|
 Mayın
31-də Bakıdakı 108 nömrəli orta məktəbdə "son zəng"
münasibətilə tədbir keçirilmişdir. Mərasim Azərbaycan
Respublikasının Dövlət himninin səsləndirilməsi ilə
başlanmışdır.
Məktəbin direktoru Narınc Mehdiyeva orta təhsillərini
uğurla başa vurduqları üçün onbirinciləri təbrik edərək,
yeni müstəqil həyata atılan gənclərə uğurlar arzulamış,
təhsil aldıqları məktəbin şərəfini həmişə uca tutmağı
tövsiyə etmişdir. Bildirilmişdir ki, məktəbin şagirdləri
respublika səviyyəli müxtəlif müsabiqələrdə qalib olmuş,
pedaqoji kollektivin başını uca tutmuşlar. X sinif
şagirdi Dünya İbrahimova ana dili və ədəbiyyat fənni
üzrə respublika olimpiadasında IV yeri tutmuşdur. Bir
neçə şagird isə ümummilli lider Heydər Əliyevin anadan
olmasının 90 illiyi ilə bağlı keçirilən şeir
müsabiqəsində, rəsm sərgilərində müvəffəqiyyətlə iştirak
etmişlər.
Aparıcılar - onbirinci sinif şagirdləri Samirə, Kəmalə
və Elmir orta təhsillərini bu il başa vuran şagirdləri
təbrik etdilər, bu gün onların həm də qürurverici bir
gün kimi qeyd edərək artıq yeni, müstəqil həyata qədəm
atdıqlarını bildirdilər. Çıxış edən şagirdlər məktəbə
gəldikləri ilk günlərdən onların əllərindən tutan, Ana,
Vətən sözlərini yazmağı öyrədən, elmin sirlərinə bələd
olmaqda həmişə yardım göstərən sevimli müəllimlərinə
təşəkkür etmişlər.
Tədbirdə iştirak edən Sabunçu Rayon İcra Hakimiyyəti
başçısının Maştağa qəsəbəsi üzrə nümayəndəsi Zülfüqar
Cəfərov, H.Abbasov adına Maştağa Mədəniyyət evinin
metodisti Salman Bağırov, Sabunçu rayon MKS-nin 6
nömrəli filialının müdiri Ramilə Mehdiyeva və başqaları
çıxış edərək məzunları təbrik etdilər, onlara gələcək
həyatlarında müvəffəqiyyətlər arzulamışlar.
Məktəbin ictimai işlərində fəal iştirak edən şagirdlərə
fəxri fərmanlar təqdim olunmuşdur.
Sonra məktəbin direktor müavinləri Umxanım Qasımova,
Rəhilə Hüseynova, ibtidai sinif müəllimləri, sinif
rəhbərləri və artıq tələbə adını qazanmış məktəbin
ötənilki məzunları onbirinciləri təbrik etmişlər, onlara
qayğı və sevinc dolu tələbəlik illəri arzulamışlar.
Kiçikyaşlı məktəblilər də hazırladıqları ədəbi-bədii
nümunələrlə tədbiri rövnəqləndirmişlər.
Nəhayət, onbirincilər üçün "son zəng" çalınmışdır.
Samirə məktəbin rəmzi bilik açarını X sinif şagirdi
Bəhmənə təqdim edərək estafeti onlara təhvil
verdiklərini, həmişə elmi bilikləri əldə rəhbər tutaraq
elmin qapılarını öz bacarıq, gərgin zəhmət və savadları
ilə açmalarını tövsiyə etmişdir.
XI sinif şagirdi Elmir Heydərov öz gözəl ifası ilə
"Dayanın, çalmayın sonuncu zəngi..." şeirini söyləyərək
bütün iştirakçıları kövrəltmişdir.
Sonda məzunlar bir daha əmin etdilər ki, müəllimlərin
onlara öyrətdikləri, yorulmadan çəkdikləri əmək, zəhmət
hədər getməyəcək, həyatın hansı sahəsində olursa-olsun
məktəbin adını, şərəfini hər yerdə uca tutacaqlar.
Samirə DADAŞOVA,
Bakıdakı 108 nömrəli məktəbin Azərbaycan dili və
ədəbiyyat müəllimi |
