|
 Azərbaycan
xalqının ümummilli lideri, böyük siyasətçi və dövlət
xadimi Heydər Əliyevin 90 illik yubileyi Bakının
Binəqədi rayonunda yerləşən E.Sultanov adına 217 nömrəli
tam orta məktəbdə də təntənə ilə qeyd olunmuşdur. Bu
münasibətlə məktəbdə "Ulu Heydər, qalx ayağa, oyan, dur"
mövzusunda ədəbi-bədii tədbir keçirilmişdir.
Tədbir Dövlət himninin ifası ilə başlanmış, ulu öndərin
xatirəsi bir dəqiqəlik sükutla yad olunmuşdur. Tədbirdə
giriş sözü söyləyən məktəbin direktoru Bənövşə Cəfərova
ümummilli lider Heydər Əliyevin müstəqil Azərbaycanın
yaradılması, dövlətçiliyimizin möhkəmləndirilməsi, dünya
azərbaycanlılarının milli birliyinə nail olunması,
ölkəmizdə iqtisadi tərəqqinin əsasını qoymuş neft
müqavilələrinin imzalanması, həyatın bütün sahələrinin
inkişafına hədəflənmiş islahatların həyata keçirilməsi,
o cümlədən təhsilimizi yeni keyfiyyət mərhələsinə
yüksəldən islahat proqramının hazırlanması və yerinə
yetirilməsi sahəsindəki misilsiz xidmətlərindən,
yeritdiyi müdrik daxili və xarici siyasətdən danışmış,
ulu öndərin Azərbaycan xalqının yaddaşında əbədi
yaşayacağını vurğulamışdır. Məktəbin XI "a" sinif
şagirdi Sənəm Hüseynova Heydər Əliyevə həsr olunmuş şeir
söyləmişdir. Sonra meydan II "b" sinfinin şagirdlərinə
verilmişdir. Onlar müəllimləri və sinif rəhbərləri Əfşan
Abdullayevanın köməyi ilə hazırladıqları "Qalx ayağa,
oyan, dur, ulu öndər" adlı ədəbi-bədii kompozisiya
nümayiş etdirmişlər.
Tədbirin gedişində VIII sinif şagirdləri arasında ulu
öndərin həyat və fəaliyyətinə həsr olunmuş viktorina
keçirilmişdir. Məktəbin tarix müəllimi Gülxanım
Hüsüyevanın hazırladığı viktorinada VIII "b" sinfinin
şagirdi Ayxan Usubov qalib gələrək mükafata layiq
görülmüşdür.
Sonra çıxış edən qəsəbə ağsaqqallar şurasının üzvü
İsmayıl Məmmədov və məktəbin direktor müavini Zərifə
Yusifova tədbirin maraqlı və yaddaqalan olduğunu qeyd
etmiş və təşkilatçılara minnətdarlıqlarını
bildirmişlər.
Y.ƏLİYEV |
