|
Bu günlərdə Bakıda Azərbaycan Tələbələr Birliyinin
təşkilatçılığı ilə "Bərabər təhsil imkanları - müxtəlif
bacarıqlar" mövzusunda beynəlxalq tədbir keçirilmişdir.
Avropa Komissiyasının "Gənclər fəaliyyətdə" (Youth in
Action) proqramı, eləcə də Azərbaycan Respublikası
Gənclər və İdman Nazirliyi, Binəqədi Rayon İcra
Hakimiyyəti tərəfindən dəstəklənən bu tədbirin həyata
keçirilməsində əsas məqsəd yaşından, cinsindən, maliyyə
və fiziki vəziyyətindən asılı olmayaraq cəmiyyətin bütün
təbəqələrinə bərabər səviyyədə təhsil imkanlarının
yaradılması yolları, fiziki qüsurlu şəxslər üçün təhsil
imkanları, həyatboyu öyrənmə və s. ilə bağlı müzakirələr
aparmaq və son nəticədə hər bir insanın başlıca hüququ
olan təhsil hüququndan istifadə imkanları barədə
təkliflər hazırlamaqdır. Müzakirələrin hərtərəfli
aparılması, bu sahədə təcrübə və informasiya
mübadiləsinə nail olmaq məqsədi ilə təlim kursuna
Gürcüstan, Rumıniya, Moldova, Xorvatiya, Polşa, İtaliya
və Albaniya kimi ölkələrdən iştirakçılar dəvət
olunmuşdur. Təlim kursu Gürcüstan və Macarıstandan olan
beynəlxalq təlimçilər tərəfindən aparılmışdır.
Tədbir müddətində iştirakçılar müxtəlif seminarlarda həm
öz ölkələrinin bu sahədəki qabaqcıl təcrübəsi ilə bağlı
məlumat vermiş, həm də müxtəlif təkliflərini
səsləndirmişlər. Sonda həmin təkliflər aidiyyəti
qurumlara təqdim edilmişdir.
Təlim kursunun iştirakçıları ölkəmizdə olduqları
müddətdə Azərbaycanın tarixi, mədəniyyəti, milli mətbəxi
ilə yaxından tanış olmaq imkanı əldə etmişlər. Onlar
təlim kursu üçün xüsusi olaraq hazırlanmış "Azərbaycan
mədəniyyəti gecəsi"ndən böyük zövq almışlar.
Təşkilatçılar bu tədbirin gənclərin inkişafı və insan
hüquqları sahəsində Azərbaycan dövlətinin atdığı müsbət
addımların dünyanın ayrı-ayrı ölkələrinə çatdırılması
baxımından müstəsna əhəmiyyətə malik olacağına
əminliklərini ifadə etmişlər.
Hicran ƏKBƏROVA |
