İyunun 4-də Azərbaycan Müəllimlər İnstitutunda (AMİ)
Firudin bəy Köçərlinin 150 illik yubileyi ilə əlaqədar
tədbir keçirilmişdir. Tədbiri giriş sözü ilə açan
institutun rektoru, Milli Məclisin deputatı, professor
Aqiyə Naxçıvanlı dövlət başçısı cənab İlham Əliyevin
"Azərbaycanın görkəmli ədəbiyyatşünas alimi, tanınmış
maarifpərvər Firudin bəy Köçərlinin 150 illik yubileyi
haqqında" 14 fevral 2013-cü il tarixli Sərəncamına
əsasən keçirilən yubiley tədbirinin böyük əhəmiyyət
daşıdığını qeyd etmişdir. Qeyd edilmişdir ki, çoxşaxəli
yaradıcılığı ilə seçilən Firudin bəy Köçərli ədəbi
tənqid, ədəbiyyatşünaslıq, bədii ədəbiyyat, təhsil
sahəsində çox böyük xidmətlər göstərmişdir. F.Köçərli
Azərbaycan ədəbiyyatşünaslığına gəldiyi ilk gündən
Azərbaycan ədəbiyyatı tarixinin öyrənilməsinə böyük əmək
sərf etmişdir.
Rektor A.Naxçıvanlı bildirmişdir ki, F.Köçərli Qori
Müəllimlər Seminariyasında fəaliyyət göstərdiyi müddətdə
azərbaycanlıların təhsilə cəlb olunmasında, təhsillərini
başa vurmasında böyük xidmətləri olmuş ziyalılardan
biridir. Qori Müəllimlər Seminariyasında Azərbaycan
bölməsinin bağlanmaq təhlükəsi yarananda, məhz F.Köçərli
məsuliyyəti öz üzərinə götürərək, böyük çətinliklə də
olsa, Qori Müəllimlər Seminariyasının Azərbaycan
bölməsini Qazaxa köçürməyə müvəffəq olmuşdur. Xalqımızı
sevməyən insanlar onun ölümünə zəmin yaratmış və
arxivini də məhv etmişlər. Lakin F.Köçərlinin zəngin
irsinin aşkarlanmasında ondan sonra fəaliyyət göstərən
ədəbiyyatşünasların böyük rolu olmuşdur.
Sonra Azərbaycan ədəbiyyatı və onun tədrisi metodikası
kafedrasının professoru Təyyar Cavadov "XIX əsrin sonu -
XX əsrin əvvəllərində ədəbi proses və F.Köçərli",
professor Zaman Əsgərli "Firudin bəy Köçərli Azərbaycan
ədəbiyyat tarixçiliyinin banisi", dosent Nazilə
Abdullazadə "Firudin bəy Köçərlinin ədəbi görüşlərində
Füzuli yaradıcılığı", Azərbaycan dili və tədrisi
metodikası kafedrasının dosenti Vaqif Qurbanov
"F.Köçərli və nitqin aydınlığı məsələsi" mövzularında
çıxış etmişlər.
AMİ-nin Mətbuat xidməti |