|
 Mayın
20-də Naxçıvan MR Təhsil Nazirliyi və Naxçıvan
Müəllimlər İnstitutu Kəngərli Rayon Təhsil Şöbəsi ilə
birlikdə rayonun Qarabağlar kənd tam orta məktəbində
"Kurikulumun öyrənilməsi, tətbiqi və məktəbdə psixoloji
xidmətin aktual problemləri" mövzusunda elmi-praktik
konfrans keçirmişlər.
Konfransı giriş sözü ilə açan Kəngərli Rayon Təhsil
Şöbəsinin müdiri Canik Abdullayev çıxış edərək
bildirmişdir ki, ötən beş il rayonumuzun ümumtəhsil
məktəblərində kurikulumun həyata keçirilməsi ilə bağlı
bir çox mühüm hadisələrlə zəngin olmuşdur.
Kurikulumlarla dərslərin tədrisindəki irəliləyişlər həm
müəllimlərin, məktəb rəhbərlərinin və Təhsil Nazirliyi
işçilərinin, həm də şöbənin birgə əməyinin nəticəsidir.
Təhsil islahatlarının tələblərinə cavab verən yeni
baxışlı müəllimlərin hazırlanmasında Naxçıvan Müəllimlər
İnstitutunun əməli köməyi də xüsusi qeyd edilmişdir.
Psixoloq müəllimlərin kurslara cəlb edilməsi, onlarla
aparılan işlər nəticə etibarı ilə yenidir. Onların
kurslarda öyrəndikləri və əldə etdikləri vəsaitlər
məktəbdə öz işlərini düz qurmağa kömək etmişdir. Bu cür
tədbirlərin keçirilməsi, qarşılıqlı fikir mübadilələri,
yerlərdə təşkil olunan görüşlər məktəb işinin düzgün
qurulmasına, dövlətimiz tərəfindən təhsillə bağlı
qarşıya qoyulan tələblərin həyata keçirilməsinə xidmət
edir.
Naxçıvan Müəllimlər İnstitutunun rektoru, professor Oruc
Həsənli "Məktəbdə psixoloji xidmətin aktual problemləri"
mövzusunda çıxış edərək bildirmişdir ki, ümumtəhsil
məktəblərinin vəzifəsi və məqsədi təhsil alanların
ayrı-ayrı fənlər üzrə bilik və bacarıqlarının
formalaşmasına, nitq mədəniyyətinin ünsiyyət bacarığına,
çevrilməsi ilə yanaşı, onların idrak fəallığının və
məntiqi təfəkkürünün inkişafını təmin etməkdən və onları
psixoloji baxımdan gələcəyin əsl vətəndaşı kimi
hazırlamaqdan ibarətdir. Qeyd edilmişdir ki, bu gün
yetişməkdə olan nəslin inkişafını, tərbiyəsini düzgün
təşkil etmək, sürətlə artan elmi-texniki yeniliklərin
əsaslarını onlara mənimsətmək üçün uşaqların dərketmə
imkanlarını, idrak proseslərinin inkişaf
qanunauyğunluqlarını və bu prosesin necə aşılanması və
tərbiyə edilməsini bilmək vacib və zəruridir.
Diqqətə çatdırılmışdır ki, psixoloq-müəllim ölkədə,
dünyada gedən proseslərlə uşaqlar arasında əlaqələrin
düzgün başa düşülməsinə, dərk edilməsinə istiqamətverici
şəxsdir. Buna görə də yeni təhsil islahatının həyata
keçirilməsində psixoloq-müəllimlərin də üzərinə böyük və
məsuliyyətli vəzifə düşür. Əsl vətəndaş tərbiyə etmək,
cəmiyyətimizin gələcək qurucularını düzgün
formalaşdırmaq üçün Naxçıvan Müəllimlər İnstitutunun
əməkdaşları məktəblərimizə, müəllimlərimizə, eləcə də
psixoloq-müəllimlərimizə hərtərəfli kömək göstərməyə
daim hazırdır.
Məruzə ətrafında çıxış edən Naxçıvan MR Təhsil
Nazirliyinin şöbə müdiri Firudin Zamanov kurikulum və
məktəbdə psixoloji xidmət işinin təşkili və tətbiqi ilə
bağlı görülən işlərdən, qarşıda duran problemlərdən
danışmışdır.
Naxçıvan Müəllimlər İnstitutunun baş müəllimi,
filologiya üzrə fəlsəfə doktoru Həsənəli Eyvazlı,
institutun metodisti Məsim Tarverdiyev, Kəngərli
rayonunun Qarabağlar kənd 1 nömrəli tam orta məktəbinin
psixoloq-müəllimi Məhluqə Abbasova çıxış edərək
təhsildəki problemlərdən və onun həlli yollarından
danışmışlar. Sonra qarşılıqlı açıq fikir mübadiləsi
keçirilmiş və konfrans iştirakçılarına kurikulumun
öyrənilməsi və tətbiqinə, o cümlədən məktəbdə psixoloji
xidmətin təşkilinə dair yazılı materiallar və elektron
SD-lər verilmişdir.
Naxçıvan Müəllimlər İnstitutunun Mətbuat xidməti |
