|
Mayın 17-də Azərbaycan Respublikası Təhsil Nazirliyi
Xalq Təhsili Muzeyinin təşkilatçılığı ilə T.İsmayılov
adına Uşaq-Gənclər Yaradıcılıq Sarayının "Uşaq dünyası"
rəsm qalereyasında 18 may - Beynəlxalq muzeylər gününə
həsr edilmiş "Muzey məktəblilərin təxəyyülündə" adlı
sərgi-müsabiqənin yekun tədbiri keçirilmişdir.
Tədbirdə Azərbaycan Respublikası Təhsil Nazirliyinin,
Bakı Şəhəri üzrə Təhsil İdarəsinin, məktəbdənkənar
müəssisələrin nümayəndələri, digər təhsil və mədəniyyət
müəssisələrinin əməkdaşları, müəllimlər, şagirdlər və
valideynlər, KİV təmsilçiləri iştirak etmişlər.
Tədbiri giriş sözü ilə açan Xalq Təhsili Muzeyinin
direktoru L.Bayramova sərgi-müsabiqənin "Muzeylər
Azərbaycan xalqının maddi və mənəvi dəyərlərini özündə
ehtiva edən, onu gələcək nəsillər üçün qoruyub saxlayan
və təbliğ edən mədəniyyət mərkəzidir" devizi altında
keçirildiyini qeyd edərək əsas məqsədin böyüməkdə olan
nəslin vətənpərvərlik ruhunda tərbiyə edilməsində,
estetik zövqünün, dünyagörüşünün formalaşmasında, xalqın
mədəni irsinə olan münasibətin aşılanmasında muzeylərin
rolunu təbliğ etməkdən və muzey haqqında təsəvvürlərini
öz təxəyyülünün məhsuluna çevirərək rəsmin köməyi ilə
təsvir edən istedadlı gənc rəssamları üzə çıxarmaqdan
ibarət olduğunu bildirmişdir.
Tədbirdə çıxış edən Azərbaycan Respublikası Təhsil
Nazirliyinin Tərbiyə və məktəbdənkənar müəssisələrlə iş
şöbəsinin aparıcı məsləhətçisi T.Aslanova, Bakı Şəhəri
üzrə Təhsil İdarəsinin aparıcı məsləhətçisi R.Əliyev,
T.İsmayılov adına UGYS-nin direktoru B.Ramazanova,
R.Mustafayev adına Azərbaycan Dövlət İncəsənət Muzeyinin
direktor müavini E.Qasımova Xalq Təhsili Muzeyi
tərəfindən belə bir mövzuda sərginin keçirilməsini
müsbət qiymətləndirərək rəsmləri nümayiş etdirilən
uşaqlara uğurlar arzulamışlar.
Tədbir iştirakçıları sərgi ilə tanış olduqdan sonra
müsabiqənin qaliblərinə Xalq Təhsili Muzeyi tərəfindən
fəxri fərman və hədiyyələr təqdim olunmuşdur.
Niyazi RƏHİMOV |
