Bakıdakı
8 nömrəli tam orta məktəbdə I "c" sinif şagirdlərinin
sevincinin həddi-hüdudu yox idi. Çünki onlar ilk dəfə
idi ki, yaddaşlarından silinməyəcək bir tədbirdə -
"Əlifba" bayramında iştirak edəcəkdilər. Nəhayət,
mehriban, gülərüz çiçək balalar "Koroğlu" operasının
uvertürasının sədaları altında zövqlə, bayramsayağı
bəzədilmiş salona daxil oldular. Bayram şənliyinə
toplaşan müəllimlər, qonaqlar, valideynlər balaca
fidanları səmimiyyətlə qarşıladılar. Birincilər öncə
Dövlət himnini ifa etdilər.
Onlar ümummilli lider Heydər Əliyevin uşaqlar haqqında
söylədiyi xoş sözləri səsləndirdilər. Ulu öndərin
anadan olmasının 90 illik yubileyinə həsr olunmuş
şeirlər, bayatılar söylədilər, mahnılar ifa etdilər.
Sonra şagirdlərdən Ülvi, Leyla, Fərhad, Fidan, Nihad,
Yusif, Nuray, Ənvər, Sərxan, Rəsul, Ruslana, Cavid,
Gülbəyaz və başqaları gözəl intonasiya ilə əlifba,
müəllim, ana dili, Vətən, sülh, qəhrəmanlıq barədə
şeirlər söylədilər, həvəslə hazırladıqları nağıllardan
parçaları, ata-ana, müəllim-şagird münasibətlərindən
bəhs edən maraqlı səhnəcikləri nümayiş etdirdilər.
"Cırtdan və tənbəl", "Turp" adlı yumoristik səhnəciklər
bütün iştirakçılarda xoş ovqat yaratdı, milli və dünya
xalqlarının rəqsləri məharətlə ifa olundu və alqışlarla
qarşılandı. Balaca idmançıların rəngarəng çıxışları da
bayram tədbirinə xüsusi rövnəq bəxş etdi. Birincilər
elmlərin açarı olan "Əlifba" barədə öz ürək sözlərini
belə ifadə etdilər: "Biz ömrümüz boyu sənə- əziz
dostumuza borcluyuq. Biz sənin köməyinlə 32 hərfi
mükəmməl mənimsəmiş, sərbəst yazmağı və oxumağı
öyrənmişik. Biz balacalar üçün bundan böyük xeyirxahlıq
olarmı?".
Şənliyi həvəslə seyr edən məktəbin direktoru Aytən
Baxşıyeva balaca fidanlara və tədbirin
hazırlanmasında əməyi olan bütün müəllimlərə
təşəkkürünü bildirdi və onlara elm, sənət, həyat
yollarında uğurlar arzuladı. Sinif müəllimi Ofelya
Babayeva "Əlifba" bayramının önəmli tədbir olduğunu
vurğuladı. Qeyd olundu ki, bu gün uşaqlar öz nümunəvi
çıxışları ilə sübut etdilər ki, onlar bu mərhələni
məharətlə dəf etdilər. O, yetirmələri ilə fəxr etdiyini
bildirdi.
Sonda birincilər fəxri fərman və diplomlarla
mükafatlandırıldılar.
S.SƏFƏROVA |