Əliyevi tariximizdəki böyük şəxsiyyətlərin
fövqünə yüksəldən keyfiyyətlərini açıb göstərmişdir.
Qeyd olunmuşdur ki, ulu öndərimizi digər liderlərdən
fərqləndirən ən böyük və üstün cəhətlərindən biri də
onun özündən sonra ideya və siyasətini layiqincə davam
etdirən varis qoymasıdır.
Məruzə boyu liseyin istedadlı şagirdlərinin ifa
etdikləri "Şəhid məzarları", "Bir dahi doğulub gəldi
dünyaya", "Dahi liderim" və başqa şeirlər məruzənin
ruhuna uyğun olub onun emosional təsir gücünü daha da
artırmışdır.
Məruzə başa çatandan sonra çıxışlar olmuşdur. Konfransda
söz alan YAP Nərimanov rayon təşkilatının sədri Təmraz
Tağıyev, Milli Məclisin deputatı Elton Məmmədov, YAP
Nərimanov rayon təşkilatı Qadınlar Şurasının sədri
Məhəbbət İbrahimova, Nərimanov Rayon İcra Hakimiyyəti
başçısının müavini İlqar Mirzəyev yüksək səviyyədə
hazırlanmış konfransın ulu öndərin xatirəsinə dəyərli
töhfə olduğunu qeyd etmiş, onun təşkilatçılarına
minnətdarlıqlarını bildirmişlər. Ümummilli lider Heydər
Əliyevin yeritdiyi sülh, quruculuq siyasətinin ayrı-ayrı
məqamlarından, bu siyasətin bəhrəsi olan bugünkü
inkişafımızdan danışdılar.
Yusif ƏLİYEV |