Azərbaycanın
dövlətçilik tarixində müstəsna rol oynayan ulu öndər
Heydər Əliyevin anadan olmasının 90 illiyi münasibətilə
Azərbaycan Respublikası Prezidenti cənab İlham Əliyevin
sərəncamına uyğun olaraq bütün təhsil-tərbiyə
müəssisələrində silsilə tədbirlər həyata keçirilmişdir.
Azərbaycan Dövlət Pedaqoji Universitetinin Qərb
Universiteti ilə birlikdə "Ekoloji problemlər və ekoloji
təhsil", Türkiyənin Hacəttəpə Universiteti və Qafqaz
Universiteti ilə birlikdə "Müəllim hazırlama siyasəti və
problemləri" mövzusunda keçirdiyi konfranslar, bədii
yaradıcılıq festivalları, spartakiadalar ümummilli lider
Heydər Əliyevin xatirəsinə həsr olunmuşdur. Bu ali
məktəbin pedaqoji fakültəsinin professor-müəllim
heyətinin və gənc tədqiqatçıların iştirakı ilə ümummilli
lider Heydər Əliyevin anadan olmasının 90 illik
yubileyinə həsr olunmuş elmi-praktik konfrans
keçirilmişdir.
Konfransı giriş sözü ilə açan pedaqoji fakültənin
dekanı, pedaqoji elmlər doktoru, professor, əməkdar elm
xadimi Fərrux Rüstəmov müasir Azərbaycan dövlətinin
banisi və qurucusu, böyük şəxsiyyət, dünya şöhrətli
siyasi xadim Heydər Əliyevin Azərbaycanın dövlətçilik
tarixindəki misilsiz xidmətlərindən söz açmışdır. Dahi
Heydər Əliyev şəxsiyyətinin Azərbaycan dövlətçilik
tarixində müstəsna yeri olduğu, müdrik rəhbər Heydər
Əliyevin yenidən hakimiyyətə qayıdışı ilə ölkənin
ictimai-siyasi, sosial-iqtisadi, elmi-mədəni həyatında,
habelə beynəlxalq əlaqələrdə ciddi dönüşün yarandığı
qeyd edilmişdir. Azərbaycançılıq məfkurəsinin parlaq
daşıyıcısı kimi Heydər Əliyev öz müdrik siyasəti, dönməz
əqidəsi və tarixi uzaqgörənliyi sayəsində milli
dövlətçilik ideyasının gerçəkləşdirilməsinə, müasir
Azərbaycan dövlətinin qurulmasına və xalqımızın
müstəqillik arzusuna çatmasına nail olmuşdur. Məhz
Heydər Əliyevin fəaliyyəti nəticəsində Azərbaycan özünün
geostrateji, iqtisadi və mədəni potensialından istifadə
edərək Şərqlə Qərb arasında etibarlı körpü rolunu
oynamağa başlamış və dünyanın ən dinamik inkişaf edən
ölkələrindən birinə çevrilmişdir.
Ümummilli
liderin ölkə həyatının bütün sahələrinə, o cümlədən elmə
böyük diqqət yetirdiyini söyləyən natiq hazırda bu
siyasətin ulu öndərin layiqli davamçısı, Prezident İlham
Əliyev tərəfindən uğurla davam etdirildiyini diqqətə
çatdırmışdır.
Respublika Təhsil Şurasının sədri, pedaqoji elmlər
doktoru, professor Əjdər Ağayev "Heydər Əliyev irsində
vətəndaşlıq konsepsiyası" mövzusunda məruzə ilə çıxış
etmişdir.
Məruzədə dahi şəxsiyyət Heydər Əliyev fenomeni, ulu
öndər irsinin istiqamətləri və bu irsdə vətəndaşlıq
konsepsiyasının mahiyyəti, məzmunu və elmi-nəzəri
əsasları, Heydər Əliyevin vətəndaşlıq konsepsiyasının
milli tərbiyənin metodoloji əsası kimi əhəmiyyətindən
danışılmışdır. Qeyd edilmişdir ki, mükəmməl elmi-nəzəri
və faydalı praktik əhəmiyyət kəsb edən ümummilli lider
Heydər Əliyevin irsi zəngin mənbədir.
Konfransın plenar iclasında çıxış edən digər natiqlər -
professor S.Həmidov, professor S.Quliyev ümummilli
liderin müstəqil Azərbaycan dövlətinin
möhkəmlənməsindəki tarixi xidmətlərini bir daha
xatırlatmış və Heydər Əliyev şəxsiyyətinin xalqımızın
qəlbində əbədi yaşayacağını vurğulamışlar.
Konfransda "Heydər Əliyevin irsində təhsil-tərbiyə
məsələləri", "Heydər Əliyev və milli mədəniyyətin
inkişafı", "İbtidai siniflərdə riyaziyyat təliminin
müasir problemləri", "İbtidai siniflərdə rus dilinin
tədrisinin müasir problemləri", "Musiqi təhsilinin
müasir problemləri" bölmələrində müzakirə edilən 150-yə
yaxın məruzə mətni kitab şəklində nəşr olunaraq tədbir
iştirakçılarına çatdırılmışdır.
Şakir CƏFƏROV |