Javascript DHTML Drop Down Menu Powered by dhtml-menu-builder.com

ARXİV

7 İyun 2013 - №21

 

Universitet tarixində ilk Qran-pri mükafatı

 

Böyütmək üçün şəkili seçinNaxçıvan Dövlət Universitetində Azərbaycan xalqının ümummilli lideri Heydər Əliyevin anadan olmasının 90 illik yubileyi münasibətilə respublika ali təhsil müəssisələrinin tələbələri arasında keçirilmiş musiqi ifaçılarının müsabiqəsində qazanılan Qran-pri mükafatının təqdimetmə mərasimi olmuşdur. Mərasimi giriş sözü ilə açan universitetin rektoru, biologiya elmləri doktoru Saleh Məhərrəmov Azərbaycan xalqının ümummilli lideri Heydər Əliyevin 90 illik yubileyi, 2013-cü ildə  Naxçıvan Muxtar Respublikasında "Heydər Əliyev ili" elan olunması ilə əlaqədar universitetdə keçirilən çoxsaylı tədbirlərdən danışmışdır.  Rektor muxtar respublika rəhbərliyinin diqqət və qayğısı sayəsində Naxçıvan Dövlət Universitetində müxtəlif sahələrin, eləcə də incəsənətin inkişafı istiqamətində mühüm uğurlar qazanıldığını vurğulamışdır. Qeyd olunmuşdur ki, Azərbaycan Respublikası Təhsil Nazirliyi və Azərbaycan Dövlət Mədəniyyət və İncəsənət Universitetinin təşkilatçılığı  ilə keçirilən müsabiqədə  Naxçıvan Dövlət Universitetinin Qran-pri mükafatı qazanması milli mədəniyyətimizin inkişafında misilsiz xidmətləri olan  ümummilli lider Heydər Əliyevin 90 illik yubileyinə qiymətli töhfədir. Universitetin rektoru, biologiya elmləri doktoru Saleh Məhərrəmov bir daha müsabiqənin qaliblərini təbrik edərək muxtar respublikanın mədəniyyətini, incəsənətini uğurla təmsil etməkdə onlara uğurlar arzulamışdır.

Vokal qrupun bədii rəhbəri, NDU-nun incəsənət fakültəsinin  orkestr alətləri və dirijorluq kafedrasının müdiri, Naxçıvan Muxtar Respublikasının əməkdar artisti Validə Hüseynova çıxış edərək müsabiqənin ali təhsil ocaqlarında ifaçılıq sənətini inkişaf  etdirmək, Azərbaycan ifaçılıq sənətinin təbliği, gənc istedadların üzə çıxarılması baxımından əhəmiyyətindən danışmışdır. Bildirilmişdir ki, müsabiqə  vokal, xanəndə, estrada, xalq çalğı alətləri, fortepiano və aşıq sənəti nominasiyaları üzrə 6 ixtisas üzrə keçirilmişdir. 2 turdan ibarət müsabiqədə yerli və əcnəbi olmaqla 130-dan çox tələbə öz bilik və bacarığını nümayiş etdirmişdir. Azərbaycanın bütün ali təhsil müəssisələri ilə yanaşı, qardaş Türkiyə Cümhuriyyətindən, Ukrayna Respublikasından, İran İslam Respublikasından da nümayəndələr müsabiqəyə qatılmışdı. "Estrada və populyar musiqi" nominasiyası  üzrə  Naxçıvan Dövlət Universitetinin koreyalı, nigeriyalı, banqladeşli tələbələrdən ibarət "Meridian" vokal qrupunun ifaları elə ilk turdan böyük maraqla qarşılanmışdır. Azərbaycan musiqi sənətinin görkəmli nümayəndələri, Azərbaycan Dövlət Mədəniyyət və İncəsənət Universitetinin professor və müəllim heyətindən ibarət münsiflər heyəti çıxışı yüksək qiymətləndirmişdir. Belə ki, birbaşa qala konsertində iştirak etmək hüququ qazanılmışdır.  Qeyri-musiqiçilərdən ibarət xarici tələbələrin də təmsil olunduğu "Meridian" vokal qrupunun 5 səsli vokal ifaları müsabiqənin ən böyük mükafatına - Qran-pri mükafatına layiq görülmüşdür.

Universitetin tərbiyə işləri üzrə prorektoru, fəlsəfə elmləri doktoru, professor Məmməd Rzayev   mədəniyyətin, incəsənətin inkişafına göstərilən dövlət qayğısından bəhs etmiş, Qran-pri qaliblərinə kollektiv adından təbriklərini çatdırmışdır.

Çıxışlarda vurğulanmışdır ki, bu qələbədə Naxçıvan Dövlət Universitetində çoxillik rektorluq fəaliyyəti  dövründə incəsənətin inkişafında unudulmaz xidmətləri olan AMEA-nın vitse-prezidenti, akademik İsa Həbibbəylinin də xüsusi payı var.

Tədbirdə müsabiqənin gedişini əks etdirən videoçarx da nümayiş olunmuşdur.  

Mehriban SULTAN,
NDU-nun Mətbuat şöbəsinin müdiri

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov