Qalib olmaq uğrunda 194 nominant mübarizə aparacaq
Azərbaycan Respublikası Təhsil Nazirliyi tərəfindən
keçirilən "Elektron təhsil" Respublika müsabiqəsinin
növbəti mərhələsində 194 layihə qalib statusu uğrunda
mübarizəni davam etdirəcək. Ekspert Komissiyası
tərəfindən hər bir nominasiya üzrə 16 meyar əsasında
0-10 bal arasında qiymətləndirmə aparılmaqla "Elektron
tədris vəsaitlərindən istifadə edilməklə qurulan tədris
prosesinin ən yaxşı modeli" nominasiyası üzrə 162, "Müəllimlərin
bloqları" nominasiyası üzrə 16 və "Təhsildə İnternet
resursları" nominasiyası üzrə 16 layihə növbəti
mərhələyə keçmək hüququ qazanmışdır.
Ümumiyyətlə, müsabiqəyə 890 layihə təqdim olunmuş,
onlardan yalnız 781-i meyarlara uyğun olaraq qəbul
olunmuşdur.
Müsabiqə Dr. Web, İntel korporasiyasının "Gələcək üçün
təhsil" proqramı, AZEDUNET, "Ultra", "Mədəd-Azərbaycan"
və "Nar Mobile" tərəfindən dəstəklənir.
Hazırda müsabiqəyə təqdim olunmuş layihələr ictimaiyyət
tərəfindən geniş müzakirə olunmaqdadır. Layihələrin
onlayn müzakirəsində müsabiqənin rəsmi internet-səhifəsində
(musabiqe.edu.az) qeydiyyatdan keçmiş 4646
müəllim, 1488 tələbə, 4144 şagird, 538 valideyn iştirak
edir.
Xatırladaq ki, müsabiqə "Müasir məktəbdə elektron tədris
resursları" və "Təhsildə İnternet texnologiyaları"
istiqamətləri üzrə təşkil olunmuşdur. Müsabiqənin
keçirilməsində əsas məqsəd elektron tədris
resurslarından, İnternet texnologiyalarından tədris
prosesində istifadəni genişləndirmək, bu sahədə təhsil
ictimaiyyətini məlumatlandırmaq, tədris məqsədləri üçün
İnternetdən istifadənin yeni formalarını üzə çıxarmaq və
tədris prosesində informasiya texnologiyalarından fəal
istifadə edən müəllimləri həvəsləndirməkdən ibarətdir.
"Müasir məktəbdə elektron tədris resursları" istiqaməti
üzrə müsabiqəyə elektron tədris resurslarının tədris
prosesində əməli tətbiqinə aid olan materiallar təqdim
edilə bilər. Bu istiqamət üzrə qaliblər "Elektron
tədris vəsaitlərindən istifadə edilməklə qurulan tədris
prosesinin ən yaxşı modeli" nominasiyası üzrə müəyyən
olunacaqlar.
"Təhsildə İnternet texnologiyaları" istiqaməti üzrə
müsabiqəyə təhsil məzmunlu İnternet resursları və
bloqlar təqdim edilə bilər. Qaliblər "Təhsildə İnternet
resursları" və "Müəllimlərin bloqları" nominasiyaları
üzrə müəyyən olunacaqlar.
Müsabiqədə 3 nominasiya üzrə qaliblərə noutbuklar,
netbuklar və digər xüsusi mükafatlar təqdim olunacaq.
Qeyd etmək lazımdır ki, müsabiqə artıq dördüncü ildir
ki, keçirilir və 2010-2012-ci illərdə keçirilən
müsabiqələrdə ümumi olaraq 2000-dən artıq layihə təqdim
edilmişdir.
Hicran ƏKBƏROVA |