Lənkəran Dövlət Universitetində Azərbaycan Tələbə
Gənclər Təşkilatları İttifaqının (ATGTİ) hesabat
konfransı keçirilmişdir. Konfransın moderatoru, LDU
Tələbə-Gənclər Təşkilatının sədri Uğur Qurbanzadə
tədbirin məqsəd və vəzifələrini açıqlamışdır.
Azərbaycan Respublikasının Dövlət himni səsləndikdən
sonra ATGTİ-nin hesabatı dinlənilmişdir. Tuğay Kərimovun
məruzəsində qeyd edilmişdir ki, ATGTİ hesabat dövründə
ideya-siyasi cəhətdən daha da möhkəmlənmiş,
təşkilatların sayı 83-ə çatdırılmışdır. Hesabat ilində
45 mindən çox tələbə gənclər təşkilatının tədbirlərində
iştirak etmişdir.
Sonra konfransın moderatoru cənub regionu tələbə-gənclər
təşkilatlarının fəaliyyəti barədə hesabat vermişdir.
ATGTİ-yə üzv olmaq üçün müraciət edən tələbə-gənclər
təşkilatlarının adları oxunmuşdur. Açıq səsvermə yolu
ilə ATGTİ-yə 26 yeni üzv qəbul olunmuşdur.
"Tələbə-gənclərin şəbəkələşməsində TGT-lərin rolu"
mövzusunda panel dinləmələrində Lənkəran Dövlət
Universitetinin magistrantı Seymur Murtuzayev,
Azərbaycan Müəllimlər İnstitutu Cəlilabad filialı Tələbə-Gənclər
Təşkilatının sədri Şəbnəm Məstəlili, Astara Pedaqoji
Kollecinin Tələbə-Gənclər Təşkilatının sədri Abbas
İbrahimli və başqaları tələbə-gənclərin təşkilatlanması,
gənclər təşkilatlarının ictimai fəallıqlarının
artırılması, tələbələrin asudə vaxtlarının təşkilinin
vacibliyi yollarından danışmışlar. Qeyd edilmişdir ki,
ümummilli lider Heydər Əliyevin Azərbaycana rəhbərlik
etdiyi dövrlərdə gəncliyə diqqət və qayğı onun
fəaliyyətinin prioritet istiqamətlərindən olmuş,
Azərbaycanda gənclər siyasətinin təməli qoyulmuşdur. Ulu
öndərin dəstəyi nəticəsində gənclər cəmiyyətin aparıcı
qüvvəsinə, gənclər siyasəti isə dövlət siyasətinin mühüm
tərkib hissəsinə çevrilmişdir.
Konfrans iştirakçıları ümummilli lider Heydər Əliyevin
müəyyənləşdirdiyi siyasi xəttin bu gün uğurla inkişaf
etdirilərək fədakarlıqla, yüksək işgüzarlıqla həyata
keçirildiyini bildirmiş, dahi rəhbərin ideyalarına daim
sadiq qalacaqlarını, 2013-cü il prezident seçkilərində
yenidən İlham Əliyevi dəstəkləyəcəklərini bildirmişlər.
Lənkəran Dövlət Universitetinin rektoru, fizika-riyaziyyat
elmləri doktoru, əməkdar elm xadimi, professor Asəf
İsgəndərov Azərbaycan Prezidenti İlham Əliyevin
rəhbərliyi ilə Azərbaycanda elmin, təhsilin və
mədəniyyətin inkişafına yönələn diqqət və qayğıdan, bu
istiqamətdə universitetdə həyata keçirilən tədbirlərdən
danışmışdır. Rektor universitetdə gənc nəslin vətənə
məhəbbət, Azərbaycan xalqının tarixinə, mədəni irsinə,
dövlət dilinə və rəmzlərinə hörmət ruhunda, peşəkar
mütəxəssis və vətənpərvər vətəndaş kimi tərbiyə olunması
istiqamətində həyata keçirilən tədbirlərdən də söz açmış,
universitet tələbə-gənclər təşkilatının ali məktəbin
ictimai həyatındakı fəaliyyətində bəzi məqamlara
toxunmuşdur.
Lənkəran Şəhər İcra Hakimiyyəti başçısının ictimai-siyasi
və humanitar məsələləri üzrə müavini Vüsal Nəsirli
gənclərin ölkənin ictimai-siyasi həyatında rolundan,
gənclər qarşısında duran vəzifələrdən danışmışdır.
Tədbirdə respublikanın müxtəlif ali və orta ixtisas
təhsili məktəbləri tələbə-gənclər təşkilatlarının
nümayəndələri iştirak edirdilər.
Hacı Etibar ƏHƏDOV,
LDU-nun Mətbuat və informasiya xidmətinin rəhbəri
|